“Die waarheid sal julle vrymaak”
“Julle sal die waarheid ken, en die waarheid sal julle vrymaak”. Dit was Jesus se woorde toe hy die menigtes in die tempel in Jerusalem onderrig het (Johannes 8:32). Jesus se apostels kon maklik Jesus se leringe as die waarheid identifiseer. Hulle het oorvloedige bewyse van hulle leermeester se Goddelike oorsprong gesien.
MAAR vandag vind party dit dalk moeilik om die waarheid waarvan Jesus gepraat het te identifiseer. Soos in die dae van die profeet Jesaja is daar vandag mense “wat sleg goed noem en goed sleg, wat die duisternis lig maak en die lig duisternis, wat bitter soet maak en soet bitter” (Jesaja 5:20). Met soveel opvattings, filosofieë en lewenstyle wat deesdae bevorder word, voel baie mense dat alles relatief is en dat daar nie so iets soos waarheid is nie.
Toe Jesus vir sy toehoorders gesê het dat die waarheid hulle sou vrymaak, het hulle geantwoord deur te sê: “Ons is Abraham se nageslag en ons was nog nooit enigiemand se slawe nie. Hoe is dit dat jy sê: ‘Julle sal vry word’?” (Johannes 8:33). Hulle het nie gevoel dat hulle iemand of iets nodig gehad het om hulle vry te maak nie. Maar toe het Jesus verduidelik: “Voorwaar, voorwaar, ek sê vir julle: Elkeen wat sonde doen, is ’n slaaf van die sonde” (Johannes 8:34). Die waarheid waarvan Jesus gepraat het, kan die weg baan tot vryheid van sonde. Jesus het gesê: “As die Seun julle dan vrymaak, sal julle werklik vry wees” (Johannes 8:36). Die waarheid wat mense vrymaak, is dus die waarheid aangaande Jesus Christus, die Seun van God. Dit is slegs deur geloof in die offerande van Jesus se volmaakte menselewe dat enigiemand van die sonde en die dood vrygemaak kan word.
By ’n ander geleentheid het Jesus gesê: “Heilig hulle deur middel van die waarheid; u woord is waarheid” (Johannes 17:17). Die woord van God soos dit in die Bybel opgeteken is, is die waarheid wat tot vryheid van bygelowigheid en valse aanbidding kan lei. Die Bybel bevat die waarheid aangaande Jesus Christus, wat mense beweeg om geloof in hom te stel en wat hulle ’n blink hoop vir die toekoms bied. Dit is iets wonderliks om die waarheid van God se Woord te leer ken!
Hoe noodsaaklik is dit dat ’n mens die waarheid ken? Hoewel baie godsdienste van vandag beweer dat hulle die Bybel volg, word hulle in groot mate deur filosofieë en tradisies van mense beïnvloed. Dit lyk dikwels of godsdiensleiers meer besorg is oor hoe hulle boodskap deur die massa aanvaar word as oor die akkuraatheid daarvan. Party voel dat God met enige vorm van aanbidding tevrede is, solank dit opreg is. Maar Jesus Christus het verduidelik: “Die uur [kom], en dit is nou, wanneer die ware aanbidders die Vader met gees en waarheid sal aanbid, want die Vader soek inderdaad sulke mense om hom te aanbid.”—Johannes 4:23.
As ons God op aanneemlike wyse wil aanbid, moet ons die waarheid ken. Dit is ’n belangrike saak. Ons ewige geluk hang daarvan af. Almal behoort hulle dus af te vra: ‘Is my manier van aanbidding vir God aanneemlik? Stel ek werklik daarin belang om die waarheid van God se Woord te leer? Of is ek bang vir wat ’n sorgvuldige ondersoek aan die lig kan bring?’