Vasbeslote om God se weg van die lewe te volg
Diegene wat God wil dien, het baie by die “God se weg van die lewe”-streekbyeenkomste geleer! Een byeenkomsganger het die byeenkoms beskryf as “’n wonderlike tyd van onderrigting, opbouing en verligting”.
’N ANDER byeenkomsganger het gesê dat “daar soveel was om te geniet, om oor na te dink, om in te neem”. Kom ons kyk nou na die program self.
Jesus Christus—die weg, die waarheid en die lewe
Dit was die tema van die eerste dag van die byeenkoms (Johannes 14:6). Die eerste toespraak het die doel van die byeenkoms uiteengesit: om verder geleer te word van die beste weg moontlik, God se weg. Jehovah leer sy volk hoe om op sy weg te wandel. Hy doen dit deur die Bybel, “die getroue en verstandige slaaf” en die heilige gees (Matteus 24:45-47; Lukas 4:1; 2 Timoteus 3:16). Wat ’n voorreg is dit tog om deur die Soewerein van die heelal onderrig te word!
In ooreenstemming met die tema vir die dag was die programrede “Christus se losprys—God se middel tot redding”. As ’n mens volgens God se weg wil lewe, is dit noodsaaklik om te besef watter rol Jesus Christus in Jehovah se voorneme speel. Die spreker het gesê: “Sonder die losprysofferande van Jesus Christus kan geen mens, ongeag wat hy glo of wat hy doen, die ewige lewe van God ontvang nie.” Hy het toe Johannes 3:16 aangehaal, wat sê: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê.” Om geloof in Christus se losprysofferande te beoefen, vereis dat ons tot ’n juiste kennis van die waarheid kom. Dit behels ook dat ons ons lewe aan Jehovah toewy, dit deur waterdoop simboliseer en lewe in ooreenstemming met die voorbeeld wat Jesus Christus vir ons gelaat het.—1 Petrus 2:21.
Die middagsessie het begin met ’n toespraak met die titel “Die weg van die liefde faal nooit nie”. Dit het ’n vers-vir-vers-bespreking ingesluit van Paulus se roerende beskrywing van liefde, wat in 1 Korintiërs 13:4-8 opgeteken is. Die gehoor is daaraan herinner dat selfopofferende liefde ’n kenmerk van die ware Christelike godsdiens is en dat liefde vir God en naaste noodsaaklike kenmerke is van aanbidding wat deur Jehovah goedgekeur word.
Daarna was daar ’n driedelige simposium met die titel “Ouers—Skerp God se weg by julle kinders in”. Ouers kan hulle kinders help om God te dien as hulle ’n goeie voorbeeld stel deur sy Woord te lees en te bestudeer. Hulle kan die waarheid by hulle kinders inskerp deur gereelde gesinstudie, wat aangepas word om in die gesin se behoeftes te voorsien. Dit is ook belangrik om kinders te help om by gemeentelike bedrywighede en die veldbediening betrokke te raak. Hoewel dit ’n uitdaging is om godvresende kinders in hierdie bose wêreld groot te maak, kan dit groot seëninge meebring.
Ná hierdie simposium was die toespraak “Laat Jehovah jou vir eervolle gebruik vorm”. Net soos ’n pottebakker ’n kleivoorwerp vorm, so vorm God diegene wat hom graag wil dien (Romeine 9:20, 21). Hy doen dit deur raad te gee in sy Woord en deur sy organisasie. Jehovah sal ons help om ons vermoëns ten volle te gebruik as ons ons beskikbaar stel, van geleenthede gebruik maak en toelaat dat hy ons voetstappe rig.
’n Opwindende deel van die program het nou gevolg—“Diens in die sendingveld”. Tans is daar 2 390 Christenbedienaars in 148 lande regoor die aarde wat as sendelinge beskou word. Hulle is ’n uitstekende voorbeeld van lojaliteit en ywer en is opreg dankbaar vir die voorreg wat hulle het om in die buiteland te dien. By die internasionale byeenkomste het sendelinge gedurende hierdie deel van die program vertel watter uitdagings en vreugdes die sendinglewe bied.
Die slottoespraak op die eerste dag het die volgende titel gehad: “Is daar lewe ná die dood?” Die mens wonder al millenniums lank oor hierdie vraag. Mense in elke gemeenskap het oor die onderwerp gepeins. Daar is geen tekort aan sogenaamde antwoorde nie. Dit is so uiteenlopend soos die gebruike en godsdienste van diegene wat die antwoorde gee. Maar mense moet die waarheid leer.
Vervolgens het die spreker die vrystelling aangekondig van die kleurvolle nuwe brosjure met 32 bladsye Wat gebeur met ons wanneer ons sterf? Hierdie brosjure verduidelik waar die leerstelling van die onsterflikheid van die siel vandaan kom en toon hoe hierdie konsep die kern van byna al die godsdienste van die hedendaagse wêreld geword het. Op ’n duidelike en treffende manier ondersoek dit wat die Bybel oor die siel sê, waarom ons sterf en wat met ons gebeur wanneer ons sterf. Die brosjure verduidelik ook watter hoop daar vir die dooies en die lewendes is. Watter seëning sal hierdie publikasie tog vir waarheidsoekers regoor die aarde wees!
Let voortdurend streng op hoe julle wandel
Wat ’n gepaste tema was dit tog vir die byeenkoms se tweede dag! (Efesiërs 5:15). Die oggendprogram het die aandag gevestig op die predikings- en dissipelmaakwerk. Ná ’n bespreking van die dagteks is die program voortgesit met die toespraak “Help mense om op die weg na die lewe te kom”. Terwyl ons hierdie dringende werk doen, is dit belangrik om ’n positiewe gesindheid te hê en te besef dat dit ’n voorreg en ’n plig is om die waarheid aan ander te verkondig. In die eerste eeu G.J. het die meeste mense die Woord van God verwerp. Maar ten spyte van teenstand was daar diegene ‘wat die regte gesindheid vir die ewige lewe gehad het en gelowiges geword het’ (Handelinge 13:48, 50; 14:1-5). Die situasie is vandag dieselfde. Hoewel baie mense Bybelwaarheid verwerp, hou ons aan om te soek na diegene wat gunstig sal reageer.—Matteus 10:11-13.
Die volgende toespraak het die uitdaging bespreek om ander met die boodskap van die lewe te bereik. Aangesien dit nou moeiliker is om mense tuis te vind, moet ons deeglik en vindingryk wees as ons soveel mense moontlik met die Koninkryksboodskap wil bereik. In baie lande behaal verkondigers van die goeie nuus uitstekende resultate met telefoongetuieniswerk en deur in sakegebied te werk, en sodoende bereik hulle diegene met wie hulle andersins nie maklik in aanraking kan kom nie.
Die toespraak met die titel “Leer dissipels alles wat Christus beveel het” het getoon hoe belangrik dit is om vaardig in ons bediening te word. Ons onderrigvermoë word verbeter as ons by ander leer en die uitstekende opleiding toepas wat ons by gemeentelike vergaderinge ontvang. Namate ons vaardiger in ons bediening raak, put ons meer vreugde en bevrediging uit ons werk om mense te help om Bybelwaarheid te leer.
Die oggendsessie het geëindig met ’n toespraak oor die betekenis van toewyding en doop. Een van die punte wat die spreker gestel het, is dat God ons sal seën en onderskraag as ons ten volle op hom vertrou en in alle erns sy wil probeer doen. Die wyse man het geskryf: “Ken [God] in al jou weë, dan sal Hý jou paaie gelykmaak” (Spreuke 3:6). Die vreugdevolle doop was self ’n hoogtepunt van die byeenkoms wat getoon het dat baie volgens God se weg begin lewe het.
Ná ’n middagpouse het die middagsessie begin met die toespraak “Dien met eindelose lewe in die vooruitsig”. God se voorneme dat gehoorsame mense hom vir ewig op die aarde dien, sal vervul word. Hoe gepas is dit dan dat ons ons denke, planne en verwagtinge daarop gerig hou om Jehovah met die ewigheid in die vooruitsig te dien! Hoewel ons “die dag van Jehovah” goed in gedagte wil hou, is dit noodsaaklik om te onthou dat dit ons doel is om vir ewig te dien (2 Petrus 3:12). Die feit dat ons nie die presiese tyd weet wanneer Jesus God se wraak gaan uitoefen nie, hou ons waaksaam en gee ons daagliks geleenthede om te bewys dat ons Jehovah met onselfsugtige beweegredes dien.
Die twee toesprake wat gevolg het, het die 4de hoofstuk van Paulus se brief aan die Efesiërs bespreek. Van die dinge wat bespreek is, is die seëning wat ons het van “gawes in die vorm van mense”, geestelik bekwame manne wat deur heilige gees aangestel is. Hierdie ouer manne voorsien raad en leiding tot ons geestelike voordeel. Paulus se geïnspireerde brief spoor Christene ook aan om hulle met “die nuwe persoonlikheid” te beklee (Efesiërs 4:8, 24). ’n Godvrugtige persoonlikheid sluit eienskappe soos medelye, goedhartigheid, ootmoed, sagmoedigheid, lankmoedigheid en liefde in.—Kolossense 3:12-14.
As ons voortdurend streng wil let op hoe ons wandel, moet ons ons sonder vlek van die wêreld bewaar—die onderwerp van die volgende toespraak. Balans is nodig in ons keuse van vermaak, sosiale bedrywighede en materiële strewes. Deur die raad in Jakobus 1:27 toe te pas om ons sonder vlek van die wêreld te bewaar, geniet ons ’n rein posisie voor God en ’n goeie gewete. Ons kan ook ’n sinvolle lewe hê en sal geseën word met vrede, geestelike voorspoed en wonderlike vriende.
Toe was daar ’n driedelige simposium met die titel “Jongmense—Volg God se weg”. Aangesien jongmense weet dat God hulle liefhet en hulle pogings waardeer om ware aanbidding te handhaaf, moet hulle hulle waarnemingsvermoëns oefen om hom getrou te dien. Een manier waarop waarnemingsvermoëns ontwikkel kan word, is deur God se Woord daagliks te lees en daaroor te peins. As ons dit doen, kan ons Jehovah se weë leer ken (Psalm 119:9-11). Waarnemingsvermoëns kan ook ontwikkel word deur volwasse raad van ouers, ouer manne en die Genootskap se publikasies te aanvaar. Jongmense wat hulle waarnemingsvermoëns op die regte manier gebruik, kan keer dat hulle behep raak met materiële besittings, onrein spraak en oormatige ontspanning wat kenmerkend is van hierdie wêreld wat van God vervreemd is. As oud en jonk God se weg van die lewe volg, kan hulle ware sukses behaal.
Die slottoespraak van die dag was “Die Skepper—sy persoonlikheid en sy weë”. Nadat die spreker daarop gewys het dat miljarde mense nie die Skepper ken nie, het hy gesê: ‘Ware sin in die lewe hou verband met kennis van die Skepper, ons persoonlike God; ’n begrip van sy persoonlikheid en ’n lewe in ooreenstemming met sy weë. . . . Daar is feite oor ons wêreld en oor ons wat julle kan gebruik om mense te help om die Skepper te aanvaar en sodoende sin in die lewe te vind.’ Die spreker het toe bewyse bespreek wat toon dat ’n wyse en liefdevolle Skepper bestaan. Die toespraak het ’n hoogtepunt bereik met die vrystelling van ’n nuwe boek—Is daar ’n Skepper wat vir jou omgee?
“Dit is die weg, wandel daarop!”
Dít was die tema van die byeenkoms se derde dag (Jesaja 30:21). Die program het begin met ’n opwindende simposium van drie toesprake wat die aandag gevestig het op Esegiël se tempelvisioen. Hierdie visioen hou vir God se volk van vandag groot betekenis in, aangesien dit met ware aanbidding in ons tyd verband hou. ’n Sleutel om die visioen te verstaan, is: Jehovah se groot geestelike tempel stel sy reëling vir rein aanbidding voor. Terwyl die aspekte van die visioen bespreek is, het die gehoor nagedink oor hulle bedrywighede ter ondersteuning van die werk wat deur liefdevolle opsieners van die gesalfde oorblyfsel en deur die toekomstige lede van die vorsteklas gedoen word.
Later in die oggend was daar ’n treffende Bybeldrama met gekostumeerde deelnemers. Die drama se titel was: “Gesinne—Maak daaglikse Bybellees deel van julle lewenswyse!” Dit het die geloof en moed uitgebeeld van die drie Hebreërs wat geweier het om voor die goue beeld neer te buig wat deur koning Nebukadnesar van Babilon opgerig is. Die doel van die drama was om te toon dat die Bybel nie net ’n boek met dooie geskiedenis is nie, maar dat die raad daarin vandag waarlik voordelig is vir jongmense sowel as volwassenes.
Met die middagsessie was dit die tyd vir die openbare toespraak “Die enigste weg wat na die ewige lewe lei”. Nadat die spreker die geskiedenis van die mensdom se sondeval bespreek het, het hy met hierdie gedagteprikkelende woorde afgesluit: “Die temateks vir vandag is Jesaja hoofstuk 30, vers 21, wat sê: ‘Jou ore sal ’n woord agter jou hoor wat sê: Dit is die weg, wandel daarop! wanneer julle regs of wanneer julle links wil gaan.’ Hoe hoor ons hierdie stem? Dit is deur na God se Woord, die Heilige Bybel, te luister en deur die leiding te volg wat ons Grootse Onderrigter, Jehovah God, daardeur en deur middel van sy hedendaagse Christenorganisasie voorsien. Trouens, om dit te doen, is die enigste weg wat na die ewige lewe lei.”
Ná ’n opsomming van die Wagtoring-studieartikel vir die week het die slottoespraak met die titel “Hou aan om in Jehovah se weg te wandel” gevolg. ’n Deel daarvan was ’n hersiening van die hoofpunte van die program. Die spreker het toe ’n resolusie gelees wat ons vaste voorneme uitdruk om in God se weg te bly wandel.
Die resolusie het met hierdie roerende woorde afgesluit: “Ons [is] daarvan oortuig . . . dat die navolging van skriftuurlike beginsels, raad en vermanings vandag die beste lewensweg is om te volg, en dit lê ’n goeie fondament vir die toekoms, sodat ons ’n stewige houvas op die werklike lewe kan kry. Bowenal neem ons hierdie resolusie aan omdat ons Jehovah God met ons hele hart, siel, verstand en krag liefhet!” Almal wat teenwoordig was, het met ’n dawerende ja bevestig dat hulle daarmee saamstem!
[Venster/Prent op bladsy 8]
Is daar ’n Skepper wat vir jou omgee?
Die nuwe boek met hierdie titel lewer oortuigende bewys dat die Skepper, Jehovah, bestaan en bespreek sy eienskappe. Dit is veral bedoel vir diegene wat ’n sekulêre geleerdheid het, maar wat nie in God glo nie. Hierdie boek met 192 bladsye sal ook die geloof versterk van diegene wat reeds in God glo en waardering opbou vir sy persoonlikheid en weë.
Is daar ’n Skepper wat vir jou omgee? veronderstel nie dat die leser in God glo nie. Dit bespreek eerder hoe onlangse wetenskaplike ontdekkings en idees getuig van die feit dat die Skepper bestaan. Die titels van ’n paar van die hoofstukke is: “Wat kan jou lewe sinvoller maak?”, “Hoe het ons heelal hier gekom?—die geskilpunt” en “Hoe uniek is jy tog!” Ander hoofstukke bespreek waarom ons seker kan wees dat die Bybel deur God geïnspireer is. Die nuwe boek gee ook ’n geheelbeeld van die Bybel, wat die Skepper se persoonlikheid en weë openbaar. Die boek bespreek nie net waarom God soveel lyding toegelaat het nie, maar dit verduidelik ook hoe hy dit vir ewig gaan beëindig.
[Prente op bladsy 7]
Baie is gedoop
[Prente op bladsy 7]
Die nuwe brosjure is vrygestel deur A. D. Schroeder, ’n lid van die Bestuursliggaam van Jehovah se Getuies
[Prente op bladsy 8, 9]
’n Opwindende drama het daaglikse Bybellees aangemoedig