Aanbid God met waarheid

Aanbidding moet op die waarheid gegrond wees voor dit vir God aanneemlik is (Johannes 4:23). Die Bybel identifiseer ware aanbidders as mense wat aan “die gemeente van die lewende God . . . , ’n pilaar en stut van die waarheid”, behoort (1 Timoteus 3:15). Diegene wat die gemeente van God uitmaak, glo nie net die waarheid van God se Woord nie, maar lewe ook in ooreenstemming daarmee, verdedig dit en maak dit regoor die aarde bekend.—Matteus 24:14; Romeine 10:9-15.

JEHOVAH SE GETUIES is bekend vir hulle Bybelonderrigtingswerk, wat nou in meer as 200 lande gedoen word. Hulle bestudeer die Bybel en leer dit aan ander as die waarheid, sonder om die ondermynende invloed van menslike filosofieë by te voeg. Is jy bekend met hulle Bybelse leringe? Baie huiwer om na Jehovah se Getuies te luister as gevolg van die negatiewe inligting wat oor hulle versprei word. Maar opregtes van hart word genooi om self te besluit of dit wat die Getuies verkondig die waarheid is of nie. So ’n belangrike besluit moet nie op hoorsê gebaseer wees nie. Baie wat self ondersoek ingestel het na die leringe van Jehovah se Getuies het werklik daarby baat gevind.

Kennis van die waarheid verdryf vrees

Beskou byvoorbeeld die geval van Eugenia. Sy is in ’n streng Katolieke huis grootgemaak. Haar pa was een van die organiseerders van die pous se besoek aan Mexiko in 1979. Terwyl Eugenia by vriende gekuier het, het sy met Jehovah se Getuies in aanraking gekom. Met hulle hulp het sy ’n noukeuriger ondersoek begin doen na wat die Bybel sê. Sy dink terug en sê: “Aanvanklik het ek bang geword. Ek het die waarheid gevind! Maar dit het beteken dat die meeste van my vorige opvattings verkeerd was. My familie, my vriende, mense vir wie ek lief was—hulle was almal verkeerd. Ek was senuweeagtig. Ek het myself bly afvra hoe my familie sou reageer op wat ek pas ontdek het. Met verloop van tyd en met Jehovah se hulp het ek my by hierdie oorweldigende gevoel begin aanpas. Eendag het ek besluit om ’n huisvriend, ’n teologieprofessor, in my vertroue te neem. Ek het vir hom alles vertel van my begeerte om die waarheid te vind. Toe het hy gesê: ‘As jy die waarheid wil ken, soek Jehovah se Getuies op.’”

Soos Eugenia gevrees het, het haar familie haar uit die huis gesit. Maar die Getuies het aangehou om vir haar geestelike hulp te gee. Sy sê: “Ek is versterk sodat ek my standpunt kon inneem vir die waarheid. Ek het besef dat dit iets was waarvoor dit die moeite werd is om te veg. Die manier waarop Jehovah se Getuies my verwelkom het, was so belangrik. Ek het in die Christengemeente gevoel dat mense my liefhet. Toe ek nader aan God se organisasie gekom het, het dit my gehelp om die vrees om alleen my standpunt in te neem te oorkom.”

Neem nog ’n voorbeeld. Sabrina het in ’n gesin grootgeword wat die gebruik gehad het om gereelde Bybelbesprekings te hê. Hulle het in werklikheid ’n vorm van ‘gesinsgodsdiens’ ontwikkel. Sy het ’n gewoonte daarvan gemaak om met lede van verskillende godsdienste te assosieer om hulle foute bloot te lê. Toe een van Jehovah se Getuies haar ’n Bybelstudie aangebied het, het sy geredelik daartoe ingestem omdat sy hulle opvattings wou weerlê. Sy sê: “Nadat ek meer as ’n jaar lank gestudeer het, het ek bang geword dat ek ‘my waarheid’ sou verloor. Dit was vir my maklik om die valsheid van al die godsdienste waarby ek betrokke geraak het, uit te wys, maar hierdie keer was dit nie so maklik nie.”

Sabrina se vrees het daartoe gelei dat sy haar Bybelstudie met Jehovah se Getuies gestaak het. Maar toe het sy geestelik leeg gevoel. Sy het besluit om die studie te hervat en het uiteindelik hierdie nuutgevonde waarheid aangeneem. Sabrina het die stadium bereik waar sy ander wou vertel van wat sy geleer het. Sy het selfs gevra of sy saam met die Getuies in hulle bediening van huis tot huis kon gaan. Sabrina verduidelik: “Voordat ek toegelaat is om saam met Jehovah se Getuies aan die predikingswerk deel te neem, is ek gevra: ‘Wil jy werklik een van Jehovah se Getuies wees?’ ‘Nee!’ het ek geantwoord. Ek is weer met vrees vervul.” Uiteindelik, nadat Sabrina ’n ruk lank daarmee volgehou het om al die vergaderinge by te woon en sy God se volk waargeneem het en gesien het hoe hulle Bybelbeginsels toepas, het sy tot die slotsom gekom dat dit werklik die waarheid is. Sy is gedoop en is nou ’n voltydse evangeliedienaar.

Waarom so anders?

Iemand vra dalk: ‘Waarom is die leringe van Jehovah se Getuies so anders as dié van ander godsdienste?’ ’n Kykie na wat die Getuies glo, sal jou help om te sien dat hulle opregte Christene en pligsgetroue Bybelstudente is. Ons wil jou aanmoedig om die tekste in die opsomming van hulle basiese oortuigings hierbo in jou eie Bybel na te slaan.

Deur nader ondersoek in te stel na wat Jehovah se Getuies glo en te sien hoe hulle getrou bly aan wat die Bybel leer, kan jy geseën word met die vryheid wat die waarheid bied (Johannes 17:17). Daar is geen rede om die waarheid te vrees nie. Onthou Jesus se belofte: “Julle sal die waarheid ken, en die waarheid sal julle vrymaak.”—Johannes 8:32.

[Venster op bladsy 6]

’N PAAR BASIESE OORTUIGINGS VAN JEHOVAH SE GETUIES

◯ Jehovah is die almagtige God. Sy persoonlike naam verskyn meer as 7000 keer in die vroegste manuskripte van die Bybel.—Psalm 83:18, NW.

◯ Jesus Christus is God se Seun, wat aarde toe gekom het om sy lewe vir die mensdom te gee (Johannes 3:16, 17). Jehovah se Getuies volg die leringe van Jesus Christus soos in die Evangelies vervat.

◯ Die naam Jehovah se Getuies is gebaseer op Jesaja 43:10, wat sê: “Julle is my getuies, spreek [Jehovah, NW].”

◯ Die Koninkryk waarvoor mense bid in die “Onse Vader” is ’n hemelse regering wat binnekort alle lyding en pyn wat in die wêreld is, gaan wegneem om die weg te berei vir die Paradys wat die Bybel beloof.—Jesaja 9:5, 6; Daniël 2:44; Matteus 6:9, 10; Openbaring 21:3, 4.

◯ Elkeen wat die wil van God doen, het die geleentheid om die Koninkrykseëninge vir ewig te geniet.—Johannes 17:3; 1 Johannes 2:17.

◯ Christene moet hulle gedrag skik na wat die Bybel sê. Hulle moet daarna streef om eerlik te wees, ’n skoon, sedelike lewe te lei en liefde aan hulle naaste te betoon.—Matteus 22:39; Johannes 13:35; 1 Korintiërs 6:9, 10.

[Prent op bladsy 5]

Jehovah se Getuies maak Bybelwaarheid aan mense in meer as 200 lande bekend