“Die kleine” het “duisend” geword

“Die kleine sal duisend word, en die geringe ’n magtige nasie.”—JESAJA 60:22, NW.

1, 2. (a) Waarom oordek duisternis die aarde vandag? (b) Hoe het Jehovah se lig progressief oor sy volk geskyn?

DUISTERNIS sal die aarde oordek en donkerheid die volke; maar oor jóu sal die HERE opgaan [“skyn”, NW], en sy heerlikheid sal oor jou gesien word” (Jesaja 60:2). Hierdie woorde is ’n baie goeie beskrywing van die situasie wat sedert 1919 op die aarde bestaan. Die Christendom het die teken van die koninklike teenwoordigheid van Jesus Christus, “die lig van die wêreld”, verwerp (Johannes 8:12; Matteus 24:3). Weens die “groot toorn” van Satan, die owerste van “die wêreldheersers van hierdie duisternis”, is die 20ste eeu gekenmerk deur die wreedste, vernietigendste gebeure in die mens se geskiedenis (Openbaring 12:12; Efesiërs 6:12). Die meeste mense lewe in geestelike duisternis.

² En tog skyn daar wel vandag lig. Jehovah ‘skyn’ oor sy knegte, die gesalfde oorblyfsel, wat die aardse verteenwoordigers van sy hemelse “vrou” is (Jesaja 60:1, NW). Veral sedert hulle bevryding uit Babiloniese gevangenskap in 1919 het hulle God se heerlikheid weerkaats en ‘hulle lig voor die mense laat skyn’ (Matteus 5:16). Van 1919 af tot 1931 het Koninkrykslig al hoe helderder geskyn namate hulle ontslae geraak het van die oorblywende kettings van Babiloniese denke. Hulle het tot tienduisende vermeerder in vervulling van Jehovah se belofte: “Gewis sal Ek vergader die oorblyfsel van Israel; almal bymekaarbring soos skape in ’n kraal, soos ’n kudde in sy weiveld; en dit sal dreun van mense” (Miga 2:12). In 1931 is Jehovah se heerlikheid oor sy volk selfs duideliker gesien toe hulle die naam Jehovah se Getuies aangeneem het.—Jesaja 43:10, 12, NW.

3. Hoe het dit duidelik geword dat Jehovah se lig oor ander behalwe die gesalfdes sou skyn?

³ Sal Jehovah net oor die oorblywendes van die “klein kuddetjie” skyn? (Lukas 12:32). Nee. The Watch Tower van 1 September 1931 het ook van ’n ander groep gepraat. In ’n goeie verduideliking van Esegiël 9:1-11 het dit getoon dat die man met die skrywer se inkpot wat in daardie verse gemeld word die gesalfde oorblyfsel voorstel. Vir wie gee daardie “man” ’n teken op die voorhoof? Die “ander skape”, mense wat die hoop het om vir ewig op ’n paradysaarde te lewe (Johannes 10:16; Psalm 37:29). In 1935 is hierdie groep “ander skape” geïdentifiseer as die “groot skare . . . uit alle nasies” wat deur die apostel Johannes in ’n visioen gesien is (Openbaring 7:9-14). Van 1935 af tot nou toe is daar baie aandag geskenk aan die insameling van die groot skare.

4. Wie is die “konings” en die “nasies” waarna Jesaja 60:3 verwys?

⁴ Daar word in Jesaja se profesie op hierdie insamelingswerk gesinspeel waar dit sê: “Nasies sal trek na jou lig, en konings na jou stralende opgang” (Jesaja 60:3). Wie is die “konings” waarna hier verwys word? Die oorblywendes van die 144 000 wat, saam met Jesus Christus, mede-erfgename van die hemelse Koninkryk is en wat die leiding in die getuieniswerk neem (Romeine 8:17; Openbaring 12:17; 14:1). Vandag word die paar duisend oorblywendes van die gesalfde oorblyfsel in getal ver oortref deur die “nasies”, diegene met ’n aardse hoop wat na Jehovah kom vir onderrigting en wat ander nooi om dieselfde te doen.—Jesaja 2:3.

Jehovah se ywerige knegte

5. (a) Watter feite toon dat die ywer van Jehovah se volk nie afgeneem het nie? (b) Watter lande het uitstekende vermeerderings in 1999 gehad? (Sien die tabel op bladsye 17-20.)

⁵ Watter ywer het Jehovah se hedendaagse Getuies tog dwarsdeur die 20ste eeu aan die dag gelê! En ten spyte van toenemende druk het hulle ywer nie afgeneem namate die jaar 2000 nader gekom het nie. Hulle het nog steeds Jesus se opdrag baie ernstig opgeneem: “Maak dissipels van mense van al die nasies” (Matteus 28:19, 20). Die aantal bedrywige verkondigers van die goeie nuus het in die laaste diensjaar van die 20ste eeu ’n nuwe hoogtepunt van 5 912 492 bereik. Hulle het die merkwaardige totaal van 1 144 566 849 uur daaraan bestee om met ander oor God en sy voornemens te praat. Hulle het 420 047 796 herbesoeke by belangstellendes gedoen en 4 433 884 gratis tuisbybelstudies gehou. Wat ’n wonderlike verslag van ywerige diens!

6. Watter nuwe reëling is vir pioniers gemaak, en watter reaksie is hierop ontvang?

⁶ Verlede Januarie het die Bestuursliggaam ’n verandering in die uurvereiste vir pioniers aangekondig. Baie het dit benut en as gewone of hulppioniers begin dien. Gedurende die eerste vier kalendermaande van 1999 het die takkantoor in Nederland byvoorbeeld vier keer meer aansoeke vir gewone pionierdiens ontvang as gedurende dieselfde tydperk die vorige jaar. Ghana berig: “Sedert die nuwe uurvereiste vir pioniers in werking getree het, het die getal van ons gewone pioniers geleidelik vermeerder.” In die 1999-diensjaar het die aantal pioniers regoor die wêreld tot 738 343 gestyg—’n wonderlike bewys van ‘ywer vir voortreflike werke’.—Titus 2:14.

7. Hoe het Jehovah die ywerige werk van sy knegte geseën?

⁷ Het Jehovah hierdie ywerige werk geseën? Ja. Deur Jesaja sê hy: “Slaan jou oë rondom op en kyk—hulle almal kom bymekaar, hulle kom na jou toe; jou seuns kom van ver, en jou dogters word op die heup gedra” (Jesaja 60:4). Gesalfde “seuns” en “dogters” wat versamel is, dien God steeds ywerig. En nou word Jesus se ander skape in 234 lande en eilande van die see versamel, en hulle skaar hulle aan die kant van Jehovah se gesalfde “seuns” en “dogters”.

“Elke goeie werk”

8. Met watter ‘goeie werke’ is Jehovah se Getuies besig?

⁸ Christene het die verantwoordelikheid om die goeie nuus van die Koninkryk te verkondig en belangstellendes te help om dissipels te word. Maar hulle is “toegerus vir elke goeie werk” (2 Timoteus 3:17). Hulle sorg dus op liefdevolle wyse vir hulle gesinne, betoon gasvryheid en besoek siekes (1 Timoteus 5:8; Hebreërs 13:16). En vrywilligers is betrokke by projekte soos om Koninkryksale te bou—’n werk wat ook ’n getuienis gee. In Togo, ná ’n saal gebou is, wou die leiers van ’n plaaslike charismatiese kerk weet hoe Jehovah se Getuies dit regkry om self hulle geboue op te rig terwyl die kerk mense vir hierdie doel moet huur! Togo berig dat die hoë gehalte van die Koninkryksale wat hulle bou so ’n positiewe uitwerking op die omgewing het dat party mense huise probeer huur of bou in buurte waar sale gebou gaan word.

9. Hoe het Jehovah se Getuies gereageer wanneer daar rampe was?

⁹ Soms is goeie werk van ’n ander aard nodig. Baie lande is gedurende die laaste diensjaar deur rampe getref, en dit was dikwels Jehovah se Getuies wat eerste op die toneel was om hulp te verleen. ’n Groot deel van Honduras is byvoorbeeld deur orkaan Mitch verwoes. Die takkantoor het vinnig noodkomitees op die been gebring om noodlenigingspogings te organiseer. Getuies in Honduras en in baie ander lande het klere, voedsel, medisyne en ander basiese items geskenk. Streekboukomitees het hulle vaardighede gebruik om huise te herbou. Ons broers wat slagoffers van die ramp was, is gou gehelp om weer met hulle daaglikse bedrywighede voort te gaan. In Ecuador het Jehovah se Getuies hulle broers te hulp gekom toe hewige oorstromings party huise verwoes het. Nadat ’n regeringsamptenaar gesien het op watter doeltreffende manier hulle die situasie hanteer het, het hy gesê: “As ek hierdie groep gehad het, sou ek wondere verrig het! Mense soos julle moet oral in die wêreld wees.” Sulke goeie werke bring lof aan Jehovah God en is ’n bewys van ons “godvrugtige toegewydheid [wat] voordelig vir alles” is.—1 Timoteus 4:8.

Hulle kom ‘aangevlieg soos ’n wolk’

10. Waarom kan daar gesê word dat Jehovah se naam soos nooit tevore nie verkondig word, al word die gesalfdes al hoe minder?

¹⁰ Jehovah vra nou: “Wie is dit wat daar aangevlieg kom soos ’n wolk en soos duiwe na hulle vensters? Ja, op My wag die eilande, en die skepe van Tarsis kom vooraan, om jou seuns van ver te bring. . . . Uitlanders sal jou mure bou, en hulle konings sal jou dien” (Jesaja 60:8-10). Die eerste persone wat gereageer het op Jehovah se lig wat skyn, is sy “seuns”, gesalfde Christene. Daarna het die “uitlanders” gekom, die groot skare, wat hulle gesalfde broers lojaal dien deur hulle leiding in die verkondiging van die goeie nuus te volg. Hoewel die gesalfdes dus al hoe minder word, word Jehovah se naam oor die hele aarde verkondig soos nooit tevore nie.

11. (a) Wat vind nog steeds plaas en wat was die gevolg in 1999? (b) Watter lande het uitsonderlike doopsyfers vir 1999? (Sien die tabel op bladsye 17-20.)

¹¹ Gevolglik stroom miljoene “soos duiwe na hulle vensters” en vind ’n toevlug in die Christengemeente. Honderdduisende word elke jaar bygevoeg, en die weg is steeds oop vir meer. Jesaja sê: “Jou poorte sal altyddeur oopstaan; hulle sal bedags of snags nie gesluit word nie, om na jou toe aan te bring die rykdom van die nasies” (Jesaja 60:11). Verlede jaar is 323 439 gedoop as ’n simbool van hulle toewyding aan Jehovah, en hy het nog nie die poorte gesluit nie. “Die begeerlike dinge van al die nasies”, lede van die groot skare, stroom nog daardeur (Haggai 2:7, NW). Niemand wat die duisternis wil verlaat, word weggewys nie (Johannes 12:46). Mag hulle almal hulle waardering vir die lig behou!

Onverskrokke ten spyte van teenstand

12. Hoe het diegene wat die duisternis liefhet die lig probeer uitdoof?

¹² Diegene wat die duisternis liefhet, haat Jehovah se lig (Johannes 3:19). Party probeer selfs daardie lig uitdoof. Dit is te verwagte. Selfs Jesus, “die ware lig wat vir elke soort mens lig gee”, is bespot, teëgestaan en uiteindelik deur sy landgenote doodgemaak (Johannes 1:9). Dwarsdeur die 20ste eeu is Jehovah se Getuies ook bespot, hulle is gevange geneem, hulle werk is verbied en hulle is selfs doodgemaak, terwyl hulle Jehovah se lig getrou weerkaats het. In onlangse jare het teenstanders selfs sover gegaan om leuens in die media te versprei oor diegene wat God se lig weerkaats. Party wil mense wysmaak dat Jehovah se Getuies gevaarlik is en dat hulle werk beperk of verbied moet word. Was sulke teenstanders suksesvol?

13. Wat was die gevolg toe die feite omtrent ons werk op oordeelkundige wyse aan die media bekend gemaak is?

¹³ Nee. Waar gepas het Jehovah se Getuies na die media gegaan om die feite te verduidelik. Gevolglik het mense Jehovah se naam dikwels in koerante en tydskrifte gesien en oor die radio en televisie gehoor. Dit het tot goeie resultate in die predikingswerk gelei. In Denemarke het ’n program wat landwyd oor televisie uitgesaai is, byvoorbeeld die onderwerp bespreek: “Waarom die geloof van die Dene aan die afneem is.” Daar is onder andere ’n onderhoud met Jehovah se Getuies gevoer. ’n Vrou wat na die program gekyk het, het later gesê: “Dit was so duidelik wie God se gees het.” ’n Studie is met haar begin.

14. Wat sal teenstanders tot hulle ontsteltenis binnekort moet erken?

¹⁴ Jehovah se Getuies weet dat baie in hierdie wêreld hulle sal teëstaan (Johannes 17:14). Maar hulle word versterk deur Jesaja se profesie: “Die seuns van hulle wat jou verdruk het, sal gebukkend na jou toe trek; en almal wat jou verag het, sal hulle neerbuig by jou voetsole; en hulle sal jou noem: Stad van die HERE, Sion van die Heilige van Israel” (Jesaja 60:14). Teenstanders sal tot hulle ontsteltenis binnekort moet erken dat hulle in werklikheid teen God self geveg het. Wie kan so ’n stryd wen?

15. Hoe “suig” Jehovah se Getuies “die melk van nasies”, en hoe word dit in hulle onderrigtings- en evangelisasiewerk weerspieël?

¹⁵ Jehovah belowe verder: “Ek [sal] jou ’n trots tot onbepaalde tyd maak . . . Jy sal die melk van nasies suig, en die bors van konings sal jy suig; en jy sal vir seker weet dat ek, Jehovah, jou Redder is” (Jesaja 60:15, 16, NW). Ja, Jehovah is die Redder van sy volk. As hulle op hom vertrou, sal hulle “tot onbepaalde tyd” bly lewe. En hulle sal “die melk van nasies suig”, deur sekere beskikbare middele vir die bevordering van ware aanbidding te gebruik. Die verstandige gebruik van rekenaar- en kommunikasietegnologie maak byvoorbeeld die gelyktydige publikasie van Die Wagtoring in 121 tale en die Ontwaak! in 62 tale moontlik. ’n Rekenaarsagtewareprogram is spesiaal geskryf om te help met die vertaling van die Nuwe Wêreld-vertaling in nuwe tale, en hierdie vertaling verskaf mense groot vreugde. Toe die Christelike Griekse Geskrifte in 1999 in Kroaties vrygestel is, het duisende mense trane van vreugde gestort. ’n Bejaarde broer het gesê: “Ek wag al so lank vir hierdie Bybel. Nou kan ek maar in vrede sterf!” Daar is reeds meer as 100 miljoen eksemplare van die Nuwe Wêreld-vertaling, in sy geheel of gedeeltelik, in 34 tale gedruk.

Hoë sedelike standaarde

16, 17. (a) Waarom is dit noodsaaklik om Jehovah se hoë standaarde te handhaaf, al is dit moeilik? (b) Watter ondervinding toon dat jongmense dit kan vermy om deur die wêreld besoedel te word?

¹⁶ Jesus het gesê: “Hy wat veragtelike dinge beoefen, haat die lig” (Johannes 3:20). Daarenteen het diegene wat in die lig bly Jehovah se hoë standaarde lief. Jehovah sê deur Jesaja: “Jou volk sal almal regverdiges wees” (Jesaja 60:21a). Dit kan ’n uitdaging wees om regverdige standaarde te handhaaf in ’n wêreld waar geslagsonsedelikheid, leuens, gierigheid en trots so algemeen is. Party lande het byvoorbeeld ’n snelgroeiende ekonomie wat ’n mens maklik kan beïnvloed sodat jy jou begin toespits op die najaging van rykdom. Maar Paulus het gewaarsku: “Dié wat . . . vasbeslote is om ryk te wees, val in versoeking en ’n strik en talle sinnelose en skadelike begeertes, wat mense in vernietiging en verderf stort” (1 Timoteus 6:9). Hoe tragies is dit tog wanneer iemand so diep betrokke raak by sakeondernemings dat hy die waarlik belangrike dinge opoffer, soos Christelike assosiasie, heilige diens, sedelike beginsels en gesinsverantwoordelikhede!

¹⁷ Dit kan veral vir jongmense moeilik wees om regverdige standaarde te handhaaf, terwyl so baie van hulle portuurs dwelms misbruik en onsedelik lewe. In Suriname is ’n 14-jarige meisie deur ’n aantreklike seun by die skool genader en gevra om geslagsomgang met hom te hê. Sy het geweier en verduidelik dat die Bybel geslagsomgang buite die huwelik verbied. Ander meisies by die skool het haar bespot en druk op haar probeer uitoefen om van gedagte te verander, want volgens hulle wou almal met daardie seun geslagsomgang hê. Maar die jong meisie het ferm by haar standpunt gebly. ’n Paar weke later het toetse getoon dat die seun HIV-positief is, en hy het baie siek geword. Die meisie was baie bly dat sy Jehovah se gebod gehoorsaam het dat ons ons moet ‘onthou van hoerery’ (Handelinge 15:28, 29). Jehovah se Getuies is baie trots op die jongmense in hulle geledere wat ferm standpunt inneem vir wat reg is. Hulle geloof, en dié van hulle ouers, ‘verheerlik’ Jehovah God se naam.—Jesaja 60:21b.

Jehovah het die vermeerdering gegee

18. (a) Watter wonderlike daad het Jehovah ten behoewe van sy volk verrig? (b) Watter bewys het ons dat daar nog verdere groei sal wees, en watter glorieryke vooruitsigte wag op diegene wat in die lig bly?

¹⁸ Ja, Jehovah laat die lig oor sy volk skyn deur hulle te seën, hulle te lei en hulle te versterk. Gedurende die 20ste eeu het hulle die vervulling van Jesaja se woorde gesien: “Die kleine sal duisend word, en die geringe ’n magtige nasie. Ek, Jehovah, sal dit op die regte tyd bespoedig” (Jesaja 60:22, NW). Uit die handjie vol in 1919 het “die kleine” meer as “duisend” geword. En daar is nog steeds verdere groei! Verlede jaar het 14 088 751 die herdenking van Jesus se dood bygewoon. Baie van hulle was nie bedrywige Getuies nie. Ons is verheug dat hulle hierdie belangrike viering bygewoon het, en ons nooi hulle om steeds nader aan die lig te beweeg. Jehovah skyn nog steeds helder oor sy volk. Die deur tot sy organisasie is nog oop. Laat almal dus vasbeslote wees om in Jehovah se lig te bly. Watter seëninge bring dit tog nou vir ons! En watter vreugde sal dit tog in die toekoms meebring wanneer alle skepsele Jehovah sal loof en hulle verheug in die grootsheid van sy heerlikheid!—Openbaring 5:13, 14.

Kan jy verduidelik?

• Wie weerkaats Jehovah se heerlikheid in hierdie laaste dae?

• Wat toon dat die ywer van Jehovah se volk nie afgeneem het nie?

• Met watter goeie werke is Jehovah se Getuies besig?

• Waarvan is ons oortuig, al ondervind ons hewige teenstand?

[Tabel op bladsy 17-20]

WÊRELDRAPPORT VAN JEHOVAH SE GETUIES VIR DIE 1999-DIENSJAAR

(See bound volume)

[Prente op bladsy 15]

Mense stroom nog steeds na Jehovah se organisasie

[Prent op bladsy 16]

Ons is bly dat Jehovah die deur wyd oopgelaat het vir diegene wat die lig liefhet