Akrobate van die bergkranse
DIE antieke stad en omliggende woestyn wat En-gedi genoem word, was langs die weskus van die Dooie See geleë. Die gebied se rotsagtige passe en kranse voorsien ’n ideale tuiste vir die steenbok van die Beloofde Land, soortgelyk aan wat ons hier sien.
Hierdie vasvoetige dier is een van die wonders van die diereskepping. Kom ons maak die Bybel oop en bekyk hierdie fassinerende dier van naderby.
“Die hoë berge is vir die steenbokke”
Dit was die lied van die psalmis (Psalm 104:18). Steenbokke is goed toegerus om op hoogliggende plekke te lewe! Hulle is uiters rats en beweeg oor ruwe terrein met groot vertroue en spoed. Dit is deels toe te skryf aan die bou van hulle hoewe. Die opening kan groter word onder die bok se gewig, wat hom stewig laat vastrap wanneer hy op nou rotslyste staan of beweeg.
Steenbokke het ook buitengewone balans. Hulle kan baie ver spring en op ’n rotslys land wat skaars groot genoeg is vir al vier pote. Die bioloog Douglas Chadwick het eenkeer gesien hoe ’n ander soort steenbok sy balans gebruik om te voorkom dat hy vasgekeer bly op ’n rotslys wat te nou was vir hom om op om te draai. Hy sê: “Nadat die bok vlugtig na die volgende rotslys ongeveer 120 meter onder hom gekyk het, het hy sy voorpote stewig neergesit en stadig met sy agterlyf oor sy kop gelig teen die rotswand geloop asof hy besig was om ’n wawiel te doen. Terwyl ek my asem opgehou het, het die bok bly beweeg totdat sy agterpote afgekom en hy in die rigting gekyk het waarvandaan hy gekom het” (National Geographic). Dit is geen wonder dat steenbokke “die akrobate van die bergkranse” genoem word nie!
“Weet jy die tyd as die steenbokke lam?”
Steenbokke is baie skugter diere. Hulle verkies om afgesonderd van mense te woon. Trouens, mense vind dit moeilik om naby genoeg te kom om hulle in hulle natuurstaat te sien. Die Eienaar van “die vee op berge by duisende” kon dus tereg vir die man Job vra: “Weet jy die tyd as die steenbokke lam?”—Psalm 50:10; Job 39:4.
Godgegewe instink sê vir die steenbokooi wanneer dit tyd is om te lam. Sy soek ’n veilige plekkie en gee geboorte aan een of twee lammers, gewoonlik teen die einde van Mei of in Junie. Pasgebore lammers is binne net ’n paar dae vas op hulle pote.
“Die lieflike wildsbokkie en aanvallige steenbokkie”
Die wyse koning Salomo het mans aangespoor: “Verheug jou oor die vrou van jou jeug—die lieflike wildsbokkie en aanvallige steenbokkie” (Spreuke 5:18, 19). Dit was nie bedoel om vroue te verkleineer nie. Salomo het klaarblyklik op die mooiheid, grasie en ander voortreflike eienskappe van hierdie diere gesinspeel.
Die steenbok is onder die tallose “lewende wesens” wat oorweldigende getuienis van die Skepper se wysheid lewer (Genesis 1:24, 25). Is ons nie verheug dat God ons met soveel bekoorlike diere omring het nie?
[Foto-erkenning op bladsy 24]
Met vergunning van Athens University