Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • w98 2/1 bl. 29-31
  • Is dit lof of vleiery?

Video nie beskikbaar nie.

Jammer, die video kon nie laai nie.

  • Is dit lof of vleiery?
  • Die Wagtoring kondig Jehovah se Koninkryk aan—1998
  • Onderhofies
  • Soortgelyke materiaal
  • Definisies van lof en vleiery
  • Die skriftuurlike beskouing
  • Vleiery—’n strik
  • Beskerming teen vleiery
  • Lof wanneer iemand dit verdien
  • Loof Jehovah, ons God!
    Sing vir Jehovah
  • Loof Jehovah, ons God!
    ‘Sing met vreugde’ vir Jehovah
  • Hoe om kinders te prys
    Ontwaak!—2015
  • Jongmense, loof Jehovah!
    Die Wagtoring kondig Jehovah se Koninkryk aan—2005
Sien nog
Die Wagtoring kondig Jehovah se Koninkryk aan—1998
w98 2/1 bl. 29-31

Is dit lof of vleiery?

IEMAND sê vir jou: “Jou nuwe haarstyl lyk pragtig!” Is dit lof of vleiery? “Daardie pak klere pas jou goed!” Lof of vleiery? “Dit is die lekkerste maaltyd wat ek nog geëet het!” Is dit lof of vleiery? Wanneer ons sulke komplimente ontvang, wonder ons dalk of dit werklik opreg en waar is en of dit bloot bedoel is om ons tevrede te stel sonder dat die spreker dit noodwendig self glo.

Hoe kan ons vasstel of wat iemand vir ons sê lof of vleiery is? Maak dit saak? Kan ons nie net wat gesê word sonder meer aanvaar en ons verlustig in die plesier wat dit ons verskaf nie? Gestel ons prys ander. Het ons al ooit ons beweegredes ondersoek? Wanneer ons oor hierdie vrae nadink, kan dit ons help om oordeelkundig te wees en om ons tong so te gebruik dat dit Jehovah God tot lof strek.

Definisies van lof en vleiery

Lof word deur Webster’s Dictionary gedefinieer as ’n uitdrukking van goedkeuring of prysing, en die woord kan ook aanbidding of die gee van heerlikheid beteken. Dit is duidelik dat die laaste twee betekenisse net na lof verwys wat tot Jehovah God gerig word. Dit is ’n wesenlike deel van ware aanbidding, soos die geïnspireerde psalmis maan: “Want dit is goed . . . , ja lieflik; ’n loflied is gepas.” “Laat alles wat asem het, die HERE loof!”—Psalm 147:1; 150:6.

Maar dit beteken nie dat mense nie lof mag ontvang nie. Hulle mag in die sin dat hulle geprys, goedgekeur of gunstig beoordeel word. In ’n gelykenis wat Jesus gegee het, sê ’n heer vir sy kneg: “Mooi so, goeie en getroue slaaf!”—Matteus 25:21.

In teenstelling hiermee word vleiery gedefinieer as valse, onopregte of oordadige lof, waar die vleier gewoonlik deur eiebelang gemotiveer word. Die vleier gebruik mooipraatjies of flikflooiery om guns of materiële voordele van iemand anders te verkry of om die persoon ’n verpligting teenoor hom te laat voel. Vleiers word dus deur selfsug beweeg. Volgens Judas 16 “sê [hulle] vleiende dinge van mense om daaruit vir hulleself voordeel te trek”.—NAV.

Die skriftuurlike beskouing

Wat is die skriftuurlike beskouing van lof wat aan mense gegee word? Jehovah stel hierin vir ons ’n voorbeeld om te volg. Die Bybel sê vir ons dat ons lof sal ontvang as ons Jehovah se wil doen. Die apostel Paulus sê dat “elkeen sy lof van God [sal] ontvang”. Petrus sê vir ons dat die beproefde hoedanigheid van ons geloof “’n rede tot lof . . . bevind kan word”. Die feit dat mense lof van Jehovah sal ontvang, toon dus vir ons dat dit ’n goedhartige, liefdevolle en voordelige daad is om ander opreg te prys, iets wat nie oor die hoof gesien moet word nie.—1 Korintiërs 4:5; 1 Petrus 1:7.

Volgens die Bybel kan ons ook lof van die regeringsowerhede ontvang, wat ons goeie gedrag sien en ons opreg prys. “Hou aan om goed te doen”, word ons vertel, “en jy sal lof van hom ontvang” (Romeine 13:3). Ons ontvang moontlik ook lof van mense wat dit opreg bedoel en wat geen bedekte beweegrede het wanneer hulle ons prys nie. Die geïnspireerde Skrif sê in Spreuke 27:2: “Laat ’n ander jou prys en nie jou eie mond nie.” Dit toon dat dit gepas is om lof van mense te aanvaar.

Dit is nie die geval wanneer jy ander vlei of self gevlei word nie. Waarom word Jehovah so deur vleiende spraak mishaag? In die eerste plek is dit onopreg, en Jehovah veroordeel onopregtheid. (Vergelyk Spreuke 23:6, 7.) Verder is dit nie eerlik nie. Waar die psalmis mense beskryf wat God se misnoeë verdien, sê hy: “Hulle praat leuens, die een met die ander; met vleiende lippe spreek hulle dubbelhartig. Mag die HERE al die vleiende lippe uitroei.”—Psalm 12:3, 4.

Bowenal is vleiery liefdeloos. Dit word deur selfsug aangedryf. Nadat die psalmis Dawid van die vleiers gepraat het, haal hy hulle woorde aan: “Met ons tong is ons sterk; ons lippe is met ons! Wie is heer oor ons?” Jehovah beskryf sulke selfsugtige mense as ‘verdrukkers van die ellendiges’. Hulle het hulle vleiende tonge nie gebruik om ander op te bou nie, maar om hulle te verdruk en ellende vir hulle te veroorsaak.—Psalm 12:5, 6.

Vleiery—’n strik

“’n Man wat sy naaste vlei, sprei ’n net uit voor sy voetstappe.” Dit is die wyse koning Salomo se woorde, en hoe waar is dit tog nie! (Spreuke 29:5). Die Fariseërs het met vleiery vir Jesus ’n strik probeer span. Hulle het gesê: “Leermeester, ons weet dat u waaragtig is en die weg van God in waarheid leer en u aan niemand steur nie, want u sien nie mense se uiterlike aan nie.” Hoe vleiend het dit nie geklink nie! Maar Jesus is nie deur hulle gladde woorde om die bos gelei nie. Hy het geweet dat hulle nie sy waaragtige leer glo nie, maar dat hulle hom net probeer verstrik het in sy woorde oor die betaling van belasting aan Caesar.—Matteus 22:15-22.

Die eerste-eeuse koning Herodes het ’n skerp teenstelling met Jesus gevorm. Toe hy mense in die stad Sesarea toegespreek het, het hulle gesê: “’n God se stem en nie ’n mens s’n nie!” In plaas van die mense te bestraf vir sulke onbeskaamde, valse lof, het Herodes die vleiery aanvaar. Jehovah se engel het Herodus oombliklik vergeld deur hom met ’n wurmbesmetting te tref wat tot sy dood gelei het.—Handelinge 12:21-23.

’n Ryp Christen sal wakker wees om te sien wat agter vleiery skuil. Gemeentelike ouer manne moet veral versigtig wees wanneer iemand wat by ’n regterlike saak betrokke is, oorloop van bewondering, deur moontlik selfs die een ouer man met ’n ander te vergelyk en vir die een met wie hy praat te sê dat hy meer goedhartigheid en empatie betoon as die ander.

Die Bybel toon duidelik tot watter ander slaggat vleiery kan lei waar dit beskryf hoe ’n jong man deur ’n verleidster verlok word om onsedelik te wees (Spreuke 7:5, 21). Hierdie waarskuwing is ook vandag ter sake. Onder diegene wat elke jaar uit die Christengemeente gesit word, word baie weens onsedelike gedrag uitgesit. Het vleiery dalk iets daarmee te doen dat hulle in ernstige sonde verval het? Aangesien mense so graag komplimente wil ontvang en hoë agting wil geniet, kan die gladde woorde van vleiende lippe ’n Christen se weerstand teen verkeerde gedrag verlaag. Wanneer ’n mens nie daarteen waak nie, kan dit ernstige gevolge hê.

Beskerming teen vleiery

Vleiery streel die eieliefde of ydelheid van die een wat gevlei word. Dit is geneig om iemand ’n oordrewe beskouing van sy eie waarde te gee en laat hom in een of ander opsig verhewe bo ander voel. Die filosoof François de la Rochefoucauld het vleiery met vervalste geld vergelyk, wat “glad nie sou versprei het as dit nie vir ydelheid was nie”. ’n Mens moet jou dus beskerm deur op die apostel Paulus se reguit vermaning ag te slaan: “Ek [sê] vir elkeen daar onder julle om nie meer van homself te dink as wat dit nodig is om te dink nie, maar om só te dink dat hy ’n gesonde verstand het, elkeen na die maat van geloof wat God hom toebedeel het.”—Romeine 12:3.

Hoewel ons van nature dinge wil hoor wat ons ore streel, het ons in werklikheid meestal Bybelse raad en dissipline nodig (Spreuke 16:25). Koning Agab wou net hoor wat hom behaag het; sy diensknegte het selfs die profeet Miga gevra om sy woord te laat wees “soos die woord van een van hulle [Agab se vleiende profete], en spreek goeie dinge” (1 Konings 22:13). As Agab bereid was om na reguit woorde te luister en sy opstandige weë te verander, kon hy voorkom het dat Israel die verskriklike gevegsverliese ly en dat hy self sterf. Ter wille van ons eie geestelike welstand moet ons gou wees om te reageer op die streng, dog liefdevolle raad van die aangestelde Christen- ouer manne, wat ons wil help om eerder op die reguit pad van waarheid te bly as om mense uit te soek wat ons bly vertel hoe wonderlik ons is deur ons ore met vleiende woorde te streel!—Vergelyk 2 Timoteus 4:3.

Christene sal hulle nooit, om enige rede, tot vleiery wil wend nie. Soos getroue Elihu bid hulle vasbeslote: “Ek wil nie partydig wees nie; en ’n mens vlei, sal ek nie. Want ek verstaan nie om te vlei nie; gou sou my Maker my wegneem!” Dan sal hulle soos Paulus kan sê: “Ons het . . . nooit met vleitaal gekom of met ’n voorwendsel vir hebsug nie.”—Job 32:21, 22; 1 Tessalonisense 2:5, 6.

Lof wanneer iemand dit verdien

Die geïnspireerde spreuk toon dat lof as ’n toetssteen kan dien en sê: “Die smeltpot is vir silwer en die smeltkroes vir goud, maar lof toets die geaardheid” (Spreuke 27:21, The New English Bible). Ja, lof kan meerderwaardige gevoelens of trots bevorder, wat tot iemand se ondergang sal lei. Daarteenoor kan dit toon dat hy beskeie en nederig is as hy erken dat hy aan Jehovah dank verskuldig is vir enigiets wat hy gedoen het waarvoor hy lof ontvang.

Opregte lof vir goeie gedrag of prestasies bou die gewer sowel as die ontvanger op. Dit dra by tot innige en heilsame waardering vir mekaar. Dit moedig ’n mens aan om lofwaardige doelwitte na te streef. As jongmense lof verdien en dit ontvang, kan dit hulle aanspoor om harder te werk. Dit kan hulle karakter help vorm namate hulle probeer om ooreenkomstig die standaarde te lewe wat vir hulle gestel word.

Laat ons dus vleiery vermy—hetsy ons ander vlei of gevlei word. Laat ons nederig wees wanneer ons lof aanvaar. En laat ons vrygewig en heelhartig wees wanneer ons lof aan ander gee—gereeld aan Jehovah in ons aanbidding en opreg aan ander deur hulle op heilsame wyse te prys en te waardeer, terwyl ons onthou “hoe goed . . . ’n woord op sy tyd” is!—Spreuke 15:23.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel