Maak jou lewe suksesvol!
“Welgeluksalig is die man wat nie wandel in die raad van die goddelose . . . nie . . . Alles wat hy doen, voer hy voorspoedig uit.”—PSALM 1:1, 3.
1. (a) Hoe beskou baie jongmense in die wêreld sukses? (b) Hoe beskryf die Bybel ’n suksesvolle persoon?
SUKSES—wat beteken daardie woord vir jou? “My grootste strewe is om sukses in die sakewêreld te behaal”, het ’n jong man gesê. ’n Jong vrou het gesê: “My grootste droom is om ’n gelukkige gesin te hê.” Maar ’n ander jong vrou sê: “My droom is om ’n mooi huis, ’n mooi kar . . . te hê. Ek lewe net vir myself.” Die probleem is dat nie geld of ’n gesin of selfs ’n uitstekende loopbaan die sleutel tot ware sukses is nie. In Psalm 1:1-3 lees ons: “Welgeluksalig is die man wat nie wandel in die raad van die goddelose . . . nie . . . Sy behae is in die wet van die HERE . . . Alles wat hy doen, voer hy voorspoedig uit.”
2. Waar word ware sukses gevind, en wat is die enigste manier om dit te verkry?
2 Hier beloof die Bybel iets wat geen mens jou kan gee nie—ware sukses! Maar dit praat nie van finansiële gewin nie. Die Bybel self waarsku: “Die liefde vir geld is ’n wortel van allerhande skadelike dinge” (1 Timoteus 6:10). Ware sukses word verkry deur God te behaag—en dit sluit gehoorsaamheid aan die wet van Jehovah in. Slegs dít kan ware bevrediging en ware geluk verskaf! Dalk vind die idee om onder Jehovah se wet te staan en gesê te word wat jy moet doen, nie by jou byval nie. Jesus het egter gesê: “Gelukkig is dié wat bewus is van hulle geestelike behoefte” (Matteus 5:3). Of jy dit nou besef of nie, jy is met geestelike behoeftes geskep—met inbegrip van ’n diepgewortelde behoefte om God te ken en sy voornemens te verstaan. Daarom kan jy slegs ware geluk ondervind as jy daardie behoeftes bevredig en ‘die wet van Jehovah’ volg.
Waarom ons God se wette nodig het
3. Waarom moet ons Jehovah met graagte toelaat om ons “voetstappe te rig”?
3 Die profeet Jeremia het geskryf: “Ek weet, o HERE, dat aan die mens sy weg nie toebehoort nie; nie aan ’n man om te loop en sy voetstappe te rig nie” (Jeremia 10:23). Dit is waar van alle mense, oud en jonk. Dit is nie net dat ons nie die wysheid, ondervinding en kennis het om ons eie voetstappe te rig nie; ons het eenvoudig nie die reg om dit te doen nie. In Openbaring 4:11 sê die Bybel: “U is waardig, Jehovah, ja, ons God, om die heerlikheid en die eer en die krag te ontvang, want u het alles geskep, en weens u wil het hulle bestaan en is hulle geskep.” As ons Skepper is Jehovah “die bron van die lewe” (Psalm 36:9, NW). Gevolglik weet hy beter as enigiemand anders hoe ons ons lewe moet gebruik. Hy het dus wette gemaak, nie om ons ons geluk te ontneem nie, maar om ons te help om onsself te bevoordeel (Jesaja 48:17, NW). As jy God se wet ignoreer, doem jy jouself tot mislukking.
4. Waarom verwoes soveel jongmense hulle lewe?
4 Byvoorbeeld, het jy al ooit gewonder waarom soveel jongmense hulle lewe deur dwelms, promiskuïteit en ander verdorwenhede verwoes? Psalm 36:2, 3 verduidelik: “In die binneste van my hart sê die oortreding aangaande die goddelose: Daar is geen vrees van God voor sy oë nie. Want dit vlei hom in sy oë in verband met die uitvind en haat van sy skuld.” Omdat talle jongmense nie ’n gesonde “vrees van God” het nie, maak hulle hulleself wys dat hulle gevaarlike gedrag geen slegte gevolge sal hê nie. Maar uiteindelik moet hulle hierdie onveranderlike beginsel onder die oë sien: “Wat ’n mens ook al saai, dit sal hy ook maai; want hy wat met die oog op sy vlees saai, sal verderwing uit sy vlees maai, maar hy wat met die oog op die gees saai, sal ewige lewe uit die gees maai.”—Galasiërs 6:7, 8.
Hoe ‘om die dae te tel’
5, 6. (a) Waarom moet jongmense ‘hulle dae tel’, en wat beteken dit? (b) Wat beteken dit om ‘aan ons Skepper te dink’?
5 Hoe kan jy jou lewe suksesvol maak en ‘ewige lewe maai’? Moses het geskryf: “Die dae van ons jare—daarin is sewentig jaar, of as ons baie sterk is, tagtig jaar; . . . gou gaan dit verby, en ons vlieg daarheen” (Psalm 90:10). Jy dink dalk selde, indien ooit, aan die dood. Trouens, baie jongmense tree op asof hulle onvernietigbaar is. Maar Moses laat ons die pynlike werklikheid dat die lewe kort is baie duidelik sien. Daar is nie eers ’n waarborg dat ons 70 of 80 jaar sal lewe nie. “Tyd en lotgeval” kan selfs die lewe kortknip van dié wat jonk en gesond is (Prediker 9:11). Hoe gaan jy dus die kosbare lewe wat jy nou het, gebruik? Moses het gebid: “Leer ons om ons dae so te tel dat ons ’n wyse hart mag bekom!”—Psalm 90:12.
6 Wat beteken dit om jou dae te tel? Dit beteken nie dat jy oorbesorg moet raak oor hoe lank jy kan lewe nie. Moses het gebid dat Jehovah Sy volk leer hoe om hulle oorblywende dae so te gebruik dat dit eer aan Hom bring. Tel jy die dae van jou lewe—deur elke dag te beskou as iets kosbaars wat gebruik moet word om lof aan God te bring? Die Bybel gee jongmense hierdie aansporing: “Weer verdriet uit jou hart, en hou die kwale weg van jou liggaam, want die jeug en die jonkheid is nietigheid. En dink aan jou Skepper in die dae van jou jonkheid” (Prediker 11:10–12:1). Om aan jou Skepper te dink, beteken meer as om nie te vergeet dat hy bestaan nie. Toe die misdadiger Jesus gesmeek het: “Dink aan my wanneer u in u koninkryk kom”, wou hy nie net hê dat Jesus sy naam moes onthou nie. Hy wou hê dat Jesus iets moes doen, hom moet opwek! (Lukas 23:42; vergelyk Genesis 40:14, 23; Job 14:13.) Om Jehovah te onthou, behels eweneens aksie, om te doen wat hom behaag. Kan daar gesê word dat jy aan Jehovah dink?
Moenie afgunstig op kwaaddoeners wees nie
7. Waarom verkies party jongmense om hulle Skepper te vergeet? Gee ’n voorbeeld.
7 Baie jongmense verkies om Jehovah te vergeet omdat hulle dink dat dit te beperkend is om ’n Getuie te wees. ’n Broer in Spanje sê hoe hy as tiener gevoel het: “Die wêreld het my aangetrek omdat die waarheid moeilik en streng gelyk het. Dit het beteken dat ek moet sit, studeer, vergaderinge bywoon, ’n das dra, en dit was nie dinge waarvan ek gehou het nie.” Voel jy soms dat jy iets mis omdat jy God dien? Dit sal jou moontlik verbaas om uit te vind dat een van die Bybelskrywers presies so gevoel het. Maak asseblief jou Bybel oop en lees Psalm 73.
8. Waarom was Asaf “afgunstig op die grootpraters”?
8 Kom ons ondersoek hierdie psalm. Verse 2 en 3 sê: “Maar wat my aangaan, my voete het amper gestruikel, my voetstappe het byna uitgegly. Want ek was afgunstig op die onsinniges [“grootpraters”, NW] toe ek die voorspoed van die goddelose mense sien.” Volgens die opskrif het Asaf hierdie psalm geskryf. Hy was ’n Levitiese musikant en ’n tydgenoot van koning Dawid (1 Kronieke 25:1, 2; 2 Kronieke 29:30). Hoewel hy die groot voorreg gehad het om in God se tempel te dien, was hy “afgunstig op” manne wat oor hulle wetteloosheid gespog het. Dit het gelyk of hulle voorspoedig was; hulle het blykbaar vrede en veiligheid geniet. Trouens, hulle skynbare suksesse het die ‘voorstellings van hulle hart oortref’ (Verse 5, 7, NW). Hulle het “uit die hoogte”, dit wil sê op hooghartige wyse, gepraat oor hulle prestasies (Vers 8). ‘Hulle het hul mond teen die hemel gestel, en hul tong het op die aarde gewandel’, wat toon dat hulle geen ontsag vir enigiemand—in die hemel of op die aarde—gehad het nie.—Vers 9.
9. Hoe kan sommige Christenjongmense vandag soos Asaf begin voel?
9 Dieselfde kan dalk gesê word van jou portuurs by die skool. Jy hoor moontlik hoe hulle skaamteloos spog oor hulle seksuele eskapades, hulle wilde partytjies en hulle oormatige gebruik van alkohol en dwelms. Wanneer jy hulle lewe van sogenaamde genot vergelyk met die nou pad waarop jy as ’n Christen moet wandel, voel jy soms dalk “afgunstig op die grootpraters” (Matteus 7:13, 14). Asaf self het die punt bereik waar hy uitgeroep het: “Waarlik, tevergeefs het ek my hart rein gehou en my hande in onskuld gewas. Die hele dag tog is ek geslaan” (Verse 13, 14). Ja, hy het die waarde daarvan om God te dien en ’n regskape lewe te lei in twyfel begin trek.
10, 11. (a) Wat het veroorsaak dat Asaf van siening verander het? (b) In watter opsig is kwaaddoeners “op gladde plekke”? Gee ’n voorbeeld.
10 Gelukkig het Asaf nie lank in hierdie neerslagtige toestand gebly nie. Hy het gou tot die besef gekom dat die skynbare vrede van die goddelose net ’n illusie was—en boonop net tydelik! Hy het uitgeroep: “Waarlik, U stel hulle op gladde plekke; U laat hulle in puin val. Hoe word hulle in ’n oomblik ’n voorwerp van verbasing, vergaan hulle, raak hulle tot niet deur verskrikkinge!” (Verse 18, 19). Baie van jou portuurs is eweneens “op gladde plekke”. Vroeër of later sal hulle die wrange vrugte van hulle goddelose gedrag pluk, moontlik ’n ongewenste swangerskap, ’n seksueel oordraagbare siekte, selfs tronkstraf of die dood! Maar wat selfs erger is, hulle word vervreemd van God.—Jakobus 4:4.
11 ’n Jong Getuie in Spanje het die waarheid hiervan persoonlik gesien. Toe sy jonger was, het sy ’n dubbele lewe gelei en noue omgang gehad met ’n groep jeugdiges wat God nie gevrees het nie. Kort voor lank het sy verlief geraak op een van hulle—’n dwelmverslaafde. Hoewel sy nie self dwelms gebruik het nie, het sy vir hom dwelms gekoop. “Ek het hom selfs gehelp om die naald in te steek”, erken sy. Gelukkig is hierdie suster tot besinning gebring en gehelp om geestelik te herstel. Maar hoe geskok was sy tog om ’n ruk later uit te vind dat haar dwelmverslaafde vriend aan vigs dood is. Ja, net soos die psalmis gesê het, is mense wat God nie vrees nie “op gladde plekke”. Party sterf dalk onverwags as gevolg van hulle losbandige lewenstyl. Wat die res betref, as hulle nie hulle weë verander nie, sal hulle in die nabye toekoms te staan kom voor “die openbaring van die Here Jesus vanuit die hemel met sy kragtige engele in ’n vlammende vuur, wanneer hy wraak uitoefen op dié wat God nie ken nie en dié wat die goeie nuus oor ons Here Jesus nie gehoorsaam nie”.—2 Tessalonisense 1:7, 8.
12. Hoe het ’n jong man in Japan die dwaasheid daarvan ingesien om op kwaaddoeners afgunstig te wees?
12 Hoe dwaas is dit dus tog om afgunstig te wees op “dié wat God nie ken nie”! Dit is in werklikheid op diegene wat Jehovah ken en wat die hoop op ewige lewe het wat ’n mens afgunstig moet wees. ’n Jong broer in Japan het tot hierdie besef gekom. As ’n jong man wou hy ook “meer vryheid hê”. Hy verduidelik: “Ek het gedink ek mis iets. Toe het ek besef hoe my lewe sonder die waarheid sou wees. Ek kon sien hoe ek 70 of 80 jaar lewe en dan sterf. Maar Jehovah bied ons die hoop op ewige lewe! Hierdie besef het my gehelp om te waardeer wat ek in werklikheid het.” Maar dit is nietemin nie maklik om getrou te bly terwyl ’n mens omring word deur mense wat nie God se wette volg nie. Wat is ’n paar dinge wat jy kan doen om daardie druk te weerstaan?
Let op jou vriende!
13, 14. Waarom is dit belangrik om selektief in jou keuse van vriende te wees?
13 Kom ons kyk weer na die beskrywing van die suksesvolle man, soos opgeteken in Psalm 1:1-3: “Welgeluksalig is die man wat nie wandel in die raad van die goddelose en nie staan op die weg van die sondaars en nie sit in die kring van die spotters nie; maar sy behae is in die wet van die HERE, en hy oordink sy wet dag en nag. En hy sal wees soos ’n boom wat geplant is by waterstrome, wat sy vrugte gee op sy tyd en waarvan die blare nie verwelk nie; en alles wat hy doen, voer hy voorspoedig uit.”
14 Let eerstens op dat jou vriende ’n groot rol speel. Spreuke 13:20 sê: “Gaan met die wyse om, dan word jy wys; maar hy wat met dwase verkeer, versleg.” Dit beteken nie dat ’n mens jongmense wat nie Getuies van Jehovah is nie koel, onvriendelik of onbeskof moet behandel nie. Die Bybel spoor ons aan om ons naaste lief te hê en om “vreedsaam teenoor alle mense” te wees (Romeine 12:18; Matteus 22:39). Maar jy sal dalk vind dat jy ‘in die raad wandel’ van diegene wat nie Bybelstandaarde volg nie as jy te intiem met hulle omgaan.
Die voordele van Bybellees
15. Hoe kan jongmense ’n verlange na Bybellees ontwikkel?
15 Die psalmis het ook gesê dat die suksesvolle man behae daarin het om God se wet “dag en nag op gedempte toon” te lees (Psalm 1:1, 2, NW). Die Bybel is weliswaar nie ligte leesstof nie, en dit bevat “sommige dinge wat moeilik is om te verstaan” (2 Petrus 3:16). Maar dit hoef ook nie ’n moeisame taak te wees om die Bybel te lees nie. Dit is moontlik om “’n verlange [te ontwikkel] na die onvervalste melk” van God se Woord (1 Petrus 2:2). Probeer om elke dag net ’n bietjie te lees. As daar gedagtes is wat jy nie verstaan nie, kan jy navorsing doen. Dink dan na oor wat jy gelees het (Psalm 77:12, 13). As jy sukkel om te konsentreer, kan jy probeer om hardop te lees “op gedempte toon”. Mettertyd sal jou liefde vir Bybellees beslis toeneem. ’n Jong suster in Brasilië sê: “Dit het altyd vir my gevoel of Jehovah baie ver van my is. Maar ek het die afgelope paar maande my persoonlike studie en Bybellees verbeter. Nou voel ek dat my verhouding met Jehovah sterker is. Hy is meer ’n werklike persoon vir my.”
16. Hoe kan ons meer baat vind by gemeentelike vergaderinge?
16 Die bywoning van gemeentelike vergaderinge is ook noodsaaklik om geestelik te groei. As jy ‘aandag skenk aan hoe jy luister’, sal jy baie aanmoediging ontvang (Lukas 8:18). Voel jy soms dat die vergaderinge nie baie interessant is nie? Wel, vra jou dan af: ‘Wat doen ek om die vergaderinge interessant te maak? Skenk ek aandag? Berei ek voor? Lewer ek kommentaar?’ Die Bybel sê immers vir ons om ‘op mekaar ag te gee om tot liefde en voortreflike werke aan te spoor en mekaar aan te moedig’ (Hebreërs 10:24, 25). Om dit te doen, moet jy deelneem! En om deel te neem, moet jy natuurlik voorberei. ’n Jong suster sê: “Dit is werklik makliker om aan die vergaderinge deel te neem wanneer ’n mens voorberei.”
Dit lei tot sukses as ons God se weg volg
17. In watter opsig is ’n ywerige Bybelleser “soos ’n boom wat geplant is by waterstrome”?
17 Die psalmis vergelyk die suksesvolle man verder met “’n boom wat geplant is by waterstrome”. Die waterstrome kan verwys na besproeiingskanale wat gebruik is om bome in ’n boord nat te lei (Jesaja 44:4, NW). As ons die Bybel daagliks lees, is dit asof ons aan so ’n onuitputlike bron van lewensonderhoud en verkwikking gekoppel is (Jeremia 17:8). Jy sal daagliks die nodige krag ontvang om beproewinge en moeilikhede te verduur. Aangesien jy Jehovah se denke geleer het, sal jy die nodige wysheid hê om verstandige besluite te neem.
18. Wat kan ’n jong persoon van sukses in Jehovah se diens verseker?
18 Soms kan dit moeilik lyk om Jehovah te dien. Maar moet nooit dink dat dit té moeilik is nie (Deuteronomium 30:11). Die Bybel beloof jou dat ‘jy alles wat jy doen, voorspoedig sal uitvoer’, solank jou hoofdoel is om Jehovah te behaag en sy hart te verbly! (Spreuke 27:11). En onthou dat jy nie alleen is nie. Jy het die ondersteuning van Jehovah en Jesus Christus (Matteus 28:20; Hebreërs 13:5). Hulle weet met watter druk jy te kampe het, en hulle sal jou nooit in die steek laat nie (Psalm 55:23). Jy het ook die ondersteuning van “die hele gemeenskap van broers” en van jou ouers as hulle godvresend is (1 Petrus 2:17). Met sulke ondersteuning, tesame met jou vasbeslotenheid en inspanning, kan jy ’n suksesvolle lewe geniet, nie net nou nie maar tot in alle ewigheid!
Hersieningsvrae
◻ Wat is ware sukses?
◻ Waarom het ons Jehovah nodig om ons voetstappe te rig?
◻ Hoe kan jongmense ‘hulle dae tel’?
◻ Waarom is dit dwaas om afgunstig op kwaaddoeners te wees?
◻ Hoe kan daaglikse Bybellees en gereelde vergaderingbywoning jongmense help om ’n suksesvolle lewe te lei?
[Prent op bladsy 20]
Omdat baie jongmense nie ’n gesonde “vrees van God” het nie, maak hulle hulle aan verwoestende gedrag skuldig
[Prent op bladsy 22]
Jongmense vergeet dikwels dat hulle dade sekere gevolge het
[Prent op bladsy 23]
Bou ’n liefde op vir Bybellees
[Prent op bladsy 23]
Jy sal die vergaderinge meer geniet as jy deelneem