Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • w97 11/1 bl. 26-28
  • “Eer Jehovah met jou waardevolle dinge”—Hoe?

Video nie beskikbaar nie.

Jammer, die video kon nie laai nie.

  • “Eer Jehovah met jou waardevolle dinge”—Hoe?
  • Die Wagtoring kondig Jehovah se Koninkryk aan—1997
  • Onderhofies
  • Soortgelyke materiaal
  • “Eer Jehovah”
  • “Jou waardevolle dinge”—Wat is dit?
  • Voorbeelde uit die verlede
  • ‘Vrywillige gawes’ in ons dag
  • Jehovah seën dié wat hom eer
  • Waarom moet ons vir Jehovah gee?
    Die Wagtoring kondig Jehovah se Koninkryk aan—1996
  • “Waar kom die geld vandaan?”
    Die Wagtoring kondig Jehovah se Koninkryk aan—1995
  • Hoe party tot die Koninkrykspredikingswerk bydra
    Die Wagtoring kondig Jehovah se Koninkryk aan—1994
  • Die Gewer van “elke goeie gawe”
    Die Wagtoring kondig Jehovah se Koninkryk aan—1993
Sien nog
Die Wagtoring kondig Jehovah se Koninkryk aan—1997
w97 11/1 bl. 26-28

“Eer Jehovah met jou waardevolle dinge”—Hoe?

“EER Jehovah met jou waardevolle dinge en met die eerstelinge van jou hele opbrengs.” Opgesluit in hierdie geïnspireerde wyse woorde, wat sowat 2600 jaar gelede geskryf is, is die sleutel om Jehovah se seën in oorvloed te ondervind, want die skrywer sê voorts: “Dan sal jou voorraadskure met oorvloed gevul word; en van nuwe wyn sal jou eie parskuipe oorloop.”—Spreuke 3:9, 10, NW.

Maar wat beteken dit om God te eer? Wat is die waardevolle dinge waarmee ons Jehovah moet eer? En hoe kan ons dit doen?

“Eer Jehovah”

In die Skrif beteken die algemeenste Hebreeuse woord vir eer, ka·voodhʹ, letterlik “swaarheid”. Om iemand te eer, beteken dus om hom of haar as gewigtig, indrukwekkend of belangrik te beskou. ’n Ander Hebreeuse woord vir eer, jeqarʹ, word ook vertaal as “kosbaar” en “kosbare dinge”. Die Griekse woord ti·meʹ, wat in die Bybel as “eer” vertaal word, het eweneens die gedagte van agting, waarde, kosbaarheid. ’n Mens eer dus iemand anders deur aan daardie persoon diep respek en agting te betoon.

Eerbetoning het ook ’n ander sy. Dink aan die verhaal van die getroue Jood Mordegai, wat by een geleentheid ’n sameswering teen die lewe van koning Ahasveros van eertydse Persië oopgevlek het. Later, toe die koning uitgevind het dat niks gedoen is om Mordegai vir daardie daad te vereer nie, het hy sy eerste minister, Haman, gevra wat die beste manier is om iemand te eer wat in die koning se oë guns gevind het. Haman het gedink dat hierdie eer aan hom betoon sou word, maar hoe verkeerd was hy tog! Hoe dit ook al sy, Haman het gesê dat so ’n persoon in “’n koninklike kleed” geklee moet word en op “’n perd waar die koning op gery het”, moet ry. Hy het ten slotte gesê: “Hulle moet hom laat ry op die perd oor die stadsplein en voor hom uitroep: So word gedoen aan die man aan wie die koning eer wil bewys” (Ester 6:1-9). In hierdie geval het eerbetoning aan ’n persoon ingesluit dat hy in die openbaar verheerlik is sodat hy deur al die mense hooggeag sou word.

Eerbetoning aan Jehovah het eweneens twee sye: Om persoonlik hoë agting aan hom te betoon en om hom in die openbaar te verheerlik deur deel te neem aan die werk om sy naam in die openbaar te verkondig en daardie werk te ondersteun.

“Jou waardevolle dinge”—Wat is dit?

Ons waardevolle dinge sluit beslis ons lewe, ons tyd, ons talente en ons krag in. Wat van ons materiële besittings? Let op Jesus se woorde toe hy gesien het hoe ’n behoeftige weduwee twee muntstukkies van min waarde in ’n tempelskatkis gooi. Hy het gesê: “Hierdie weduwee het, hoewel sy arm is, meer as hulle almal ingegooi. Want hulle almal [die ander bydraers] het uit hulle oorvloed gawes ingegooi, maar hierdie vrou het in haar gebrek al die middele vir lewensonderhoud ingegooi wat sy gehad het” (Lukas 21:1-4). Jesus het hierdie weduwee geprys omdat sy haar materiële bates gebruik het om Jehovah se aanbidding te bevorder.

Die waardevolle dinge wat Salomo genoem het, sluit klaarblyklik ook materiële besittings in wat ons moontlik het. En die uitdrukking “die eerstelinge van jou hele opbrengs” bevat ook die gedagte om die beste van ons waardevolle dinge vir Jehovah te gee.

Maar hoe kan dit God eer as ons materiële dinge gee? Behoort alle dinge nie reeds aan hom nie? (Psalm 50:10; 95:3-5). “Dit kom alles van U”, het koning Dawid in ’n innige gebed tot Jehovah erken. En wat ’n groot skenking betref wat Dawid en sy volk vir die bou van die tempel gegee het, het hy gesê: “Uit u hand het ons dit aan U gegee” (1 Kronieke 29:14). Wanneer ons dus gawes aan Jehovah bring, gee ons bloot terug wat hy, uit die goedheid van sy hart, vir ons gegee het (1 Korintiërs 4:7). Maar soos vroeër gesê is, sluit eerbetoning aan Jehovah in dat ons hom in die oë van ander verheerlik. En materiële gawes wat vir die bevordering van ware aanbidding gebruik word, vereer God. Die Bybel bevat uitstekende voorbeelde van hoe Jehovah op hierdie manier geëer is.

Voorbeelde uit die verlede

Sowat 3500 jaar gelede, toe dit tyd was vir Jehovah om die tabernakel in die woestyn te voorsien as ’n plek waar die Israeliete kon aanbid, het ’n behoefte ontstaan aan ’n verskeidenheid kosbare artikels wat nodig was vir die godgegewe ontwerp daarvan. Jehovah het Moses beveel om ‘elkeen wat gewillig is in sy hart ’n offergawe aan Jehovah te laat bring’ (Exodus 35:5). Die verslag sê verder: “Elkeen wie se hart hom opgewek en elkeen wie se gees hom aangedryf het, het gekom: hulle het die offergawe van die HERE gebring vir die werk aan die tent van samekoms en vir sy hele bediening en vir die heilige klere” (Exodus 35:21). Trouens, hulle vrywillige offers was soveel meer as wat nodig was vir die werk dat hulle vir die mense moes sê om ‘op te hou om te bring’!—Exodus 36:5, 6.

Dink aan nog ’n voorbeeld. Toe die tabernakel sy doel uitgedien het en voorbereidsels getref is vir bouwerk aan die tempel het Dawid ’n groot persoonlike bydrae gegee vir die tempel wat sy seun Salomo sou bou. Hy het ook ’n beroep op ander gedoen om sy voorbeeld te volg, en die volk het gereageer deur gawes van waardevolle dinge aan Jehovah te bring. Die silwer en die goud alleen sou teen die huidige waarde ongeveer 222 miljard rand werd wees. “En die volk het uiting gegee aan verheuging oor hulle skenking van vrywillige gawes.”—1 Kronieke 29:3-9, NW; 2 Kronieke 5:1.

‘Vrywillige gawes’ in ons dag

Hoe kan ons in ons dag deel in die vreugde om vrywillige gawes te bring? Die belangrikste werk wat tans in die wêreld gedoen word, is die Koninkrykspredikings- en dissipelmaakwerk (Matteus 24:14; 28:19, 20; Handelinge 1:8). En Jehovah het dit goedgedink om die aardse belange van die Koninkryk aan sy Getuies toe te vertrou.—Jesaja 43:10.

Dit is voor die hand liggend dat geld nodig is om die werk wat Jehovah se Getuies vandag doen te finansier. Geld is nodig om Koninkryksale, Byeenkomssale, takkantore, fabrieke en Bethelhuise te bou en in stand te hou. Daar is ook koste daaraan verbonde om Bybels en Bybelpublikasies in verskeie tale uit te gee en te versprei. Hoe word sulke organisatoriese uitgawes gedek? Deur bydraes wat absoluut vrywillig is!

Die meeste van die bydraes kom van mense wat net beperkte middele het—soos die weduwee wat Jesus gesien het. Omdat hulle nie die kans wil laat verbygaan om Jehovah op hierdie manier te eer nie, maak hulle beskeie bydraes “na hulle ware vermoë” en soms selfs “bo hulle ware vermoë”.—2 Korintiërs 8:3, 4.

“Laat elkeen doen net soos hy hom in sy hart voorgeneem het, nie teësinnig of onder dwang nie, want God het ’n blymoedige gewer lief”, het die apostel Paulus vir die Christene in Korinte gesê (2 Korintiërs 9:7). Om blymoedig te gee, vereis goeie beplanning. Paulus het vir die Korintiërs gesê: “Op elke eerste dag van die week moet elkeen van julle by sy eie huis iets opsy sit en opspaar na gelang van sy voorspoed, sodat insamelings nie sal plaasvind wanneer ek daar aankom nie” (1 Korintiërs 16:2). Diegene wat vandag bydraes wil gee om die Koninkrykswerk te bevorder, kan eweneens, sonder dat enigiemand daarvan weet en vrywillig, ’n deel van hulle inkomste vir daardie doel opsy sit.

Jehovah seën dié wat hom eer

Hoewel materiële voorspoed op sigself nie tot geestelike voorspoed lei nie, sal die vrygewige gebruik van ons kosbare dinge—ons tyd, ons krag en ons materiële middele—om Jehovah te eer ryk seëninge meebring. Dit is die geval omdat God, aan wie alles behoort, ons verseker: “Die siel wat seën, word versadig; en hy wat laaf, word self ook gelaaf.”—Spreuke 11:25.

Ná koning Dawid se dood het sy seun Salomo die vrywillige bydraes wat sy vader ingesamel het, gebruik om ’n glorieryke tempel te bou volgens die instruksies wat Jehovah gegee het. En solank Salomo getrou gebly het in sy aanbidding van God, het “Juda en Israel veilig gewoon . . . van Dan tot Berseba, al die dae van Salomo” (1 Konings 4:25). Voorraadskure is volgemaak, wynkuipe het oorgeloop—solank Israel ‘Jehovah met hulle waardevolle dinge geëer het’.

Later het Jehovah deur die profeet Maleagi gesê: “Beproef My tog hierin, sê die HERE van die leërskare, of Ek vir julle nie die vensters van die hemel sal oopmaak en op julle ’n oorvloedige seën sal uitstort nie” (Maleagi 3:10). Die geestelike voorspoed wat Jehovah se knegte vandag geniet, is ’n bewys dat God sy belofte gestand gedoen het.

Dit behaag Jehovah beslis wanneer ons ons deel doen om Koninkryksbelange te bevorder (Hebreërs 13:15, 16). En hy belowe om ons te onderskraag as ons ‘aanhou om eers die koninkryk en sy regverdigheid te soek’ (Matteus 6:33). Mag ons met groot blydskap in ons hart ‘Jehovah met ons waardevolle dinge eer’.

[Venster op bladsy 28, 29]

Maniere waarop sommige vrywillig bydraes vir die wêreldwye werk gee

Baie sit ’n bedrag opsy wat hulle in die bydraebussies by die Koninkryksaal plaas. Gemeentes stuur hierdie geld elke maand aan die wêreldhoofkwartier in Brooklyn, New York, of aan die plaaslike takkantoor.

Vrywillige geldelike bydraes kan ook regstreeks na die Tesourierskantoor, Watch Tower Bible and Tract Society of Penn-sylvania, 25 Columbia Heights, Brooklyn, New York 11201-2483 of na die Genootskap se plaaslike takkantoor gestuur word. Juwele of ander kosbare artikels kan ook geskenk word. ’n Kort briefie wat meld dat dit ’n regstreekse skenking is, moet hierdie bydraes vergesel.

Reëling vir voorwaardelike skenkings

Geld kan aan die Wagtoringgenootskap gegee word om in trust gehou te word tot die skenker te sterwe kom, op voorwaarde dat dit aan hom terugbetaal sal word indien hy dit self nodig sou kry. Tree asseblief in verbinding met die Tesourierskantoor by die adres hierbo vir meer inligting.

Beplande skenkings

Buiten regstreekse en voorwaardelike skenkings van geld is daar ander maniere om tot voordeel van Koninkryksdiens in alle wêrelddele te gee. Dit sluit in:

Versekering: Die Wagtoringgenootskap kan as die begunstigde van ’n lewensversekeringspolis of in ’n aftree-/pensioenskema benoem word. Die Genootskap moet van sulke reëlings in kennis gestel word.

Aandele en obligasies: Aandele en obligasies kan aan die Wagtoringgenootskap geskenk word, hetsy as ’n regstreekse skenking of ooreenkomstig ’n reëling waarvolgens die inkomste steeds aan die skenker betaal word.

Vaste eiendom: Verkoopbare vaste eiendom kan regstreeks aan die Wagtoringgenootskap geskenk word of dit kan geskenk word terwyl die skenker gedurende sy of haar leeftyd daar kan bly woon. Voordat enige vaste eiendom aan die Genootskap oorgedra word, moet daar eers met die Genootskap in aanraking gekom word.

Testamente: Eiendom of geld kan deur ’n wettige testament aan die Wagtoringgenootskap bemaak word. ’n Kopie van die testament moet aan die Genootskap gestuur word. Enigiemand wat in enige van hierdie reëlings vir beplande skenking belangstel, moet met die Tesourierskantoor by die adres hieronder of met die Genootskap se kantoor in sy land in verbinding tree. Die Tesourierskantoor moet ’n afskrif ontvang van die toepaslike dokumente wat met enige van hierdie reëlings verband hou.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel