Binnekort—’n Wêreld sonder wanhoop

DIE lewe raak al hoe veeleisender, en daar is baie redes vir wanhoop. Wanneer ons gefrustreerd is, is dit dalk vir ons moeilik om ons emosies te beheer. Selfs mense wat die lewe liefhet, kan bitter ongelukkig raak! Kyk na ’n paar voorbeelde.

In die ou tyd het die profeet Moses so mismoedig geraak dat hy vir God gesê het: “Slaan my dan maar liewer dood as ek genade in u oë gevind het, en laat ek my ongeluk nie aansien nie” (Numeri 11:15). Toe die profeet Elia van sy vyande gevlug het, het hy uitgeroep: “Dit is genoeg, neem nou my siel [lewe] weg, HERE” (1 Konings 19:4). En die profeet Jona het gesê: “o HERE, neem dan nou tog my siel van my weg, want dit is vir my beter om te sterwe as om te lewe” (Jona 4:3). Maar nie Moses, Elia of Jona het selfmoord gepleeg nie. Hulle het almal God se gebod geken: “Jy mag nie doodslaan nie” (Exodus 20:13). Omdat hulle sterk geloof in God gehad het, het hulle geweet dat geen situasie hopeloos is nie en dat die lewe ’n gawe van God is.

Wat van die probleme waarvoor ons nou te staan kom? Buiten emosionele angs of fisiese probleme moet ons soms slegte behandeling deur gesinslede, bure of werksmaats verduur. Die Bybel praat van mense wat vervul is met “alle onregverdigheid, goddeloosheid, hebsug, slegtheid, vol afguns, moord, twis, bedrog, kwaadaardigheid, fluisteraars, kwaadsprekers, haters van God, onbeskaamd, hoogmoedig, aanmatigend, uitvinders van skadelike dinge, ongehoorsaam aan ouers, sonder begrip, ontrou aan ooreenkomste, sonder natuurlike geneentheid, onbarmhartig” (Romeine 1:28-31). Aangesien ons dag na dag deur sulke mense omring word, kan dit die lewe na ’n las laat lyk. Hoe kan ons diegene help wat vertroosting en verligting nodig het?

Wees gewillig om te luister

Teëspoed en lyding kan veroorsaak dat ’n persoon sy verstandelike ewewig verloor. Die wyse man het gesê: “Onderdrukking kan ’n wyse waansinnig laat optree” (Prediker 7:7, NW). Iemand wat oor selfmoord praat, moet dus ernstig opgeneem word. Die probleme wat hy ondervind, hetsy dit emosioneel, fisies, verstandelik of geestelik is, vereis dalk onmiddellike aandag. Daar is natuurlik ’n verskeidenheid professionele behandelings en terapieë, en elkeen moet persoonlik besluit oor die soort terapie wat hy verkies.—Galasiërs 6:5.

Wat ook al die rede vir selfmoordneigings is, dit kan wel ’n verskil maak as iemand ’n simpatieke, geduldige persoon wat begrip toon in sy vertroue kan neem. Gesinslede en vriende wat gewillig is om te luister, sal dalk kan help. Buiten meegevoel en goedhartigheid kan opbouende gedagtes uit God se Woord ook baie nuttig wees vir diegene wat wanhopig geraak het.

Geestelike hulp vir die wanhopiges

Dit sal jou dalk verbaas om te sien hoe aanmoedigend Bybellees kan wees. Hoewel die Bybel nie ’n handleiding oor geestesgesondheid is nie, kan dit ons help om die lewe te waardeer. Koning Salomo het gesê: “So het ek dan ingesien dat daar niks beters onder hulle is nie as om bly te wees en om goed te doen in die lewe. En ook—dat elke mens eet en drink en die goeie geniet by al sy moeitevolle arbeid; dit is ’n gawe van God” (Prediker 3:12, 13). Benewens bevredigende werk wat die lewe sin gee, kan ons eenvoudige dinge geniet—soos vars lug, sonlig, blomme, bome en voëls—wat gawes van God af is.

Wat selfs bemoedigender is, is die Bybel se versekering dat Jehovah God en sy Seun, Jesus Christus, besorg is oor ons (Johannes 3:16; 1 Petrus 5:6, 7). Die psalmis het gepas gesê: “Mag Jehovah geseënd wees, wat daagliks die vrag vir ons dra, die ware God van ons redding” (Psalm 68:19, NW). Hoewel ons dalk onbelangrik en onwaardig voel, nooi God ons om tot hom te bid. Wees verseker dat niemand wat hom nederig en opreg om hulp vra, verag sal word nie.

Niemand kan vandag tereg ’n lewe sonder probleme verwag nie (Job 14:1). En tog het die waarheid uit God se Woord baie mense gehelp om te besef dat selfmoord nie die regte manier is om hulle probleme op te los nie. Beskou byvoorbeeld hoe die apostel Paulus ’n wanhopige tronkbewaarder gehelp het wat, toe hy “uit die slaap wakker geword het en gesien het dat die gevangenisdeure oop was, . . . sy swaard getrek en op die punt gestaan [het] om homself om die lewe te bring, onder die indruk dat die gevangenes ontsnap het”. Hierdie tronkbewaarder het onmiddellik tot die slotsom gekom dat selfmoord beter is as om ’n vernederende en miskien langgerekte dood te sterf weens sy nalatigheid. Die apostel het uitgeroep: “Moenie jouself kwaad aandoen nie, want ons is almal hier!” Paulus het dit toe nie net daarby gelaat nie. Trouens, hy en Silas het die tronkbewaarder bemoedig en gereageer op sy vraag: “Menere, wat moet ek doen om gered te word?” Hulle het geantwoord: “Glo in die Here Jesus en jy sal gered word, jy en jou huisgenote.” Toe het hulle Jehovah se woord aan hom en sy huisgenote verkondig, met die gevolg dat “hy en sy huis . . . onverwyld gedoop” is. Daardie tronkbewaarder en sy hele huisgesin was baie verheug, en hulle lewe het nuwe betekenis aangeneem.—Handelinge 16:27-35.

Wat ’n verligting is dit vandag tog om te weet dat God nie vir goddeloosheid verantwoordelik is nie! Sy Woord identifiseer ’n bose gees, “die een wat Duiwel en Satan genoem word”, as die een wat “die hele bewoonde aarde mislei”. Maar sy tyd raak min (Openbaring 12:9, 12). Binnekort gaan al die probleme wat Satan en sy demone vir die aarde se bewoners veroorsaak het deur middel van Goddelike ingryping tot ’n einde kom. Dan sal God se beloofde nuwe wêreld van regverdigheid ’n permanente einde maak aan die oorsake van wanhoop en selfmoord.—2 Petrus 3:13.

Vertroosting vir diegene wat om hulp roep

Dié wat wanhopig is, kan nou reeds vertroosting uit die Skrif put (Romeine 15:4). Die psalmis Dawid het gesing: “’n Gebroke en verslae hart sal U, o God, nie verag nie!” (Psalm 51:19). Dit is weliswaar onvermydelik dat ons voor sekere beproewinge te staan sal kom en die gevolge van onvolmaaktheid sal ervaar. Maar as ons juiste kennis van ons goedhartige, liefdevolle en redelike hemelse Vader inneem, sal dit ons die versekering gee dat ons kosbaar is in sy oë. God kan ons grootste Vriend en Onderrigter word. As ons ’n intieme verhouding met Jehovah God opbou, sal hy ons nooit teleurstel nie. “Ek is die HERE jou God,” sê ons Skepper, “wat jou leer wat heilsaam is, wat jou lei op die weg wat jy moet gaan.”—Jesaja 48:17.

Vertroue op God het baie mense gehelp. Ter toeligting: Mara se kragte was reeds deur langdurige depressie afgetakel toe sy haar enigste seun in ’n motorongeluk verloor het.a Sy was só ontsteld dat sy haar eie lewe probeer neem het. Maar nou staan sy elke dag vroeg op om na haar huiswerk om te sien. Sy geniet dit om na musiek te luister en ander te help. Die hoop dat “daar ’n opstanding van die regverdiges sowel as die onregverdiges gaan wees”, het van die pyn verlig wat deur die tragiese dood van haar geliefde seun veroorsaak is en het haar geloof in God versterk (Handelinge 24:15). Aangesien Mara nooit die begeerte gehad het om soos ’n engel in die hemel te word nie, het die woorde in Psalm 37:11 haar hart geraak: “Die ootmoediges daarenteen sal die aarde besit en hulle verlustig oor groot vrede.”

’n Ander Brasiliaanse vrou, Sandra, het hard probeer om die volmaakte ma vir haar drie kinders te wees. Sy erken: “Ek was so besig dat ek nie eers daaraan gedink het om tot God te bid vir hulp toe my pa skielik oorlede is en ek terselfdertyd uitgevind het dat my man ’n verhouding met ’n ander vrou het nie.” Uit wanhoop het Sandra selfmoord probeer pleeg. Wat het haar gehelp om te herstel? Haar waardering vir geestelike dinge. “Elke aand voor ek gaan slaap, lees ek die Bybel, en ek probeer my vereenselwig met die mense van wie ek lees. Ek lees ook Die Wagtoring en Ontwaak!, en ek hou veral van die lewensverhale omdat hulle my help om tevrede te wees met my lot in die lewe.” Omdat sy weet dat Jehovah haar beste vriend is, het sy geleer om spesifiek te wees in haar gebede.

’n Toekoms sonder wanhoop

Wat ’n vertroosting is dit tog om te weet dat menselyding tydelik is! Onder die heerskappy van God se Koninkryk sal kinders en volwassenes wat nou die slagoffers van misdaad, ongeregtigheid of vooroordeel is gelukkig wees. Soos voorspel is in ’n profetiese psalm, sal Jehovah se aangestelde Koning, Jesus Christus, “die behoeftige red wat daar roep om hulp, en die ellendige en wie geen helper het nie”. Daarbenewens “sal [hy] hom ontferm oor die arme en behoeftige, en die siele van die behoeftiges sal hy red”. Om die waarheid te sê, “hy sal hulle siel verlos van verdrukking en geweld, en hulle bloed sal kosbaar wees in sy oë”.—Psalm 72:12-14.

Die tyd vir die vervulling van hierdie profetiese woorde is op hande. Is die gedagte dat ons die ewige lewe op aarde onder sulke omstandighede gaan geniet vir jou aanloklik? Indien wel, het jy alle rede om vreugdevol te wees en om die lewe as ’n gawe van God te waardeer. En as jy vir ander van hierdie vertroostende skriftuurlike beloftes vertel, kan jy die lewe van dié wat in hierdie gevoellose, liefdelose wêreld om hulp roep met groot geluk vul.

[Voetnoot]

[Prent op bladsy 6]

Daar is vandag baie redes om gelukkig te wees

[Prent op bladsy 7]

Sien jy uit na ’n wêreld sonder wanhoop?