Popocatepetl—Mexiko se majestueuse, dreigende vulkaan
DEUR ONTWAAK!-MEDEWERKER IN MEXIKO
HOE sal jy daarvan hou om langs ’n pragtige, dog dreigende, vulkaan te woon? Jy is dalk huiwerig om dit te doen. Hierdie situasie is nietemin ’n werklikheid vir duisende mense wat in dorpe om die majestueuse vulkaan Popocatepetl, in Mexiko, woon.
Die vulkaan se geskiedenis
Die naam in Nahuatl beteken “berg” of “heuwel wat rook”. Die berg is 5452 meter hoog en is geleë in die Sierra Nevada-bergreeks, in die staat Puebla, naby die grens van die state Mexiko en Morelos. Dit het ’n pragtige en majestueuse keëlvorm, met sneeu op die kruin die hele jaar deur. Hierdie indrukwekkende vulkaan het deur die jare heen die lewe van die landelike inwoners van die streek ontwrig deur sowat 16 keer tussen 1347 en 1927 uit te bars. Nie een van hierdie uitbarstings was egter noemenswaardig nie.
Die vulkaan is tussen twee groot stedelike gebiede geleë: die stad Puebla, 44 kilometer na die ooste, en die stad Mexiko, 70 kilometer noordwes daarvandaan. Daarbenewens is daar in die staat Puebla 307 dorpe, met ’n gesamentlike bevolking van 400 000, wat naby die vulkaan is. Hoewel nie al hierdie mense in hoërisikogebiede woon nie, sal ’n groot uitbarsting van Popocatepetl baie slegte ekonomiese en sosiale gevolge vir die gebied hê.
Teen die einde van 1994 was daar ’n aansienlike toename in die aktiwiteit van die vulkaan—in so ’n mate dat daar alarm gemaak is en mense dadelik die gebied begin ontruim het. Op 21 Desember 1994 het daar ten minste drie openinge aan die voet van die krater verskyn waar gas en stoom uitgekom het. Die asreën, wat tot by die stad Puebla geval het, was altesaam ongeveer 5000 ton. Die regering het toe ’n program in werking gestel om ongeveer 50 000 mense uit die gebied te ontruim, waarvan 30 000 in skuilings gehuisves is.
Jehovah se Getuies het ook daarop gereageer deur huisvesting te voorsien aan dié wat dit nodig gehad het. (Vergelyk Handelinge 4:32-35.) Die verslag van die Getuies se noodleningskomitee lui: “Ondanks die uur en die dringendheid van die situasie was die reaksie van die broers in die stad Puebla en omstreke uitstekend. Reëlings is getref om meer as 600 mense te huisves. ’n Televisiestasie het gesê: ‘Jehovah se Getuies het blitsvinnig opgetree. Hulle het hulle broers onmiddellik uit die gevaargebied verwyder.’”
Die vulkaan ontwaak
Volgens amptelike inligting is daar op Dinsdag, 5 Maart 1996, teen 3:50 vm., ’n skielike toename in die seismiese aktiwiteit van die vulkaan waargeneem, wat waarskynlik gelei het tot die opening van die groot kanale wat deur die gas en stoom van die aktiwiteit van 21 Desember 1994 gevorm is. Die foto’s en inligting wat verkry is, het bevestig dat hierdie kanale deur as verstop is, wat die druk binne-in die vulkaan laat toeneem het. Uiteindelik het hierdie druk toe die kanale weer oopgemaak.
Die koerant El Universal, van Dinsdag, 9 April 1996, het gesê: “Lawa het in die krater van die Popocatepetl uitgevloei, en gevolglik is die wetenskaplike gemeenskap en die Burgerlike Beskermingsowerheid in die lig van toenemende vulkaniese aktiwiteit in gereedheid gebring.” Die verslag het gesê dat die veranderinge “’n ‘koepelvorm’ aanneem wat daartoe sal lei dat die ‘kanale’ van die Popocatepetl in die loop van ’n paar maande sal vul, wat ’n uitwendige oorloop kan veroorsaak”.
Op Donderdag, 2 Mei 1996, is die aktiwiteit van die Popocatepetl-vulkaan in sy nuwe fase by ’n vergadering in die stad Puebla bespreek. Dr. Servando de la Cruz Reyna, ’n lid van die Instituut vir Geofisika aan die Nasionale Outonome Universiteit van Mexiko, het gesê: “Dit veroorsaak natuurlik groot kommer . . . Die moontlikheid bestaan altyd dat die vulkaan tot ’n meer ontplofbare fase sal oorgaan. Dit kan gebeur, en ons ontken dit geen oomblik nie.”
Volgens kritiek wat gelewer is, voel mense wat in die streek woon dat hulle nie duidelike riglyne ontvang het oor hoe om op te tree indien die vulkaan wel uitbars nie, al praat die regering oor behuisingsprogramme en ontruimings en hou hulle vergaderinge om die mense leiding te gee. By die bogenoemde vergadering het verskeie verteenwoordigers van dorpe naby die vulkaan byvoorbeeld beswaar gemaak omdat hulle nie weet na watter skuiling of skuilings hulle in geval van ’n ramp moet gaan nie.
Die waarskuwings wat die vulkaan uitstuur, moet ernstig opgeneem word. Verstandige mense sal ongetwyfeld alles moontlik doen om hulle lewe te beskerm, selfs ten koste van materiële dinge. Jehovah se Getuies wat in daardie gebied woon, het voorbereidsels getref om die streek te ontruim as dit nodig sou word. ’n Noodleningskomitee is aangewys om die Getuies in die gebied gereeld te besoek en riglyne te verskaf oor wat hulle in geval van ’n ramp kan doen. Party wat nader aan die gevaargebied woon, is aangemoedig om daardie streek te verlaat terwyl daar nog tyd is, aangesien die vulkanoloë onomwonde gewaarsku het dat die vulkaan ’n dreigende gevaar is. Elke gesin moet natuurlik self besluit wat hulle in hierdie verband gaan doen.
Op die oomblik lei mense wat in die omgewing van die vulkaan woon ’n normale lewe. Maar gesonde verstand vereis dat ’n mens wakker bly vir enige waarskuwing van die vulkaan of van die owerheid wat op ’n noodsituasie kan dui. Dit is nie verstandig om onverskillig te bly teenoor die majestueuse maar dreigende vulkaan Popocatepetl se waarskuwings nie.
[Venster op bladsy 20]
Wenke in geval van ’n ramp
Die Nasionale Sentrum vir die Voorkoming van Rampe het ’n lys voorsien met stappe wat gedoen moet word voordat ’n ramp plaasvind:
• Ken jou ontruimingsroete. (Soek hoë plekke, nie laagtes waarheen lawa, water of modder kan vloei nie)
• Hou ’n tas gereed met persoonlike dokumente, medisyne, water, nog ’n stel klere (verkieslik iets swaars wat die hele liggaam bedek), ’n hoed, ’n sakdoek om die neus en mond mee te bedek, ’n batterylamp, ’n radio, batterye en ’n kombers
• Tref reëlings met familielede wat alternatiewe huisvesting kan voorsien sodat julle nie van openbare skuilings gebruik hoef te maak nie
• Neem net die noodsaaklikste. Moenie troeteldiere of ander diere saamneem nie
• Weet waar die openbare skuilings is
• Skakel die elektrisiteit, gas en water af
• Bly kalm