‘O God, stuur u lig’
“Stuur u lig en u waarheid; laat dié my lei.”—PSALM 43:3.
1. Hoe openbaar Jehovah sy voornemens?
JEHOVAH is baie bedagsaam in die manier waarop hy sy voornemens aan sy knegte bekend maak. Hy openbaar die waarheid nie alles tegelyk in een verblindende flits nie, maar hy gee ons sy lig progressief. Ons lewensreis kan vergelyk word met iemand wat ’n lang voetslaanpad aandurf. Hy begin vroeg in die oggend stap en sien maar min. Namate die son stadig bo die horison begin verskyn, kan die voetslaner ’n paar dinge om hom onderskei. Die res sien hy net vaagweg. Maar namate die son verder opkom, kan hy al hoe verder sien. Dit is dieselfde met die geestelike lig wat God voorsien. Hy laat ons toe om ’n paar dinge op ’n slag te onderskei. God se Seun, Jesus Christus, het op ’n soortgelyke manier geestelike verligting voorsien. Kom ons kyk hoe Jehovah aan sy volk in die ou tyd lig voorsien het en hoe hy dit vandag doen.
2. Hoe het Jehovah in voor-Christelike tye lig voorsien?
2 Die seuns van Korag het heel waarskynlik die 43ste Psalm gekomponeer. As Leviete het hulle die voorreg gehad om die volk in God se Wet te onderrig (Maleagi 2:7, NW). Jehovah was natuurlik hulle Grootse Onderrigter, en hulle het na hom gekyk as die Bron van alle wysheid (Jesaja 30:20, NW). “O God, . . . stuur u lig en u waarheid”, het die psalmis gebid. “Laat dié my lei” (Psalm 43:1, 3). Terwyl die Israeliete getrou aan Jehovah was, het hy hulle sy weë geleer. Eeue later het Jehovah hulle met ’n absoluut merkwaardige soort lig en waarheid geseën. God het dit gedoen toe hy sy Seun na die aarde toe gestuur het.
3. Hoe is die Jode deur Jesus se lering getoets?
3 God se Seun was as die mens Jesus Christus “die lig van die wêreld” (Johannes 8:12). Hy het die mense “baie dinge deur illustrasies” geleer—nuwe dinge (Markus 4:2). Hy het vir Pontius Pilatus gesê: “My koninkryk is geen deel van hierdie wêreld nie” (Johannes 18:36). Dit was iets nuuts vir ’n Romein en beslis vir nasionalistiese Jode, want hulle het gedink dat die Messias die Romeinse Ryk sou onderwerp en Israel tot sy vorige heerlikheid sou herstel. Jesus het die lig van Jehovah af weerkaats, maar sy woorde het nie die Joodse heersers behaag wat “die heerlikheid van mense meer liefgehad [het] as selfs die heerlikheid van God” nie (Johannes 12:42, 43). Baie van die volk het verkies om eerder aan die oorleweringe van mense vas te hou as om die geestelike lig en waarheid van God af te aanvaar.—Psalm 43:3; Matteus 13:15.
4. Hoe weet ons dat die begrip van Jesus se dissipels nog verder verbreed sou word?
4 ’n Paar opregte manne en vroue het egter die waarheid wat Jesus geleer het met blydskap aangeneem. Hulle het God se voornemens voortdurend beter verstaan. Maar namate die einde van hulle Leermeester se aardse lewe nader gekom het, was daar nog baie dinge wat hulle moes leer. Jesus het vir hulle gesê: “Ek het nog baie dinge om vir julle te sê, maar julle kan dit nie nou dra nie” (Johannes 16:12). Ja, die dissipels se begrip van God se waarheid sou nog verder verbreed word.
Die lig hou aan skyn
5. Watter kwessie het in die eerste eeu ontstaan, en wie het die verantwoordelikheid gehad om dit op te los?
5 Ná Jesus se dood en opstanding het lig van God af helderder as tevore geskyn. In ’n visioen wat Petrus ontvang het, het Jehovah geopenbaar dat onbesnede nie-Jode van toe af volgelinge van Christus kon word (Handelinge 10:9-17). Dit was ’n openbaring! ’n Vraag het egter later ontstaan: Het Jehovah van hierdie nie-Jode verwag om besny te word nadat hulle Christene geword het? Hierdie vraag is nie in die visioen beantwoord nie, en die saak het ’n hewige geskilpunt onder Christene geword. Dit moes opgelos word, want dit kon hulle kosbare eenheid ondermyn. In Jerusalem het “die apostels en die ouer manne bymekaargekom om op hierdie aangeleentheid in te gaan”.—Handelinge 15:1, 2, 6.
6. Watter prosedure het die apostels en die ouer manne gevolg toe hulle die vraag oor die besnydenis bespreek het?
6 Hoe kon diegene wat by daardie vergadering was, bepaal wat God se wil vir gelowige nie-Jode was? Jehovah het nie ’n engel gestuur om die besprekings te lei nie, en hy het ook nie vir die aanwesiges ’n visioen gegee nie. Die apostels en ouer manne is nogtans nie heeltemal sonder leiding gelaat nie. Hulle het die getuienis ondersoek van sekere Joodse Christene wat gesien het hoe God sy handelinge met die mense van die nasies begin het deur sy heilige gees op onbesnede nie-Jode uit te stort. Hulle het ook die Skrif ondersoek vir leiding. Gevolglik het die dissipel Jakobus ’n aanbeveling op grond van ’n insiggewende teks gedoen. Namate hulle oor die getuienis nagedink het, het God se wil duidelik geword. Dit was nie nodig vir diegene van die nasies om besny te word sodat hulle Jehovah se goedkeuring kon geniet nie. Die apostels en die ouer manne het onmiddellik die besluit op skrif gestel sodat mede-Christene daardeur gelei kon word.—Handelinge 15:12-29; 16:4.
7. Watter vooruitgang het die eerste-eeuse Christene gemaak?
7 Anders as die Joodse godsdiensleiers, wat aan die oorleweringe van hulle voorvaders vasgehou het, was die meeste Joodse Christene verheug toe hulle hierdie merkwaardige nuwe begrip van God se voorneme met betrekking tot mense van die nasies ontvang het, al het dit vereis dat hulle hulle beskouing van nie-Jode oor die algemeen moes verander. Jehovah het hulle nederige gees geseën, en “die gemeentes [is] voortdurend standvastig gemaak in die geloof en het . . . van dag tot dag in getal bly toeneem”.—Handelinge 15:31; 16:5.
8. (a) Hoe weet ons dat meer lig te wagte was nadat die eerste eeu ten einde geloop het? (b) Watter gepaste vrae sal ons bespreek?
8 Geestelike lig het dwarsdeur die eerste eeu bly skyn. Maar Jehovah het nie elke aspek van sy voornemens aan die vroeë Christene geopenbaar nie. Die apostel Paulus het vir eerste-eeuse medegelowiges gesê: “Nou sien ons deur middel van ’n metaalspieël in vae omtrekke” (1 Korintiërs 13:12). So ’n spieël het nie die ideale oppervlak gehad om die beelde van voorwerpe te weerkaats nie. Geestelike lig sou dus eers in beperkte mate gesien kon word. Ná die dood van die apostels het die lig ’n tyd lank verdof, maar in onlangse tye het Bybelkennis weer vermeerder (Daniël 12:4). Hoe gee Jehovah vandag lig aan sy volk? En hoe moet ons reageer wanneer hy ons help om die Skrif beter te verstaan?
Die lig word al hoe helderder
9. Watter unieke en doeltreffende Bybelstudiemetode het die vroeë Bybelstudente gebruik?
9 In hedendaagse tye het die eerste straaltjie lig in die laaste kwart van die 19de eeu begin skyn toe ’n groep Christenmans en -vroue die Skrif ernstig begin bestudeer het. Hulle het ’n praktiese metode ontwikkel om die Bybel te bestudeer. Iemand het ’n vraag gestel; dan het die groep alle verwante Bybeltekste ondersoek. As dit gelyk het of een Bybelvers ’n ander een weerspreek, het hierdie opregte Christene die twee verse probeer versoen. Anders as die godsdiensleiers van daardie tyd was die Bybelstudente (soos Jehovah se Getuies destyds bekend was) vasbeslote om hulle deur die Heilige Skrif te laat rig, nie deur oorleweringe of leerstellings van mense nie. Nadat hulle alle beskikbare skriftuurlike bewyse ondersoek het, het hulle hulle bevindings neergeskryf. Op dié manier het hulle ’n duideliker begrip van talle basiese Bybelleerstellings gekry.
10. Watter leersame Bybelstudiehulpe het Charles Taze Russell geskryf?
10 Een van hierdie ywerige Bybelstudente was Charles Taze Russell. Hy het ’n reeks van ses leersame Bybelstudiehulpe geskryf met die titel Studies in the Scriptures. Broer Russell was van plan om ’n sewende deel te skryf, wat die Bybelboeke Esegiël en Openbaring sou verduidelik. “Sodra ek die sleutel vind”, het hy gesê, “sal ek Deel 7 skryf.” Maar hy het bygevoeg: “As die Here die sleutel vir iemand anders gee, kan hy dit skryf.”
11. Watter verband is daar tussen die regte tyd en ons begrip van God se voornemens?
11 Die stelling hierbo van C. T. Russell toon ’n faktor wat noodsaaklik is in ons begrip van sekere Skrifgedeeltes—die regte tyd. Broer Russell het geweet dat hy nie die lig kon dwing om op die boek Openbaring te skyn nie, net soos ’n gretige voetslaner nie die son kan aanpor om voor sy vasgestelde tyd op te kom nie.
Geopenbaar—maar op God se bestemde tyd
12. (a) Wanneer word Bybelprofesieë die duidelikste verstaan? (b) Watter voorbeeld toon dat ons vermoë om Bybelprofesieë te verstaan van God se tydrooster afhang? (Sien voetnoot.)
12 Net soos die apostels baie profesieë aangaande die Messias eers ná Jesus se dood en opstanding verstaan het, verstaan hedendaagse Christene Bybelprofesieë tot in die fynste besonderheid eers nadat dit vervul is (Lukas 24:15, 27; Handelinge 1:15-21; 4:26, 27). Openbaring is ’n profetiese boek, en daarom moet ons verwag dat ons dit eers duidelik sal verstaan wanneer die gebeure wat daarin voorspel word, plaasvind. C. T. Russell kon byvoorbeeld nie die betekenis van die simboliese skarlakenrooi wilde dier, waarvan Openbaring 17:9-11 praat, reg verstaan nie omdat die organisasies wat deur die dier voorgestel word, naamlik die Volkebond en die Verenigde Nasies, eers ná sy dood op die toneel verskyn het.a
13. Wat gebeur soms wanneer lig op ’n sekere Bybelonderwerp gewerp word?
13 Toe die vroeë Christene uitgevind het dat onbesnede nie-Jode medegelowiges kon word, het daardie verandering ’n nuwe vraag laat ontstaan, naamlik of mense van die nasies besny moes word. Dit het daartoe gelei dat die apostels en ouer manne die hele kwessie van die besnydenis weer moes ondersoek. Dit is vandag dieselfde. ’n Helder flits van lig op een Bybelonderwerp veroorsaak soms dat God se gesalfde knegte, “die getroue en verstandige slaaf”, verwante onderwerpe weer moet ondersoek, soos die volgende onlangse voorbeeld toelig.—Matteus 24:45.
14-16. Hoe het ’n aanpassing in ons beskouing oor die geestelike tempel ons begrip van Esegiël hoofstukke 40 tot 48 geraak?
14 In 1971 is ’n verduideliking van Esegiël se profesie gegee in die boek “Die nasies sal weet dat ek Jehovah is”—Hoe? ’n Hoofstuk in daardie boek het Esegiël se visioen van ’n tempel kortliks bespreek (Esegiël, hoofstukke 40-48). Die aandag is toe gevestig op hoe Esegiël se tempelvisioen in die nuwe wêreld vervul sal word.—2 Petrus 3:13.
15 Maar twee artikels wat in Die Wagtoring van 15 Februarie 1973 verskyn het, het ons begrip van Esegiël se visioen geraak. Dit het die groot geestelike tempel bespreek wat in Hebreërs hoofstuk 10 deur die apostel Paulus beskryf word. Die Wagtoring het verduidelik dat die Heilige en die binnehof van die geestelike tempel verband hou met die toestand van die gesalfdes terwyl hulle op die aarde is. Toe Esegiël hoofstukke 40 tot 48 jare later hersien is, is daar onderskei dat die tempel wat Esegiël in die visioen gesien het, net soos die geestelike tempel, vandag in werking moet wees. Hoe so?
16 In Esegiël se visioen word priesters gesien wat in die voorhowe van die tempel rondbeweeg terwyl hulle die niepriesterlike stamme bedien. Hierdie priesters stel ongetwyfeld die “koninklike priesterdom” voor, Jehovah se gesalfde knegte (1 Petrus 2:9). Maar hulle sal nie dwarsdeur die Duisendjarige Heerskappy van Christus in die tempel se aardse voorhof dien nie (Openbaring 20:4). Die gesalfdes sal God gedurende die grootste deel van daardie tydperk, indien nie die hele tydperk nie, in die Allerheiligste van die geestelike tempel, “die hemel self”, dien (Hebreërs 9:24). Aangesien Esegiël gesien het dat priesters in die voorhowe van die tempel rondbeweeg, word daardie visioen klaarblyklik vandag vervul, terwyl sommige van die gesalfdes nog op die aarde is. Daarom het ’n gewysigde beskouing oor hierdie onderwerp in die nommer van 1 Maart 1999 van hierdie tydskrif verskyn. Reg tot aan die einde van die 20ste eeu is geestelike lig dus op Esegiël se profesie gewerp.
Wees bereid om jou sienswyse te verander
17. Watter veranderinge het jy in jou sienswyse gemaak vandat jy kennis van die waarheid opgedoen het, en hoe het jy daarby baat gevind?
17 Enigiemand wat graag kennis van die waarheid wil verkry, moet bereid wees om “elke gedagte in gevangenskap [te bring] om dit aan die Christus gehoorsaam te maak” (2 Korintiërs 10:5). Dit is nie altyd maklik nie, veral wanneer ’n mens diep gevestigde menings het. Byvoorbeeld, voordat jy God se waarheid geleer het, het jy dit dalk geniet om sekere godsdienstige vakansiedae saam met jou gesin te vier. Nadat jy die Bybel begin studeer het, het jy besef dat hierdie feesvieringe in werklikheid van heidense oorsprong is. Jy was dalk eers teësinnig om toe te pas wat jy geleer het. Maar later het jou liefde vir God godsdienssentiment oorwin, en jy het opgehou om aan feesvieringe deel te neem wat God mishaag. Het Jehovah nie jou besluit geseën nie?—Vergelyk Hebreërs 11:25.
18. Hoe moet ons reageer wanneer ons Bybelwaarhede beter verstaan?
18 Ons vind altyd daarby baat as ons dinge op God se manier doen (Jesaja 48:17, 18). Laat ons ons dus verheug in die vooruitgang van waarheid wanneer ons ’n gedeelte in die Bybel beter verstaan! Die feit dat ons voortdurend meer lig kry, bevestig inderdaad dat ons op die regte pad is. Dit is “die pad van die regverdiges”, wat “soos die lig van die môreglans [is], wat al helderder word tot die volle dag toe” (Spreuke 4:18). Op die oomblik sien ons weliswaar sekere aspekte van God se voorneme “in vae omtrekke”. Maar wanneer God se bestemde tyd aanbreek, sal ons die waarheid in sy volle prag sien, mits ons voete standvastig gebly het op “die pad”. Mag ons ons intussen verheug oor die waarhede wat Jehovah duidelik gemaak het, terwyl ons wag dat lig gewerp word op die waarhede wat nog nie duidelik verstaan word nie.
19. Wat is een manier om te toon dat ons die waarheid liefhet?
19 Hoe kan ons ons liefde vir die lig op ’n praktiese manier bewys? Een manier is deur God se Woord gereeld te lees—elke dag, indien moontlik. Lees jy die Bybel gereeld? Die Wagtoring en Ontwaak! voorsien ons ook van ’n oorvloed heilsame geestelike voedsel om te geniet. Dink ook aan die boeke, brosjures en ander publikasies wat tot ons nut saamgestel is. En wat van die bemoedigende verslae oor die Koninkrykspredikingswerk wat in die Yearbook of Jehovah’s Witnesses gepubliseer word?
20. Watter verband is daar tussen die lig en waarheid wat van Jehovah af kom en ons bywoning van Christelike vergaderinge?
20 Ja, Jehovah het die gebed in Psalm 43:3 op ’n wonderlike manier beantwoord. Aan die einde van hierdie vers lees ons: “Laat [u lig en waarheid] my bring na u heilige berg en na u woninge.” Sien jy daarna uit om Jehovah saam met ’n menigte ander te aanbid? Die geestelike onderrigting wat by ons vergaderinge gegee word, is ’n belangrike manier waarop Jehovah vandag geestelike lig voorsien. Wat kan ons doen om ons waardering vir Christelike vergaderinge te vergroot? Ons nooi jou om hierdie onderwerp biddend te ondersoek in die volgende artikel.
[Voetnoot]
a Ná C. T. Russell se dood is ’n publikasie wat die sewende deel van Studies in the Scriptures genoem is, saamgestel in ’n poging om ’n verduideliking van die boeke Esegiël en Openbaring te gee. Die boek was deels gebaseer op Russell se kommentare oor hierdie Bybelboeke. Maar die tyd om die betekenis van hierdie profesieë te openbaar, het toe nog nie aangebreek nie, en die verduideliking wat in daardie deel van Studies in the Scriptures gegee is, was oor die algemeen vaag. In die daaropvolgende jare het Jehovah se onverdiende goedhartigheid, sowel as dinge wat in die wêreld plaasgevind het, Christene ’n akkurater begrip van die betekenis van hierdie profetiese boeke laat verkry.
Kan jy antwoord?
• Waarom openbaar Jehovah sy voornemens progressief?
• Hoe het die apostels en ouer manne in Jerusalem die geskil oor die besnydenis opgelos?
• Watter Bybelstudiemetode het die vroeë Bybelstudente aangeneem, en waarom was dit uniek?
• Lig toe hoe geestelike lig op God se bestemde tyd geopenbaar word.
[Prent op bladsy 12]
Charles Taze Russell het geweet dat lig op God se bestemde tyd op die boek Openbaring gewerp sou word