Jongmense wat ‘op Jehovah vertrou’
DIT is nie net jongmense wat skoonheid of bejaardes wat wysheid besit nie. (Vergelyk Spreuke 11:22; Prediker 10:1.) Diegene wat blywende skoonheid en ware wysheid besit, is eerder húlle wat op Jehovah vertrou en heelhartig van hom sê: “U is my God.”—Psalm 31:15; Spreuke 9:10; 16:31.
Reg rondom die wêreld is daar ’n toenemende skare pragtige mense, jonk sowel as oud, wat hulle wysheid openbaar deur God te dien en die goeie nuus van God se Koninkryk te verkondig. Beskou byvoorbeeld die agtjarige Sabrina.
Sabrina woon in Duitsland en is in graad twee. Sy is die eerste Getuie van Jehovah in haar skool. Ongelukkig was sy die skyf van haar skoolmaats se beledigings totdat die onderwyseres die kinders eendag gevra het om hulle gunstelingboek skool toe te bring. Sabrina het besluit om My boek met Bybelverhale te bring. Hoewel sy senuweeagtig was, het sy die vorige aand goed voorberei vir die klas. Aangesien daar 26 kinders in haar klas is, het sy geweet dat sy waarskynlik nie veel tyd sou hê nie. Maar sy was vasbeslote dat niemand haar aanbieding sou onderbreek nie en was seker dat Jehovah haar sou help. Op die bepaalde dag het die onderwyseres gevra wie ’n boek saamgebring het en wie syne eerste wou wys. Verbasend genoeg het net Sabrina een gebring. Sy het voor die klas gaan staan en begin praat, uit die boek gelees en vir hulle prente daarin gewys en verduidelik dat alles op die Bybel gebaseer is. Toe sy klaar was, het sy gevra: “Wie wil graag so ’n boek hê?” Sy het vir die onderwyseres een gegee, en gedurende die volgende paar dae het sy nog tien boeke onder haar klasmaats versprei. Al wat die onderwyseres oor haar aanbieding gesê het, was: “Ek het nog nooit so iets gesien nie.” Sy het Sabrina ’n A vir haar werk gegee.
Ja, daar is talle jong Getuies wat vreugdevolle verkondigers van die goeie nuus by die skool is. Nog ’n voorbeeld is Erika, ’n 11-jarige verkondiger in Mexiko. Sy is van kleins af geleer om Jehovah lief te hê. Haar skoolwerk is uitstekend. Vir een van haar take moes sy inligting oor vigs en tabak- en alkoholverslawing voorberei. Sy het met behulp van die Ontwaak! goed voorberei en die hoogste punte gekry. Haar onderwyseres het gevra waar sy die inligting gekry het en sy het haar die tydskrifte gegee waarin die artikels oor daardie onderwerpe verskyn het. Later het die onderwyseres hierdie tydskrifte gebruik om die onderwerpe met die hele klas te bespreek. Vanweë Erika se gedrag, haar respek vir haar onderwysers en haar hoë punte het sy al geskenke, diplomas en gedeeltelike studiebeurse ontvang. Sy meen nietemin dat haar grootste prestasies is dat sy haar as een van Jehovah se Getuies geidentifiseer het, Bybellektuur kon versprei en God se naam verheerlik het.
Dan is daar Shannon, ’n tienjarige seuntjie wat in Nieu-Seeland woon. Hy het net een oog; hy het die ander een weens kanker verloor toe hy ’n baba was. Toe Shannon sewe was, het sy ma die Bybel saam met Jehovah se Getuies begin studeer. Maar kort nadat sy met haar Bybelstudies begin het, het sy met ’n man begin saamleef sonder om met hom te trou en besluit om op te hou studeer. Shannon het gesmeek dat hy met sy Bybelstudie kon voortgaan. Sy wens is vervul. Die Getuies het hulle bly besoek, en uiteindelik het al drie lede van die gesin die Bybel begin bestudeer en geestelik vooruitgang gemaak. Nadat Shannon se ma en stiefpa wettig getroud is, is hulle gedoop.
Eendag het Shannon en die kringopsiener se vrou saam velddiens gedoen. ’n Huisbewoner het vir Shannon gevra: “Wat het met jou oog gebeur?” “Ek het kanker in hom gekry en toe moes hulle hom uithaal”, het hy geantwoord. “Jehovah gaan my binnekort in die Paradys ’n nuwe oog gee, en ons is hier om u van daardie Paradys te vertel.”