Hoe lank kan ons lewe?
Oor die algemeen lewe mense langer, sodat baie wonder: ‘Hoe lank kan ons lewe?’
VOLGENS The New Encyclopædia Britannica (1995) is daar in die verlede algemeen aangeneem dat Pierre Joubert die langste gelewe het. In 1814 is hy op 113-jarige ouderdom oorlede. Ander het weliswaar na bewering langer gelewe, maar daar bestaan nie bevestigbare bewyse van hulle ouderdomme nie. Betroubare dokumentasie het egter bevestig dat ’n aantal mense langer as Pierre Joubert gelewe het.
Jeanne Louise Calment is op 21 Februarie 1875 in Arles, in die suidooste van Frankryk, gebore. Haar dood op 4 Augustus 1997—meer as 122 jaar later—het baie publisiteit ontvang. In 1986 het Sjigetsjijo Izoemi van Japan gesterf toe hy 120 jaar oud was. Volgens die Guinness Book of Records 1999 was die 118-jarige Sarah Knauss die oudste persoon toe die boek geskryf is. Sy is op 24 September 1880 in Pennsilvanië, VSA, gebore. Toe Marie-Louise Febronie Meilleur van Quebec, Kanada, in 1998 op 118-jarige ouderdom gesterf het, was sy 26 dae ouer as Sarah.
Die aantal mense wat ’n baie hoë ouderdom bereik, het inderdaad skerp gestyg. Volgens skattings sal die aantal mense wat honderd jaar en ouer is gedurende die eerste helfte van die volgende eeu tot meer as 2,2 miljoen styg! Die aantal mense wat 80 jaar en ouer is, het eweneens van 26,7 miljoen in 1970 tot 66 miljoen in 1998 toegeneem. Dit is ’n toename van 147 persent, teenoor ’n toename van 60 persent in die totale wêreldbevolking.
En dit is nie net dat mense langer lewe nie. Baie doen ook dinge wat die meeste 20-jariges nie kan doen nie. In 1990 het die 82-jarige John Kelley ’n maraton—’n wedloop van 42,2 kilometer—binne vyf uur en vyf minute voltooi. In 1991 het die 84-jarige oumagrootjie Mavis Lindgren daardie afstand in sewe uur en nege minute afgelê. En meer onlangs het ’n 91-jarige man die New York City-maraton voltooi!
Dit beteken nie dat bejaardes nie in die verlede merkwaardige prestasies behaal het nie. Op 99-jarige ouderdom het die aartsvader van die Bybel, Abraham, sy gaste “tegemoet begin hardloop”. Toe Kaleb 85 jaar oud was, het hy gesê: “Soos my krag toe was [45 jaar vroeër], so is my krag nou nog, om te veg en om uit te gaan en in te gaan.” En die Bybel sê van Moses toe hy 120 jaar oud was: “Sy oog was nie verswak nie, en sy krag het nie vergaan nie.”—Genesis 18:2, NW; Josua 14:10, 11; Deuteronomium 34:7.
Jesus Christus het van die eerste mens, Adam, en die arkbouer Noag as geskiedkundige persone gepraat (Matteus 19:4-6; 24:37-39). Genesis sê dat Adam 930 en Noag 950 jaar oud geword het (Genesis 5:5; 9:29). Het mense werklik so lank gelewe? Kan ons selfs veel langer, miskien vir ewig, lewe? Ondersoek gerus die getuienis in die volgende artikel.