Is die Bybel se sedes die beste?

“DIE samelewing het ’n raamwerk van basiese waardes nodig wat aan sy lede sekerheid en leiding gee.” Dit was die kommentaar van ’n ervare Duitse skrywer en televisie-aanbieder. Dit maak beslis sin. Die mensegemeenskap kan slegs bestendig en voorspoedig wees as mense algemeen aanvaarde standaarde as grondslag het wat identifiseer wat reg of verkeerd, goed of sleg, is. Die vraag is: Watter standaarde is die beste, vir die samelewing sowel as sy lede?

As die sedelike waardes in die Bybel die standaarde is wat aangeneem word, behoort dit individue te help om ’n bestendige, gelukkige lewe te lei. Dit sou, by uitbreiding, die mensegemeenskap wat daardie waardes naleef gelukkiger en bestendiger maak. Is dit die geval? Kom ons ondersoek wat die Bybel oor twee belangrike kwessies sê: getrouheid in die huwelik en eerlikheid in die daaglikse lewe.

Bly getrou aan jou huweliksmaat

Ons Skepper het eers vir Adam geskep en toe Eva as sy metgesel gemaak. Hulle verbintenis was die eerste huwelik in die geskiedenis en moes ’n blywende verhouding wees. God het gesê: “Die man [sal] sy vader en moeder verlaat en sy vrou aankleef.” Ongeveer 4 000 jaar later het Jesus Christus hierdie huwelikstandaard vir al sy volgelinge herhaal. Hy het ook geslagsomgang buite die huwelik veroordeel.—Genesis 1:27, 28; 2:24; Matteus 5:27-30; 19:5.

Volgens die Bybel is liefde en respek van albei huweliksmaats se kant twee belangrike sleutels tot ’n gelukkige huwelik. Die man, wat die hoof van die huisgesin is, moet onselfsugtige liefde openbaar deur sy vrou se belange op die hart te dra. Hy moet “ooreenkomstig kennis” met haar saamlewe en nie “bitter kwaad” vir haar word nie. Die vrou moet haar man met “diep respek” behandel. As huweliksmaats hierdie beginsels volg, kan die meeste huweliksprobleme vermy of die hoof gebied word. Die man sal graag getrou wil bly aan sy vrou en die vrou aan haar man.—1 Petrus 3:1-7; Kolossense 3:18, 19; Efesiërs 5:22-33.

Dra die Bybel se standaard van getrouheid aan ’n mens se huweliksmaat by tot ’n gelukkige huwelik? Wel, beskou byvoorbeeld die resultate van ’n opname wat in Duitsland gedoen is. Daar is vir mense gevra watter faktore belangrik is vir ’n suksesvolle huwelik. Boaan die lys was wedersydse getrouheid. Sal jy nie saamstem dat getroude mense baie gelukkiger is as hulle weet dat hulle huweliksmaat getrou is nie?

Sê nou probleme ontstaan?

Maar sê nou ’n man en vrou het ernstige meningsverskille? Sê nou hulle liefde vir mekaar verflou? Is dit onder sulke omstandighede nie beter om die huwelik te beëindig nie? Of maak die Bybel se standaard van getrouheid aan ’n mens se huweliksmaat dan nog steeds sin?

Bybelskrywers het besef dat alle egpare probleme sal hê as gevolg van menslike onvolmaaktheid (1 Korintiërs 7:28). Tog probeer egpare wat die Bybel se sedelike standaarde volg, om mekaar te vergewe en om hulle probleme saam op te los. Daar is natuurlik sekere omstandighede—soos egbreuk of liggaamlike mishandeling—wanneer ’n Christen dalk gepas ’n skeiding of egskeiding sal oorweeg (Matteus 5:32; 19:9). Maar om ’n huwelik oorhaastig te beëindig sonder ’n baie ernstige rede of sodat jy met iemand anders kan trou, openbaar selfsugtige minagting vir ander. Dit bring beslis nie bestendigheid of geluk in ’n mens se lewe mee nie. Kom ons kyk na ’n voorbeeld.

Pieter het agtergekom dat sy huwelik nie meer so gelukkig was soos voorheen nie.a Daarom het hy sy vrou verlaat en by Monika ingetrek, wat ook haar man verlaat het. Hoe het sake verloop? Binne ’n paar maande het Pieter erken dat die lewe saam met Monika “nie heeltemal so maklik is as wat ek gedink het dit sou wees nie”. Waarom nie? Menslike tekortkominge was net so duidelik in sy nuwe verhouding as wat dit in die vorige een was. Om sake te vererger, het sy oorhaastige en selfsugtige besluit hom ernstige finansiële probleme op die hals gehaal. Daarbenewens was Monika se kinders emosioneel verpletter deur die drastiese verandering in hulle gesinslewe.

Soos hierdie ondervinding toelig, is die oplossing wanneer ’n huwelik deur ’n stormagtige tyd gaan, beslis nie om jou huweliksmaat in die steek te laat nie. As huweliksmaats daarenteen volgens die sedelike waardes van God se Woord, die Bybel, lewe, kan dit dikwels ’n huwelik deur ’n stormagtige tydperk behoue laat bly en dit ’n rustiger tyd laat ingaan. Dit was die geval met Thomas en Doris.

Thomas en Doris was meer as 30 jaar getroud toe Thomas straf begin drink het. Doris het heeltemal neerslagtig geword, en hulle twee het oor ’n egskeiding begin praat. Doris het een van Jehovah se Getuies in haar vertroue geneem. Die Getuie het vir Doris gewys wat die Bybel oor die huwelik sê en haar aangemoedig om nie oorhaastig haar man te verlaat nie, maar eers saam met haar man ’n oplossing te probeer vind. Dit is wat Doris gedoen het. Binne ’n paar maande het hulle nie meer aan ’n egskeiding gedink nie. Thomas en Doris het saam hulle probleme probeer oplos. Omdat hulle Bybelraad toegepas het, is hulle huweliksband versterk en het dit hulle tyd gegee om sake uit te stryk.

Eerlikheid in alles

Om getrou aan ’n mens se huweliksmaat te bly, vereis karaktervastheid en ’n liefde vir beginsels. Dieselfde eienskappe is nodig om eerlik te bly in ’n oneerlike wêreld. Die Bybel praat baie oor eerlikheid. Die apostel Paulus het aan eerste-eeuse Christene in Judea geskryf: ‘Ons wil ons in alles eerlik gedra’ (Hebreërs 13:18). Wat beteken dit?

Iemand wat eerlik is, is waarheidliewend en vry van bedrog. Hy behandel ander regverdig—openhartig, opreg, nie bedrieglik of misleidend nie. Wat meer is, ’n eerlike persoon is onkreukbaar en iemand wat nie sy medemens kul nie. Eerlike mense dra by tot ’n klimaat van vertroue, wat tot heilsame gesindhede lei en sterk menseverhoudings bevorder.

Is eerlike mense gelukkig? Wel, hulle het rede om gelukkig te wees. Ondanks—of moontlik weens—die algemene voorkoms van korrupsie en bedrog word eerlike mense gewoonlik deur ander bewonder. Volgens ’n opname wat onder jongmense gedoen is, word eerlikheid deur 70 persent van die respondente as ’n baie belangrike deug beskou. Daarbenewens is eerlikheid, ongeag hoe oud ons is, ’n vername vereiste vir diegene wat ons as vriende beskou.

Christine is geleer om te steel vandat sy 12 jaar oud was. Deur die jare heen het sy ’n bedrewe sakkeroller geword. “Daar was dae dat ek met tot DM 5 000 [R17 000] kontant huis toe gekom het”, verduidelik sy. Maar Christine is ’n hele paar keer in hegtenis geneem, en sy het voortdurend gevaar geloop om in die tronk te beland. Toe Jehovah se Getuies vir haar verduidelik het wat die Bybel oor eerlikheid sê, het die Bybel se sedelike standaarde Christine aangetrek. Sy het geleer om die vermaning te gehoorsaam: “Laat die steler nie meer steel nie.”—Efesiërs 4:28.

Teen die tyd dat Christine as een van Jehovah se Getuies gedoop is, was sy nie meer ’n dief nie. Sy het probeer om in alles eerlik te wees, aangesien die Getuies groot klem op eerlikheid en ander Christelike eienskappe lê. Die koerant Lausitzer Rundschau berig: “Sedes soos eerlikheid, matigheid en naasteliefde word in die geloof van die Getuies as baie belangrik beskou.” Hoe voel Christine oor die verandering in haar lewe? “Ek is nou baie gelukkiger vandat ek opgehou het om te steel. Ek voel dat ek ’n eerbare lid van die samelewing is.”

Die hele samelewing vind baat

Mense wat getrou aan hulle huweliksmaat is en wat eerlik is, is nie net self gelukkiger nie, maar is ook ’n aanwins vir die samelewing oor die geheel. Werkgewers verkies werkers wat nie kul nie. Ons almal hou daarvan om betroubare bure te hê, en ons hou daarvan om inkopies te doen by winkels wat deur eerlike sakemanne bestuur word. Respekteer ons nie politici, polisiemanne en regters wat korrupsie vermy nie? Die gemeenskap vind grootliks daarby baat wanneer die lede daarvan hulle eerlik gedra as ’n saak van beginsel, nie net wanneer dit hulle pas nie.

Daarbenewens is getroue huweliksmaats die grondslag van bestendige gesinne. En die meeste mense sal met die Europese politikus saamstem wat gesê het: “Die [tradisionele] gesin bly tot vandag toe nog die belangrikste toevlug waar ’n mens veiligheid en sin in die lewe vind.” Die vreedsame gesinseenheid is waar volwassenes en kinders die grootste geleentheid het om emosioneel veilig te voel. Diegene wat getrou in die huwelik is, help dus om ’n bestendige samelewing op te bou.

Dink net hoeveel almal daarby baat sou vind as daar geen geskeide huweliksmaats, skeihowe of hofsake oor kindertoesig was nie. En sê nou daar is geen sakkerollers, winkeldiewe, verduisteraars, korrupte amptenare of oneerlike wetenskaplikes meer nie? Klink dit na net ’n droom? Nie vir diegene wat opreg belangstel in die Bybel en wat dit oor ons toekoms sê nie. God se Woord beloof dat Jehovah se Messiaanse Koninkryk binnekort heerskappy oor die hele mensegemeenskap op die aarde gaan oorneem. Onder daardie Koninkryk sal al die onderdane geleer word om in ooreenstemming met die Bybel se sedelike standaarde te lewe. Dan sal “die regverdiges . . . die aarde besit en vir ewig daarop woon”.—Psalm 37:29.

Die Bybel se sedes is die beste

Miljoene mense wat die Heilige Skrif ondersoek het, het tot die besef gekom dat Bybelraad gegrond is op Goddelike wysheid, wat ver bo menslike denke verhewe is. Hierdie mense beskou die Bybel as betroubaar en toepaslik vir lewe in ons moderne wêreld. Hulle weet dat dit hulle tot voordeel strek om gehoor te gee aan die raad in God se Woord.

Hierdie persone neem dus dié Bybelraad ter harte: “Vertrou op die HERE met jou hele hart en steun nie op jou eie insig nie. Ken Hom in al jou weë, dan sal Hý jou paaie gelykmaak” (Spreuke 3:5, 6). Sodoende verbeter hulle hulle eie lewe in groot mate, en hulle het ook ’n heilsame uitwerking op diegene om hulle. En hulle ontwikkel ’n vaste vertroue in “die toekomstige lewe”, wanneer die hele mensdom volgens die Bybel se sedelike standaarde sal lewe.—1 Timoteus 4:8.

[Voetnoot]

[Lokteks op bladsy 5]

As huweliksmaats volgens Bybelstandaarde lewe, kan dit dikwels ’n huwelik deur ’n stormagtige tydperk behoue laat bly en dit ’n rustiger tyd laat ingaan

[Lokteks op bladsy 6]

Ondanks—of moontlik weens—die algemene voorkoms van korrupsie en bedrog word eerlike mense gewoonlik deur ander bewonder