Slaan ag op die waarskuwing!

BOEM! Op 3 Junie 1991 het ’n stroom vulkaniese gasse en as met ’n weergalmende gedreun uit die berg Foegen in Japan gebars. Die superverhitte mengsel het teen die hang afgestroom. Die uitbarsting het die dood van 43 mense veroorsaak. Baie wat dit nouliks oorleef het, was erg verbrand. “Water, water, asseblief”, het party uitgeroep. Brandweermanne en die polisie het hulle daarheen gehaas om hulle te help.

ONGEVEER twee weke vroeër is ’n lawakoepel op die piek van die berg Foegen opgemerk, en gevolglik was die owerheid en die bewoners op ’n gereedheidsgrondslag. Meer as ’n week voor die ramp is daar aanbeveel dat die gebied ontruim word. Net ’n dag voor die uitbarsting het die polisie lede van die pers gevra om nie in die verbode gebied in te gaan nie. En tog was daar 43 slagoffers daardie rampspoedige middag in die gevaargebied.

Waarom het soveel dit in die gebied gewaag of daar agtergebly? Party boere wat hulle huise ontruim het, het teruggegaan om te sien of hulle besittings nog daar is en of dit goed gaan met hulle landerye. Drie vulkanoloë het so na as moontlik aan die vulkaan probeer kom om hulle akademiese belangstelling te bevredig. ’n Aantal verslaggewers en fotograwe het dit in die verbode gebied gewaag omdat hulle ’n unieke storie of foto van die vulkaniese aktiwiteit wou kry. Drie huurmotorbestuurders wat deur die pers gehuur is, was op die toneel. Polisiemanne en vrywillige brandbestryders was op diens. Elkeen het sy eie rede gehad waarom hy in die gevaargebied ingegaan het—en die gevolg was dat hy sy lewe verloor het.

Is jy in ’n gevaargebied?

Almal lewe dalk nie naby ’n aktiewe vulkaan nie. Maar gestel ons kom voor ’n wêreldwye katastrofe te staan, wat ons almal in ’n gevaargebied plaas en die hele wêreld raak. ’n Boek wat ’n betroubare bron van profetiese inligting is, waarsku ons oor ’n komende wêreldwye ramp en beskryf dit soos volg: “Die son [sal] verduister word, en die maan sal sy lig nie gee nie, en die sterre sal uit die hemel val, en die kragte van die hemele sal geskud word. . . . Al die stamme van die aarde [sal] hulleself in weeklag slaan” (Matteus 24:29, 30). Hier sê dit dat hemelse verskynsels met ’n universele omvang “al die stamme van die aarde” sal raak. Met ander woorde, hierdie profesie hou verband met ’n katastrofe wat elkeen van ons sal raak.

Hierdie boek van betroubare profesieë is die Bybel. Interessant genoeg, die konteks van die bogemelde teks gee ’n breedvoerige beskrywing van dinge wat tot die wêreldwye ramp sal lei. Net soos die lawakoepel en ander vulkaniese aanduidings die stadsamptenare in Sjimabara rede gegee het om dit ’n gevaargebied te verklaar, gee die Bybel ons rede om op ons hoede te wees en om ons voor te berei sodat ons behoue kan bly. Ons kan ’n les leer uit die tragedie by die berg Foegen en die erns besef van die gebeure wat nog voorlê.

[Foto-erkenning op bladsy 2]

VOORBLAD: Yomiuri/Orion Press/Sipa Press

[Foto-erkenning op bladsy 3]

Yomiuri/Orion Press/Sipa Press