Lig word uitgestraal te midde van duisternis op aarde

„Kyk, die duisternis sal die aarde oordek en donkerheid die volke; maar oor jóu sal die HERE opgaan, en sy heerlikheid sal oor jou gesien word.”​—JESAJA 60:2

1. Watter positiewe antwoord kan op die vrae in hierdie paragraaf gegee word?

ONS lewe voorwaar in heuglike dae! ,Heuglike dae?’ vra iemand miskien. ,Hoe kan dit wees as die hele wêreld in politieke, ekonomiese en godsdienstige tweedrag verkeer en kernduisternis die nasies oordek?’ Maar dit is heuglike dae hierdie​—danksy die goeie nuus wat nou aardwyd verkondig word en waardeur mense wat na die waarheid honger, ingelig word oor die betekenis van ons tye en die blye vooruitsig van selfs heugliker dae wat hulle kan beleef!

2. (a) Watter woorde van bemoediging gee Jehovah in Jesaja hoofstukke 45 en 60? (b) Wie is God se „vrou”?

² Die Bron van ons wonderlike hoop is niemand anders as die Soewereine Heer Jehovah, die groot Skepper van hemel en aarde, nie (Jesaja 45:12, 18). Dit is hy wat die bevel gee wat in Jesaja hoofstuk 60, vers 1 (NW) opgeteken is: „Staan op, o vrou, versprei lig, want jou lig het gekom en oor jou het selfs die heerlikheid van Jehovah geskyn.” Wie is hierdie „vrou”? Sy is geen lewelose Vryheidstandbeeld nie; nog minder is sy ’n vleeslike vrou wat haar vir vrouevryheid beywer. Sy is eerder die dinamiese, vooruitstrewende, hemelse organisasie van Jehovah God, sy toegewyde helper wat bestaan uit tienduisende lojale engele en wat nou verrese „heiliges” insluit​—diegene wat tot die dood toe getrou gebly het as gesalfde Christene hier op aarde.​—Openbaring 11:18; 2:10.

3. Hoe het God se vrou (a) ‘opgestaan’ en (b) ‘lig versprei’?

³ „Staan op, o vrou”, beveel Jehovah. Gehoorsaam aan hierdie bevel het God se hemelse organisasie uit ’n eeuelange onvrugbare, verlate toestand opgestaan tot ’n toestand van vrugbare produktiwiteit. In 1914 het sy die Messiaanse Koninkryk voortgebring (Openbaring 12:1-5). Sedert 1919 het sy haar oorblywende, gesalfde seuns op aarde in ’n „land”, of toestand, van heerlike, geestelike voorspoed gebring (Jesaja 66:8). God se hemelse organisasie het boonop ,lig versprei’ oor wonderlike Koninkryksprofesieë. Haar talryke seuns word „deur die HERE geleer”.​—Jesaja 54: 1, 13.

Lig te midde van dikke donkerheid

4. Watter teenstelling maak Jehovah tussen sy volk en die nasies van die aarde?

⁴ „Jou lig het gekom”, sê Jehovah. Ja, „selfs die heerlikheid van Jehovah het geskyn” oor sy hemelse organisasie, en dit word op ’n wonderlike wyse deur Jehovah se herstelde volk op aarde weerspieël. Maar Jehovah maak vervolgens ’n teenstelling wanneer hy sê: „Kyk, die duisternis sal die aarde oordek en donkerheid die volke” (Jesaja 60:2). Is dit nie ’n raak beskrywing van wêreldtoestande sedert 1914 nie?

5. Waarom kan valse godsdiens geen oplossing vir die probleme van die kerneeu vind nie?

⁵ Die Christendom in die besonder het die profetiese ,teken van Jesus se teenwoordigheid en van die voleinding van die stelsel’ verwerp. Daarom struikel sy in dik geestelike duisternis rond. Die Christendom se gelowe het getoon dat hulle ’n onafskeidelike deel is van die wêreldryk van valse godsdiens, Babilon die Grote​—ver, ver verwyder van die lig van die waarheid af (Mattheüs 24:3-14; Openbaring 17:3-6). Wêreldlike godsdiens het geen oplossing gebied vir die probleme van hierdie kerneeu nie, en dit kan ook nie die dik duisternis en verlammende wanhoop verdryf wat die mensdom verswelg het nie. Valse godsdiens se bemoeiing met die aangeleenthede van die politieke nasies sal uiteindelik tot haar eie verwoesting lei.​—Openbaring 17:16, 17.

6, 7. (a) Hoe is Jehovah se heerlikheid gedurende die jare 1919-31 gesien? (b) Watter hoogtepunt het dit in 1931 bereik?

⁶ In teenstelling hiermee sê Jehovah voorts van sy hemelse organisasie: „Oor jóu sal die HERE opgaan, en sy heerlikheid sal oor jou gesien word” (Jesaja 60:2). Hierdie heerlikheid word na gesalfde Christene hier op aarde weerspieël, sodat hulle op hulle beurt ,hulle lig kan laat skyn voor die mense’ (Mattheüs 5:16). Die jare 1919 tot 1931 was heuglike jare waarin Koninkrykslig uitgestraal is en waarin God se volk die oorblywende boeie van Babiloniese leerstellings, denke en gebruike heeltemal afgeskud het. Gedurende daardie jare het die klein oorblyfsel van ware Christene ’n positiewe antwoord begin gee op die vraag „WIE SAL JEHOVAH EER?”​—wat die titel was van die studie-artikel in The Watch Tower se nommer van 1 Januarie 1926.

⁷ In 1931 het Jehovah se heerlikheid nog duideliker oor sy „kneg” sigbaar geword toe hulle die naam aangeneem het wat hy self aan hulle gegee het​—JEHOVAH SE GETUIES (Jesaja 43:10, 12). Gedurende 12 vrugbare, aksieryke jare tot 1931 het Koninkryksverkondigers van ’n handjievol tot tienduisende ywerige getuies vermeerder.

Nog lig gaan op

8, 9. (a) Op watter ander groep het The Watch Tower in 1931 die aandag gevestig? (b) Hoe ontvang hulle ’n „teken”, soos die Skrif aandui?

⁸ Maar sou Jehovah net lig laat opgaan ten behoewe van die gesalfdes van die ,klein kuddetjie Koninkrykserfgename’? (Lukas 12:32). Nee, want die jare 1931 tot 1938 was ’n wonderlike tydperk van verdere verligting, namate The Watch Tower pertinent op ’n ander groep begin wys het. Die studie-artikel in die nommer van 1 September 1931 het die titel „DIE MAN MET DIE SKRYWER SE INKPOT” gehad en was gebaseer op Esegiël 9:1-11. Nadat dit die ,skrywer’ as die gesalfde oorblyfsel geïdentifiseer het, het The Watch Tower die volgende kommentaar gemaak:

⁹ Die bevel word gegee om ’n teken te maak ,op die voorhoofde van die manne wat sug en steun oor al die gruwels wat [in die Christendom] gedoen word’. . . . Die HERE vertel van ’n klas persone wat hy ,sal red in die dag van onheil en sal bewaar en gelukkig sal maak op die aarde’ (Ps. 41:2, 3). Dit moet die klas persone wees wat dikwels aangedui word as ,die miljoene wat nou lewe wat nooit sal sterf nie’.” Vandag is dit opwindend om te sien hoe miljoene van hierdie mense die teken vir oorlewing ontvang deurdat hulle hulle met die ware Christelike persoonlikheid beklee en, deur Christus Jesus, in ’n toegewyde verhouding met Jehovah kom.​—Genesis 22:15-18; Sefanja 2:1-3; Efesiërs 4:24.

10, 11. (a) Hoe het Jehu Jesus afgeskadu? (b) Identifiseer die hedendaagse „Jonadab”.

¹⁰ Die studie-artikels in The Watchtower se nommers van 1 Julie tot 1 Augustus 1932 was veral belangrik. Hierdie artikels het na Tweede Konings hoofstukke 9 en 10 verwys en getoon hoe koning Jehu ’n tipe was van Jehovah se Skerpregter, die koning Jesus Christus, wat op die aarde verteenwoordig word deur die gesalfde oorblyfsel wat ander aangaande Jehovah se komende voltrekking van oordeel waarsku. Maar wie is deur Jehu se metgesel Jonadab afgebeeld? The Watchtower het geantwoord:

¹¹ „Jonadab het die klas mense voorgestel of afgeskadu wat nou op die aarde is gedurende die tyd dat die Jehu-werk aan die gang is, [mense] wat . . . dit nie met Satan se organisasie eens is nie, wat standpunt inneem aan die kant van geregtigheid en wat deur die Here bewaar sal word gedurende die tyd van Armageddon . . . en die ewige lewe op die aarde van hom sal ontvang.” The Watchtower het voorts getoon dat hulle die ,geseëndes van die Vader’ in Jesus se gelykenis van ,die skape en die bokke’ is (Mattheüs 25:31-46). Dit het gesê: „Hulle maak die ,skape’-klas uit wat guns bewys aan God se gesalfde volk, omdat hulle weet dat die gesalfdes van die Here die Here se werk doen.”

12. Watter opwindende openbaring van goddelike waarheid het in 1935 gekom?

¹² Hierdie flitse van profetiese lig het die grondslag gelê vir die historiese toespraak oor „Die Groot Menigte” wat op 31 Mei 1935 deur die President van die Wagtoringgenootskap, J. F. Rutherford, by die byeenkoms van Jehovah se Getuies in Washington, D.C., gehou is. Wat ’n openbaring van goddelike waarheid was dit tog nie! By daardie geleentheid is afdoende bewys voorgelê om die „groot menigte” van Openbaring 7:9 gelyk te stel met die Here se „ander skape” van Johannes 10:16, met die Jonadab-klas, met diegene wat die teken vir oorlewing op die voorhoof ontvang, met die miljoene wat nou lewe en nooit sal sterf nie en met „die skape” wat van „die bokke” afgeskei word en die ewige lewe in die aardse ryk van God se Koninkryk sal beërf. Dit alles is in The Watchtower van 1 en 15 Augustus 1935 behandel.

13. Watter ander moontlikheid is in 1938 gemeld?

¹³ In die daaropvolgende jare het God se organisasie heelwat aandag begin skenk aan die „groot menigte” en hulle wonderlike hoop om tot in die herstelde Paradys op aarde te oorleef. Gedurende 9-11 September 1938 het Jehovah se Getuies ’n byeenkoms in Londen, Engeland, gehou, waar twee belangrike toesprake deur middel van regstreekse telefoonverbindings na ander byeenkomste rondom die wêreld oorgesend is. Op grond van vroeëre opdragte wat aan mense gegee is, het een van hierdie toesprake, met die titel „Vul die Aarde”, te kenne gegee dat die „Jonadabs” wat die groot verdrukking oorleef moontlik, ten minste ’n tyd lank, ná Armageddon in die Nuwe Orde sal trou en kinders voortbring.​—Genesis 1:28; 9:1, 7; kyk The Watchtower, 15 Oktober en 1 November 1938.

14. Hoe het Jehovah sy volk gedurende daardie jare geseën?

¹⁴ Gedurende daardie jare het die Here Jesus Christus meer werkers versamel en uitgestuur. In 1938 het verkondigers in die veld tot nagenoeg 50 000 aangegroei.​—Mattheüs 9:37, 38.

„Konings” en „nasies”

15, 16. Hoe het „konings” (a) in vergange tye en (b) in hedendaagse tye ’n aandeel gehad in die vervulling van Jesaja 60:3-10? (c) Hoe dien „uitlanders” nou saam met die „konings”?

¹⁵ Hierdie versamelwerk word pragtig beskryf in Jesaja hoofstuk 60, verse 3 tot 10. Daar praat Jehovah van „konings” wat verskyn in verband met Sion se „stralende opgang” en wat daardie gemalin-organisasie dien. Toe God se volk van vergange tye uit Babiloniese gevangenskap teruggekeer het, het koning Darius die Meder en koning Kores van Persië die leiding geneem om reëlings te tref vir die herstelling van Jehovah se aanbidding in Jerusalem (Daniël 5:30-6:1; 9:1; Esra 1:1-3). In hierdie opsig het hulle gepas die almagtige Koning, Jehovah, en sy medekoning, Jesus, afgebeeld, wat die herstelling van ware aanbidding onder Jehovah se volk in hedendaagse tye gerig het (Openbaring 11:15, 17). Daarbenewens neem ’n gesalfde oorblyfsel van ware aanbidders​—toekomstige „konings”, „mede-erfgename van Christus”—​die leiding in die hedendaagse getuieniswerk. Saam met hulle dien daar „buitelanders”​—mense wat nie tot geestelike Israel behoort nie, maar wat aardse onderdane van die Koninkryk sal word en wat nou reeds aardwyd aan teokratiese bedrywighede deelneem.​—Romeine 8:17; vergelyk Jesaja 61:5, 6.

¹⁶ Jehovah nooi ons self: „Slaan jou oë rondom op en kyk.” Daardie „groot menigte . . . uit alle nasies” voeg hulle nou by die versamelde Koninkrykserfgename! (Openbaring 7:9; Sagaria 8:23; Jesaja 2:2, 3). Deur hulle ywer in die bediening ,verkondig hulle die roemryke dade van Jehovah’. Hulle lê hulle ook toe op projekte soos die bou van Koninkryksale vir aanbidding​—waarvan party binne slegs twee dae opgerig word. Hulle „dien” deur hulle heelhartige ondersteuning van die wêreldwye uitbreiding van Koninkryksbelange.​—Jesaja 60:4-7.

17, 18. (a) Watter opwindende ,vlug’ vind gelukkig nou plaas? (b) Hoe lig ’n seisoenverskynsel in Palestina hierdie ,vlug’ goed toe?

¹⁷ Jehovah stel vervolgens hierdie pertinente vraag: „Wie is dit wat daar aangevlieg kom soos ’n wolk en soos duiwe na hulle vensters?” Die eerstes wat na God se organisasie kom, is haar ,seuns van ver’, wat hulle geheel en al van Babiloniese godsdiens afgeskei het. Hierdie gesalfdes bring kosbare skatte en wy hulle volkome toe aan „die Naam van die HERE”, hulle God. As „die Heilige van Israel” het hy sy naam op hulle geplaas en hulle verheerlik met die voorreg om hom as sy getuies te dien. Hulle neem die leiding daarin om die naam van hulle Soewereine Heer, Jehovah, as die grootste, die deurlugtigste, die roemrykste naam in die ganse heelal te verhef.​—Jesaja 60:8, 9.

¹⁸ Gelukkig is die gesalfde oorblyfsel nie alleen hierin nie. Dit kon baie moeilik gewees het as hulle was! Hierdie verouderende groep raak al hoe kleiner namate hulle een na die ander hulle aardse loopbaan getrou voltooi. Daar is nou ongeveer 9 000 oor. Maar miljoene ander swerm soos duiwe na hulle „vensters”, of „duiwehokke”, en vind skuiling in God se organisasie (The New English Bible). Hulle is soos die swerms duiwe wat in sekere seisoene in Palestina te sien is​—so talryk dat hulle as ’t ware ’n wolk vorm wat die lug verdonker.

‘Poorte wat wyd oopstaan’

19. Waarom bly die „poorte” van Jehovah se organisasie oop, en hoe reageer „konings” en „uitlanders” daarop?

¹⁹ Jehovah het genadig die poorte van sy organisasie wyd oopgemaak, en hy rig nou die volgende woorde aan daardie organisasie: „Jou poorte sal altyddeur oopstaan; hulle sal bedags of snags nie gesluit word nie, om na jou toe aan te bring die rykdom van die nasies.” Dit is hoe dit nou gaan namate die vredeliewende „groot menigte” al talryker word. Hierdie „uitlanders” gee vreugdevol van hulle rykdom in die vorm van tyd, energie en middele terwyl hulle „dag en nag heilige diens verrig”. Hulle gaan in deur die „groot deur wat tot aktiwiteit lei” en werk saam met die toekomstige konings om Jehovah se naam te loof.​—Jesaja 60:10, 11; Openbaring 7:4, 9, 15, vgl. NW; 1 Korinthiërs 16:9, NW.

20. (a) Wie sal „ondergaan”? (b) Watter verblydende teenstelling merk ons hier?

²⁰ Vervolgens praat Jehovah met sy organisasie en sê: „Die nasie en die koninkryk wat jou nie sal dien nie, sal ondergaan, en die nasie sal seker verwoes word.” Alle trotse nasies van die wêreld en ander teenstanders sal by Armageddon verneder word. In teenstelling hiermee versier Jehovah sy heiligdom van aanbidding. Hy ,verheerlik die plek van sy voete’, die aardse voorhowe van sy groot geestelike tempel van aanbidding, deur die immer toenemende groot menigte daarin te versamel. By monde van ’n ander profeet verklaar Jehovah: „Ek sal ook al die nasies laat bewe, sodat die skatte van al die nasies sal toevloei; en Ek sal hierdie huis met heerlikheid vervul” (Haggai 2:7). Haar vervolgers, afvalliges en ander oneerbiedige teenstanders sal verplig wees om „gebukkend” te gaan​—hulle sal tot hulle ergernis moet erken dat Jehovah se Getuies inderdaad God se organisasie, die „Stad van die HERE, Sion van die Heilige van Israel”, verteenwoordig.​—Jesaja 60:12-14.

21, 22. (a) Watter versekering gee Jehovah hier? (b) Hoe kan daar gesê word dat sy volk ,die melk van nasies suig’? (c) Watter boeiende studie lê vir ons voor?

²¹ Jehovah sal nooit sy gemalin-helper in die steek laat nie, ongeag die beskimping wat haar ,seuns en dogters’ hier op aarde van teenstanders moet verduur. Hy sê eerder vir sy lojale organisasie: „Ek [sal] jou maak tot ’n ewige heerlikheid, ’n vreugde van geslag tot geslag. En jy sal die melk van nasies suig.” In figuurlike sin gebruik die aardse verteenwoordigers van God se organisasie dus alle middele tot hulle beskikking om ware aanbidding te bevorder. Hulle maak gebruik van moderne kommunikasie-, vervoer- en drukmetodes om die goeie nuus te verkondig. Jehovah se Getuies geniet Jehovah se wakende sorg en leiding in hierdie werk. In hulle diens ten behoewe van Jehovah se hemelse organisasie verheug hulle hulle ook oor die vervulling van sy belofte: „Ek, die HERE, [is] jou Heiland . . ., en jou Losser [is] die Magtige van Jakob.”​—Jesaja 60:15, 16.

²² Watter verdere bemoediging gee Jehovah ons in Jesaja 60:17-22? Dit is die boeiende onderwerp van ons volgende studie.

Hersieningsvrae

◻ Watter teenstelling tussen lig en duisternis is vandag duidelik te sien?

◻ Hoe het die lig al helderder geskyn gedurende 1919-38?

◻ Hoe is Jesaja 60:8 in ons dag vervul?

◻ Hoe gaan „konings” en „uitlanders” in deur ,poorte wat wyd oopstaan’?

[Venster op bladsy 13]

„Wapens met ontsettende vernietigingskrag word teen ’n toenemende tempo opgegaar. . . . Die wapenwedloop het vandag uitgekring na die oseane van die aarde en na die buitenste ruimte. Trouens, dit is ironies dat die vermenigvuldiging van wapens een van die min nywerhede is wat uitbrei in ’n tyd van ekonomiese depressie en somberheid.”​—Mnr. Javier Perez de Cuellar, Sekretaris-Generaal van die VV

„Nou die dag was daar by die huis ’n ander bekende boodskap in die vorm van ’n godsdiensblaadjie onder die deur.‘Nader ons Armageddon?’ het dit gevra op ’n agtergrond van ’n dreigende hemel en ’n weerligstraal wat op ons afskiet. Daar was ’n tyd toe daardie soort boodskap meewarige glimlagte sou uitgelok het. Skielik is dit nie meer snaaks nie.”​—Haynes Johnson, The Washington Post