Jehovah, ’n God wat “vergewensgesind” is

“U, o Here, is goed en vergewensgesind.”—PSALM 86:5.

1. Watter swaar las het koning Dawid gedra, en hoe het hy vertroosting gevind vir sy beswaarde hart?

KONING DAWID van eertydse Israel het geweet hoe swaar die las van ’n skuldige gewete kan wees. Hy het geskryf: “My ongeregtighede gaan oor my hoof; soos ’n swaar pak het hulle vir my te swaar geword. Ek is kragteloos en heeltemal verbrysel; ek brul van die gebons van my hart” (Psalm 38:5, 9). Maar Dawid het vertroosting gevind vir sy beswaarde hart. Hy het geweet dat Jehovah die sonde haat, nie die sondaar nie—mits dié waarlik berouvol is en sy sondige weg verlaat (Psalm 32:5; 103:3). Met volle vertroue in Jehovah se bereidwilligheid om barmhartigheid aan berouvolles te bewys, het Dawid gesê: “U, o Here, is goed en vergewensgesind.”—Psalm 86:5.

2, 3. (a) Watter las sal ons moontlik dra as ons gesondig het, en waarom is dit heilsaam? (b) Watter gevaar is daar as ons deur skuldgevoelens “verswelg word”? (c) Watter versekering gee die Bybel ons dat Jehovah bereid is om te vergewe?

² Wanneer ons sondig, sal ons moontlik ook as gevolg daarvan die verpletterende las van ’n pynlike gewete moet dra. Hierdie gewetenswroeging is normaal, selfs heilsaam. Dit kan ons beweeg om positiewe stappe te doen om ons foute reg te stel. Maar party Christene het hulle deur skuldgevoelens laat oorweldig. Hulle selfveroordelende hart hou dalk vol dat God hulle nie volkome sal vergewe nie, ongeag hoe berouvol hulle is. “Dit is ’n verskriklike gevoel wanneer jy dink dat Jehovah jou miskien nie meer liefhet nie”, het ’n suster gesê toe sy teruggedink het aan ’n fout wat sy begaan het. Selfs nadat sy berou getoon en nuttige raad van gemeentelike ouer manne aanvaar het, het sy steeds gevoel dat sy nie God se vergifnis verdien nie. Sy verduidelik: “Nie ’n dag gaan verby dat ek Jehovah nie om vergifnis vra nie.” As ons deur skuldgevoelens “verswelg word”, sal Satan ons dalk probeer oorreed om tou op te gooi, om te voel dat ons dit nie waardig is om Jehovah te dien nie.—2 Korintiërs 2:5-7, 11.

³ Maar dit is glad nie hoe Jehovah sake beskou nie! Sy Woord verseker ons dat Jehovah vergewensgesind is, ja, bereid is om te vergewe, as ons opregte, hartgrondige berou toon (Spreuke 28:13). As God se vergifnis dan al ooit vir jou onbereikbaar gelyk het, is ’n beter begrip van waarom en hoe hy vergewe dalk nodig.

Waarom is Jehovah “vergewensgesind”?

4. Wat hou Jehovah in gedagte ten opsigte van ons samestelling, en hoe raak dit die manier waarop hy ons behandel?

⁴ Ons lees: “So ver as die ooste verwyderd is van die weste, so ver verwyder Hy ons oortredinge van ons. Soos ’n vader hom ontferm oor die kinders, so ontferm die HERE Hom oor die wat Hom vrees.” Waarom is Jehovah geneig om barmhartigheid te bewys? Die volgende vers antwoord: “Want Hy, Hy weet watter maaksel ons is, gedagtig dat ons stof is” (Psalm 103:12-14). Ja, Jehovah vergeet nie dat ons skepsele van stof is wat swakhede as gevolg van onvolmaaktheid het nie. Die uitdrukking dat hy weet “watter maaksel ons is”, herinner ons daaraan dat die Bybel Jehovah met ’n pottebakker vergelyk en óns met die voorwerpe wat hy vorma (Jeremia 18:2-6). ’n Pottebakker hanteer sy kleivoorwerpe ferm maar versigtig, terwyl hy altyd hulle samestelling in gedagte hou. So temper Jehovah, die Groot Pottebakker, ook sy handelinge met ons ooreenkomstig die swakheid van ons sondige natuur.—Vergelyk 2 Korintiërs 4:7.

5. Hoe beskryf die boek Romeine die sonde se kragtige greep op ons gevalle vlees?

⁵ Jehovah weet hoe kragtig die sonde is. Die Skrif beskryf die sonde as ’n baie sterk krag wat die mens in sy dodelike greep het. Presies hoe sterk is die sonde se greep? In die boek Romeine verduidelik die geïnspireerde apostel Paulus dit op aanskoulike wyse: Ons is “onder die sonde”, soos soldate onder hulle bevelvoerder is (Romeine 3:9); dit “heers” oor die mensdom soos ’n koning (Romeine 5:21); dit “woon” in ons (Romeine 7:17, 20); “die wet” daarvan is voortdurend in ons aan die werk en probeer as ’t ware ons handelswyse beheer (Romeine 7:23, 25). Wat ’n moeilike stryd het ons tog om die sonde se kragtige houvas op ons gevalle vlees te weerstaan!—Romeine 7:21, 24.

6. Hoe beskou Jehovah diegene wat sy barmhartigheid met ’n berouvolle hart soek?

⁶ Ons barmhartige God weet derhalwe dat volmaakte gehoorsaamheid nie vir ons moontlik is nie, ongeag hoe graag ons hart dit aan hom wil gee (1 Konings 8:46). Hy gee ons die liefdevolle versekering dat hy ons sal vergewe as ons sy vaderlike barmhartigheid met ’n berouvolle hart soek. Die psalmis Dawid het gesê: “Die offers van God is ’n gebroke gees; ’n gebroke en verslae hart sal U, o God, nie verag nie!” (Psalm 51:19). Jehovah sal nooit ’n hart wat weens ’n skuldlas gebroke en verslae is, verwerp of wegwys nie. Hoe pragtig beskryf dit tog Jehovah se vergewensgesindheid!

7. Waarom kan ons nie God se barmhartigheid misbruik nie?

⁷ Beteken dit egter dat ons God se barmhartigheid kan misbruik deur ons sondige natuur as ’n verskoning vir sonde te gebruik? Hoegenaamd nie! Jehovah word nie deur blote sentiment gerig nie. Sy barmhartigheid het perke. Hy sal beslis nie diegene vergewe wat met ’n verharde hart voorbedagte, opsetlike sonde sonder enige berou beoefen nie (Hebreërs 10:26-31). Wanneer hy daarenteen ’n hart sien wat “gebroke en verslae” is, is hy “vergewensgesind” (Spreuke 17:3). Kom ons kyk na ’n paar van die kleurryke beskrywings wat in die Bybel gebruik word om die volkomenheid van God se vergifnis toe te lig.

Hoe volkome is Jehovah se vergifnis?

8. Wat doen Jehovah as ’t ware wanneer hy ons sondes vergewe, en hoe behoort dit ons te raak?

⁸ Berouvolle koning Dawid het gesê: “My sonde het ek U bekend gemaak, en my ongeregtigheid het ek nie bedek nie. Ek het gesê: Ek wil aan die HERE my oortredinge bely; en Ú het die ongeregtigheid van my sonde vergewe” (Psalm 32:5, NW). Die woord “vergewe” vertaal ’n Hebreeuse woord wat basies “optel”, “dra”, beteken. Die gebruik daarvan in hierdie geval beteken ‘om skuld, sonde, oortreding weg te neem’. Jehovah het dus as ’t ware Dawid se sondes opgetel en dit weggeneem. (Vergelyk Levitikus 16:20-22.) Dit het ongetwyfeld Dawid se skuldgevoelens verlig. (Vergelyk Psalm 32:3.) Ook ons kan volle vertroue hê in die God wat die sondes vergewe van diegene wat sy vergifnis soek op grond van hulle geloof in die losprysofferande van Jesus Christus. (Matteus 20:28; vergelyk Jesaja 53:12.) Diegene wie se sondes Jehovah sodoende optel en wegneem, hoef nie langer die skuldlas vir vorige sondes te dra nie.

9. Wat beteken Jesus se woorde: “Vergewe ons ons skulde”?

⁹ Jesus het die verwantskap tussen skuldeisers en skuldenaars gebruik om toe te lig hoe Jehovah vergewe. Jesus het ons byvoorbeeld aangespoor om te bid: “Vergewe ons ons skulde” (Matteus 6:12). Jesus het “sondes” dus met “skulde” vergelyk (Lukas 11:4). Wanneer ons sondig, word ons “skuldenaars” voor Jehovah. Die Griekse werkwoord wat met “vergewe” vertaal word, kan beteken “om skuld kwyt te skeld, daarvan af te sien, deur dit nie te eis nie”. Wanneer Jehovah vergewe, skeld hy in sekere sin die skuld kwyt wat ons andersins toegereken sou geword het. Berouvolle sondaars kan dus moed skep. Jehovah sal nooit betaling eis vir skuld wat hy kwytgeskeld het nie!—Psalm 32:1, 2; vergelyk Matteus 18:23-35.

10, 11. (a) Watter beeld word geskep deur die frase “uitgewis kan word” in Handelinge 3:19? (b) Hoe word die volkomenheid van Jehovah se vergifnis toegelig?

¹⁰ In Handelinge 3:19 gebruik die Bybel wéér lewendige beeldspraak om God se vergifnis te beskryf: “Toon dus berou en draai om sodat julle sondes uitgewis kan word.” Die frase ‘uitgewis word’ vertaal ’n Griekse werkwoord wat “uitvee, tot niet maak, kanselleer of vernietig” kan beteken wanneer dit metafories gebruik word. Volgens sommige geleerdes is die beeld dié van handskrif wat uitgewis word. Hoe was dit moontlik? Die ink wat in die ou tyd algemeen gebruik is, het bestaan uit ’n mengsel van houtskool, gom en water. Kort nadat iemand met sulke ink geskryf het, kon hy ’n nat spons vat en die skrif uitvee.

¹¹ Dit is ’n pragtige beskrywing van die volkomenheid van Jehovah se vergifnis. Wanneer hy ons sondes vergewe, is dit asof hy ’n spons vat en dit uitvee. Ons hoef nie bang te wees dat hy ons in die toekoms oor sulke sondes sal verwyt nie, want die Bybel openbaar iets anders omtrent Jehovah se barmhartigheid wat werklik merkwaardig is: Wanneer hy vergewe, vergeet hy!

‘Ek sal aan hulle sonde nie meer dink nie’

12. Beteken die feit dat die Bybel sê dat Jehovah ons sondes vergeet dat hy dit nie kán onthou nie, en waarom antwoord jy so?

¹² Deur die profeet Jeremia het Jehovah omtrent dié in die nuwe verbond beloof: “Ek sal hulle ongeregtigheid vergewe en aan hulle sonde nie meer dink nie” (Jeremia 31:34). Beteken dit dat Jehovah die sondes nie meer kan onthou wanneer hy vergewe nie? Dit kan nouliks die geval wees. Die Bybel vertel ons van die sondes van baie mense wat deur Jehovah vergewe is, met inbegrip van Dawid (2 Samuel 11:1-17; 12:1-13). Jehovah is natuurlik nog steeds bewus van die ongeregtighede wat hulle gepleeg het, en ons moet ook wees. Die verslag van hulle sondes, asook van hulle berou en vergifnis deur God, is tot ons nut bewaar (Romeine 15:4). Wat bedoel die Bybel dan wanneer dit sê dat Jehovah nie “dink aan” die sondes van diegene wat hy vergewe nie?

13. (a) Wat is ingesluit in die betekenis van die Hebreeuse werkwoord wat met ‘ek sal dink aan’ weergegee word? (b) Waarvan verseker Jehovah ons wanneer hy sê: “Ek sal . . . aan hulle sonde nie meer dink nie”?

¹³ Die Hebreeuse werkwoord wat met ‘ek sal dink aan’ vertaal word, beteken nie net om aan die verlede terug te dink nie. Volgens die Theological Wordbook of the Old Testament bevat dit ook die “bykomende betekenis van gepaste optrede”. Om te “dink aan” sonde, beteken dus in hierdie sin om teen sondaars op te tree. Toe die profeet Hosea aangaande weerspannige Israeliete gesê het: “Hy [Jehovah] sal dink aan hulle ongeregtigheid”, het die profeet bedoel dat Jehovah teen hulle sou optree weens hulle gebrek aan berou. Die res van die vers voeg dus by: “[Hy sal] besoeking doen oor hulle sondes” (Hosea 9:9). Wanneer Jehovah daarenteen sê: “Ek sal . . . aan hulle sonde nie meer dink nie”, verseker hy ons daarvan dat hy, wanneer hy eenmaal ’n berouvolle sondaar vergewe het, nie die een of ander tyd in die toekoms weens daardie sondes teen hom sal optree nie (Esegiël 18:21, 22). Hy vergeet dus in die sin dat hy nie ons sondes herhaaldelik ophaal om ons oor en oor te beskuldig of te straf nie. Jehovah stel sodoende ’n uitstekende voorbeeld vir ons om in ons handelinge met ander na te volg. Wanneer onenigheid ontstaan, is dit die beste om nie ou oortredinge op te haal wat jy vroeër ingestem het om te vergewe nie.

Wat van die gevolge?

14. Waarom beteken vergifnis nie dat ’n berouvolle sondaar vrygestel is van al die gevolge van sy verkeerde weg nie?

¹⁴ Beteken Jehovah se vergewensgesindheid dat ’n berouvolle sondaar vrygestel is van al die gevolge van sy verkeerde weg? Glad nie. Ons kan nie sondig en ongestraf bly nie. Paulus het geskryf: “Wat ’n mens ook al saai, dit sal hy ook maai” (Galasiërs 6:7). Ons sal moontlik sekere gevolge van ons optrede of probleme ondervind, maar Jehovah bring nie rampspoed oor ons nadat hy vergifnis geskenk het nie. Wanneer probleme ontstaan, moet ’n Christen nie dink: ‘Miskien straf Jehovah my vir vorige sondes’ nie. (Vergelyk Jakobus 1:13.) Daarenteen bewaar Jehovah ons nie van al die gevolge van ons verkeerde dade nie. ’n Egskeiding, ongewenste swangerskap, seksueel oordraagbare siekte, verlies aan vertroue of respek—dit alles kan die droewige gevolge van sonde wees, en Jehovah sal ons nie daarteen beskerm nie. Onthou, selfs al het Jehovah Dawid vir sy sondes met betrekking tot Batseba en Uria vergewe, het hy Dawid nie teen die rampspoedige gevolge daarvan beskerm nie.—2 Samuel 12:9-14.

15, 16. Hoe het die wet wat in Levitikus 6:1-7 opgeteken is die slagoffer sowel as die oortreder tot voordeel gestrek?

¹⁵ Ons sondes kan ook ander gevolge hê. Dink byvoorbeeld aan die verslag in Levitikus hoofstuk 6. Die Mosaïese Wet bespreek hier die situasie wanneer iemand ’n ernstige oortreding begaan deur ’n mede-Israeliet se besittings deur roof, afpersing of bedrog in besit te neem. Die sondaar ontken dan dat hy skuldig is, en gaan selfs so ver om vals te sweer. Dit is een persoon se woord teen dié van ’n ander. Maar later pla die oortreder se gewete hom en bely hy sy sonde. Hy moet nog drie dinge doen om God se vergifnis te verkry: teruggee wat hy geneem het, die slagoffer ’n boete van 20 persent betaal en ’n ram as ’n skuldoffer bring. “Dan”, sê die wet, “moet die priester vir hom versoening doen voor die aangesig van die HERE, en dit sal hom vergewe word.”—Levitikus 6:1-7; vergelyk Matteus 5:23, 24.

¹⁶ Hierdie wet was ’n barmhartige voorsiening van God. Dit het die slagoffer tot voordeel gestrek, wie se eiendom teruggegee is en wat ongetwyfeld baie verlig was toe die oortreder uiteindelik sy sonde bely het. Terselfdertyd het die wet die een tot voordeel gestrek wie se gewete hom uiteindelik beweeg het om sy skuld te erken en sy oortreding reg te stel. Trouens, as hy geweier het om dit te doen, sou daar vir hom geen vergifnis van God gewees het nie.

17. Wat verwag Jehovah moet ons doen wanneer ander deur ons sondes benadeel is?

¹⁷ Hoewel ons nie onder die Mosaïese Wet is nie, gee dit ons kosbare insig in Jehovah se denke, met inbegrip van sy beskouing oor vergifnis (Kolossense 2:13, 14). Wanneer ander deur ons sondes benadeel of veronreg is, behaag dit Jehovah wanneer ons ons bes doen om ‘die oortreding reg te stel’ (2 Korintiërs 7:11). Dit beteken dat ons ons sonde bely, ons skuld erken en die slagoffer selfs om verskoning vra. Dan kan ons ons tot Jehovah wend op grond van Jesus se offerande en die verligting ervaar van ’n skoon gewete en die versekering dat God ons vergewe het.—Hebreërs 10:21, 22.

18. Watter dissipline sal moontlik met Jehovah se vergifnis gepaardgaan?

¹⁸ Soos enige liefdevolle ouer sal Jehovah moontlik vergifnis tesame met ’n mate van dissipline skenk (Spreuke 3:11, 12). ’n Berouvolle Christen sal miskien sy voorreg moet prysgee om as ouer man, bedieningskneg of pionier te dien. Dit sal dalk vir hom pynlik wees om vir ’n ruk voorregte te verloor wat vir hom kosbaar is. Sulke dissipline beteken egter nie dat hy Jehovah se guns verloor het of dat Jehovah hom nie vergewe het nie. Boonop moet ons onthou dat dissipline wat van Jehovah kom ’n bewys van sy liefde vir ons is. Dit is in ons belang om dit aan te neem en toe te pas, en dit kan tot die ewige lewe lei.—Hebreërs 12:5-11.

19, 20. (a) Waarom moet jy nie dink dat jy buite die bereik van Jehovah se barmhartigheid is as jy oortredings begaan het nie? (b) Wat sal in die volgende artikel bespreek word?

¹⁹ Hoe verkwikkend is dit tog om te weet dat ons ’n God dien wat “vergewensgesind” is! Jehovah sien nie net ons sondes en foute nie (Psalm 130:3, 4). Hy weet ook wat in ons hart is. As jy voel dat jou hart gebroke en verslae is weens vorige oortredings, moet jy nie dink dat jy buite die bereik van Jehovah se barmhartigheid is nie. Ongeag watter foute jy begaan het, as jy waarlik berouvol is, stappe gedoen het om die oortreding reg te stel en vurig om Jehovah se vergifnis gebid het op grond van Jesus se vergote bloed, kan jy volle vertroue hê dat die woorde van 1 Johannes 1:9 op jou van toepassing is: “As ons ons sondes bely, is hy getrou en regverdig om ons ons sondes te vergewe en ons van alle onregverdigheid te reinig.”

²⁰ Die Bybel spoor ons aan om Jehovah se vergifnis na te volg in ons handelinge met mekaar. Maar in watter mate kan daar van ons verwag word om te vergewe en te vergeet wanneer ander teen ons sondig? Dit sal in die volgende artikel bespreek word.

[Voetnoot]

Hoe sou jy antwoord?

◻ Waarom is Jehovah “vergewensgesind”?

◻ Hoe beskryf die Bybel die volkomenheid van Jehovah se vergifnis?

◻ In watter sin vergeet Jehovah wanneer hy vergewe?

◻ Wat verwag Jehovah moet ons doen wanneer ander deur ons sondes benadeel is?

[Prent op bladsy 12]

Wanneer ander deur ons sondes benadeel is, verwag Jehovah dat ons dit regstel