Die huidige beheptheid met “heiliges”

“Onthou die tyd toe helde ons nie meer beïndruk het nie? Maar hierdie gevoel het blykbaar nie gegeld vir die 4,2 miljoen Amerikaners wat op 13 Sept. na die begrafnis van Moeder Teresa gekyk het nie. Sedert haar dood op 5 Sept. het mense die Vatikaan oorval met versoeke om haar amptelik as ’n heilige te verklaar. Min mense twyfel daaraan dat dit sal gebeur.”—Sun-sentinel, Verenigde State, 3 Oktober 1997.

BAIE mense beskou die Katolieke sendeling Moeder Teresa se humanitêre en liefdadigheidswerk as dit wat werklik van iemand ’n heilige maak. Ander godsdienste het ook hulle heldefigure. Maar nie een van hulle word amptelik erken soos dié wat deur die Rooms-Katolieke Kerk heilig verklaar word nie.

Pous Johannes-Paulus II het oor die 450 mense gedurende sy pouslike heerskappy heilig verklaar, meer as wat deur al die ander pouse van die 20ste eeu saam heilig verklaar is.a Waarom duur hierdie verering van “heiliges” voort, al is baie van hulle redelik onbekend by Katolieke oor die algemeen?

Die teoloog Lawrence Cunningham van die Universiteit van Notre Dame verduidelik: “Die idee dat daar heiligheid in die wêreld is, prikkel mense se belangstelling. Heiliges toon dat daar, selfs vandag nog, helde kan wees.” Boonop glo baie dat “heiliges” spesiale toegang tot God het, sodat hulle doeltreffend voorspraak vir die lewendes kan maak. Wanneer relieke of die stoflike oorskot van ’n “heilige” gevind word, word dit vereer omdat daar geglo word dat dit krag besit.

Die Kategismus van die Konsilie van Trente, wat in die 16de eeu gepubliseer is om Katolieke dogma te herbevestig, het bepaal: “Ons kan tereg die gevolgtrekking maak dat die eer wat gegee word aan die heiliges ‘wat ontslaap het in die Here’, die bedes om hulle voorspraak en die verering van hulle as en heilige relieke, hoegenaamd nie afbreuk doen aan die heerlikheid wat aan God gegee word nie, maar eerder grootliks daartoe bydra, na die mate waarin die Christen se hoop daardeur verlewendig en versterk word en hy aangespoor word om hulle deugde na te volg” (The Catechism of the Council of Trent, 1905). Ware Christene wil beslis goeie lewens lei, God op die regte manier nader en sy hulp ontvang (Jakobus 4:7, 8). Wie is dus, volgens God se Woord, werklik heiliges? En watter rol speel hulle?

[Voetnoot]