’n Uitroep om hulp

“GOD het my vergeet!” het ’n Brasiliaanse vrou uitgeroep. Ná die skielike dood van haar man het sy gevoel dat haar lewe nie meer sin het nie. Het jy al ooit iemand probeer vertroos wat só erg ontsteld is of wat dalk om hulp uitroep?

Party word so mismoedig dat hulle selfmoord pleeg—en baie van hulle is jongmense. Volgens die koerant Folha de S. Paulo toon ’n studie in Brasilië dat “selfmoord onder jongmense met 26 persent vermeerder het”. Neem byvoorbeeld die geval van Walter,a ’n jong man in Sao Paulo. Hy het nie ouers gehad nie, ook nie ’n huis, privaatheid of vriende op wie hy kon staatmaak nie. Walter het besluit om van ’n brug af te spring om ’n einde aan sy ellende te maak.

’n Enkelmoeder, Edna, het reeds twee kinders gehad toe sy ’n ander man ontmoet het. Ná net ’n maand het hulle begin saamlewe in die huis van sy ma, wat spiritisme beoefen het en ’n alkoholis was. Edna het toe nog ’n baba gehad, te veel begin drink en so neerslagtig geraak dat sy selfmoord probeer pleeg het. Uiteindelik het sy toesig oor haar kinders verloor.

Wat van bejaarde mense? Maria was altyd lewenslustig en lief vir gesels. Maar namate sy ouer geword het, het sy haar begin bekommer oor haar werk as ’n verpleegster omdat sy bang was dat sy foute sou maak. Dit het haar depressief laat voel. Nadat sy haarself probeer behandel het, het sy mediese hulp gaan kry, en dit het gelyk of die behandeling help. Maar toe sy op die ouderdom van 57 haar werk verloor, het sy weer so depressief geraak dat sy geen uitweg kon sien nie. Maria het daaraan begin dink om selfmoord te pleeg.

“Sowat 10 persent van mense wat depressief is, probeer selfmoord pleeg”, sê professor José Alberto Del Porto van die Universiteit van Sao Paulo. “Dit is moeilik om te glo dat meer mense weens selfmoord gesterf het as weens moord, maar dit is ongelukkig ’n feit”, berig die Amerikaanse geneesheer-generaal, dr. David Satcher.

Soms is ’n selfmoordpoging as ’t ware ’n uitroep om hulp. En gesinslede en vriende wil seer sekerlik die regte ding doen vir die persoon wat wanhopig geraak het. Dit sal natuurlik nie help om uitdrukkings te gebruik soos: “Hou op om jouself te bejammer”, “Baie mense is erger daaraan toe as jy” of “Ons almal het nou en dan ’n slegte dag” nie. Wees eerder ’n ware vriend en ’n goeie luisteraar. Ja, probeer om die wanhopige persoon te help om te sien dat die lewe die moeite werd is.

Die Franse skrywer Voltaire het geskryf: “Die man wat vandag weens neerslagtigheid selfmoord pleeg, sou wou lewe as hy ’n week gewag het.” Wel, wat kan mense wat wanhopig is help besef dat die lewe die moeite werd is?

[Voetnoot]

[Prent op bladsy 3]

Al hoe meer jongmense en volwassenes pleeg selfmoord

[Prent op bladsy 4]

Hoe kan jy iemand help wat wanhopig geraak het?