Hulle het nie vir hulle ’n beroemde naam gemaak nie
DIE Bybel noem nie die bouers van die berugte toring van Babel by name nie. Die verslag lui: “En hulle sê: Kom, laat ons vir ons ’n stad bou en ’n toring waarvan die spits tot aan die hemel reik; en laat ons vir ons ’n [“beroemde”, NW] naam maak, sodat ons nie oor die hele aarde verstrooid raak nie.” (Ons kursiveer.)—Genesis 11:4.
Wie was “hulle”? Hierdie gebeurtenis het ongeveer 200 jaar ná die Vloed plaasgevind. Teen dié tyd het Noag, wat omtrent 800 jaar oud was, saam met duisende van sy afstammelinge gelewe. Hulle het almal dieselfde taal gepraat en saamgewoon in die omgewing waar hy en sy seuns hulle ná die Vloed gevestig het (Genesis 11:1). Op die een of ander tydstip het ’n deel van hierdie uitgebreide bevolking ooswaarts getrek en ‘’n laagte in die land Sinear gevind’.—Genesis 11:2.
’n Volslae mislukking
Dit was in hierdie laagte dat die groep besluit het om teen God in opstand te kom. Hoe so? Wel, Jehovah God het sy voorneme uitgespreek toe hy die eerste mensepaar beveel het: “Wees vrugbaar en vermeerder en vul die aarde” (Genesis 1:28). Dit is ná die Vloed weer aan Noag en sy seuns gesê. God het hulle die opdrag gegee: “Maar julle, wees vrugbaar en vermeerder; wemel op die aarde en vermeerder daarop” (Genesis 9:7). In verset teen Jehovah se bevel het die volk ’n stad gebou sodat hulle “nie oor die hele aarde verstrooid [sou] raak nie”.
Hierdie mense het ook ’n toring begin bou met die doel om vir hulle “’n [“beroemde”, NW] naam” te maak. Maar anders as wat hulle verwag het, het hulle nie die toring klaar gebou nie. Die Bybelverslag toon dat Jehovah hulle taal verwar het sodat hulle mekaar nie kon verstaan nie. Die geïnspireerde verslag sê: “So het die HERE hulle dan daarvandaan oor die hele aarde verstrooi; en hulle het opgehou om die stad te bou.”—Genesis 11:7, 8.
Die totale mislukking van hierdie onderneming word toegelig deur die feit dat die name van die bouers nooit ‘beroemd’ of welbekend geword het nie. Hulle name is in werklikheid onbekend en is uit die mensegeskiedenis gewis. Maar wat van Nimrod, Noag se agterkleinseun? Was hy nie die leier van hierdie opstand teen God nie? Is sy naam nie welbekend nie?
Nimrod—’n verwaande rebel
Nimrod was ongetwyfeld die belhamel. Genesis hoofstuk 10 stel hom bekend as “’n geweldige jagter voor die aangesig van die HERE” (Genesis 10:9). Die Skrif sê ook dat ‘hy begin het om ’n geweldenaar op aarde te wees’ (Genesis 10:8). Nimrod was ’n stryder, ’n man van geweld. Hy het die eerste menseheerser ná die Vloed geword en het homself as koning aangestel. Nimrod was ook ’n bouer. Die Bybel toon dat hy die stigter van agt stede was, met inbegrip van Babel.—Genesis 10:10-12.
Nimrod—’n teenstander van God, ’n koning van Babel en ’n bouer van stede—het dus ongetwyfeld ’n aandeel daaraan gehad om die toring van Babel te bou. Het hy nie vir hom ’n beroemde naam gemaak nie? Die Oriëntalis E. F. C. Rosenmüller het omtrent die naam Nimrod geskryf: “Die naam is gegee aan Nimrod, afgelei van [ma·radhʹ], ‘hy het gerebelleer’, ‘hy het afvallig geword’, volgens die Hebreeuse betekenis.” Dan verduidelik Rosenmüller dat “dit dikwels die gewoonte van Oosterlinge is om hulle edelmanne by name te noem wat ná hulle dood gegee is, en daarom is daar soms ’n verbasende ooreenkoms tussen name en die dinge wat gedoen is”.
Etlike geleerdes is dit eens dat die naam Nimrod nie ’n naam is wat by geboorte aan hom gegee is nie. Hulle beskou dit eerder as ’n naam wat later gegee is om by sy opstandige karakter te pas nadat dit duidelik geword het. C. F. Keil sê byvoorbeeld: “Die naam op sigself, Nimrod afgelei van [ma·radhʹ], ‘ons sal in opstand kom’, dui op die een of ander gewelddadige verset teen God. Dit is so kenmerkend dat slegs sy tydgenote hom dit kon gegee het, en dit het sodoende ’n eienaam geword.” In ’n voetnoot haal Keil die geskiedkundige Jacob Perizonius aan wat geskryf het: “Ek glo stellig dat hierdie man [Nimrod], as ’n wrede jagter en omring van ’n bende medestryders, altyd daardie woord ‘nimrod, nimrod’, dit wil sê ‘Laat ons rebelleer! Laat ons rebelleer!’ in sy mond gehad en herhaal het om die res tot opstand op te sweep. Gevolglik het ander, en selfs Moses, later daardie woord as ’n eienaam vir hom gebruik.”
Dit is duidelik dat Nimrod nie vir hom ’n beroemde naam gemaak het nie. Die naam wat hy by geboorte gekry het, is klaarblyklik onbekend. Dit is uit die geskiedenis uitgewis, net soos die name van diegene wat sy leiding gevolg het. Hy het nie eers ’n nageslag agtergelaat om sy naam te dra nie. In plaas van heerlikheid en roem te ontvang, het hy berugtheid verwerf. Die naam Nimrod het hom vir altyd gebrandmerk as ’n verwaande rebel wat Jehovah God dwaaslik uitgedaag het.