Beskou sake vanuit God se standpunt

IN NEW YORK, VSA, was 14 September 2002 ’n warm, sonnige dag. Op daardie dag het ’n internasionale skare van 6 521 by die Onderrigsentrum in Patterson byeengekom, asook by twee ander komplekse van Jehovah se Getuies in die omgewing. Die skare het bymekaargekom vir die graduering van die 113de klas van die Wagtoring-Bybelskool Gilead. Die studente was uit 14 lande afkomstig en is die afgelope vyf maande voorberei vir sendingdiens in die 19 lande waarheen hulle gestuur sou word.

Carey Barber, in sy 98ste lewensjaar en ’n lid van die Bestuursliggaam van Jehovah se Getuies, het as voorsitter van die program gedien. Hy het die aandag gevestig op die byna 60 jaar lange nalatenskap van die Gileadskool, wat duisende toegerus het om in die sendingveld te dien. Broer Barber het gesê: “Dit is nie ’n oordrywing om te sê dat hulle verdere opleiding wonderlike resultate opgelewer het nie. Letterlik honderdduisende sagmoediges regoor die aarde het hulle lewe aan Jehovah toegewy en het begin om hom in waarheid te aanbid en heilige diens aan hom te verrig danksy die hulp van opgeleide sendelinge.”

Voordat hulle Gilead bygewoon het, het baie van die studente getoon dat hulle graag hulle bediening wil uitbrei. Een paartjie het meer as ’n jaar lank klasse bygewoon om Mandaryns te leer sodat hulle ’n groot etniese Chinese bevolking in hulle tuisgebied in Kanada kon bereik. ’n Ander paartjie het Albanees op hulle eie begin leer en uiteindelik na Albanië verhuis om daar na die toenemende belangstelling in die Bybel om te sien. Ander in die klas het na Gilead gekom van Hongarye, Guatemala en die Dominikaanse Republiek, lande waarheen hulle verhuis het omdat daar ’n groot behoefte aan onderrigters van God se Woord was.

Nou, voordat hulle sou vertrek na toewysings in Afrika, Oos-Europa, Sentraal- en Suid-Amerika en die Verre-Ooste, is al die studente wat gegradueer het, aangespoor om God in ag te neem in alles wat hulle doen.

Beskou sake vanuit God se standpunt

Ná broer Barber se inleidingskommentare het hy Maxwell Lloyd, ’n lid van die Amerikaanse Takkomitee, aan die woord gestel. Hy het die tema “Beskou alle sake vanuit God se standpunt” bespreek. Broer Lloyd het die aandag gevestig op die voorbeeld van Dawid en dié van die Seun van God, Jesus (1 Samuel 24:6; 26:11; Lukas 22:42). Nadat die spreker die studente daaraan herinner het dat hulle vyf maande lange studie van die Bybel hulle opgelei het om dinge vanuit God se standpunt te beskou, het hy gevra: “Wanneer julle in julle nuwe toewysing Bybelstudies met mense hou, sal julle hulle help om vanuit God se standpunt oor sake te redeneer?” En wanneer hulle raad aan ander moet gee, het hy die studente aangeraai: “Moenie sê: ‘Ék dink . . . ’ nie. Help hulle eerder om te sien wat God se beskouing is. As julle dit doen, sal julle ’n ware seën wees vir diegene met wie julle in julle toewysing assosieer.”

Volgende op die program was Gerrit Lösch, ’n lid van die Bestuursliggaam. In sy toespraak met die tema “Ek is met jou” het hy verwys na die talle kere dat Jehovah vir sy getroue knegte gesê het: “Ek is met jou” (Genesis 26:23, 24; 28:15; Josua 1:5; Jeremia 1:7, 8). Ons kan vandag dieselfde vertroue in Jehovah hê as ons getrou bly. Broer Lösch het gesê: “Is julle bekommerd dat julle nie mense sal vind om die Bybel mee te studeer nie? Onthou dat Jehovah gesê het: ‘Ek is met jou.’ Is julle bekommerd dat julle materieel nie genoeg sal hê nie? Jehovah het gesê: ‘Ek sal jou hoegenaamd nie verlaat of jou ooit versaak nie’” (Hebreërs 13:5). Broer Lösch het die studente ten slotte daaraan herinner dat Jesus beloof het om met sy getroue volgelinge in die dissipelmaakwerk te wees.—Matteus 28:20.

“Sal jy veiligheid tydens vurige beproewinge vind?” was die tema van Gileadinstrukteur Lawrence Bowen se toespraak. Hy het gemeld dat almal wat Jehovah uitsluitlike toegewydheid wou gee, al voor probleme en soms voor vurige beproewinge te staan gekom het weens die geskille wat in Eden geopper is. Hy het die studente aangespoor om die voorbeeld van Jesus te volg, wat ware veiligheid gevind het deur volkome op Jehovah te vertrou en die vurige beproewinge te aanvaar wat Jehovah toegelaat het sodat sy Seun se gehoorsaamheid vervolmaak kon word (Hebreërs 5:8, 9). Jehovah kan vergelyk word met iemand wat goud louter en wat net die regte hoeveelheid hitte gebruik om onsuiwerhede te verwyder. Geloof wat deur vuur getoets is, bied natuurlik baie groter veiligheid as gelouterde goud. Waarom? “Omdat gelouterde geloof enige druk kan weerstaan”, het broer Bowen gesê, “en dit rus ons toe om ‘tot die einde toe’ te volhard.”—Matteus 24:13.

Nog ’n Gileadinstrukteur, Mark Noumair, het gevra: “Sal jy geliefd wees?” Sy tema was gebaseer op die woorde van 1 Samuel 2:26 wat Samuel beskryf as “geliefd . . . vanuit Jehovah se standpunt sowel as vanuit dié van mense”. Nadat broer Noumair, wat meer as ’n dekade lank ’n sendeling in Afrika was, Samuel se voorbeeld bespreek het, het hy gesê: “Julle kan ook baie geliefd word in God se oë deur lojaal te bly in die werk wat God julle gegee het. Hy het julle ’n kosbare sendingtoewysing gegee.” Broer Noumair het toe die gradueringsklas aangespoor om hulle toewysing as ’n heilige pand van God af te beskou en om God se denke te hê in die uitvoering van hulle toewysings.

Terwyl die skool aan die gang was, het die studente oor naweke talle geleenthede gehad om met die mense in die omgewing te praat oor “die luisterryke dinge van God” wat in die Bybel uiteengesit word (Handelinge 2:11). Trouens, hulle kon in tien verskillende tale oor hierdie dinge praat. Wallace Liverance, nog ’n Gileadinstrukteur, het onderhoude gevoer met ’n groep studente wat hulle ondervindinge vertel het gedurende die deel met die tema “‘Die luisterryke dinge van God’ spoor mense tot dade aan”. Hy het gesê: “Die gees het diegene wat in die bokamer was, op Pinkster beweeg om oor ‘die luisterryke dinge van God’ te praat. Daardie selfde gees is vandag in al God se getroue knegte werksaam.” Party is selfs beweeg om ’n nuwe taal te leer sodat hulle vir baie meer mense kan getuig.

Praktiese raad om sake vanuit God se standpunt te beskou

Ná die inleidingstoesprake het Gary Breaux en William Young, lede van die Amerikaanse takkantoorpersoneel, onderhoude gevoer met lede van verskillende takkomitees in lande waar daar tans sendelinge dien, sowel as met ’n egpaar wat 41 jaar in die sendingdiens deurgebring het. Een van die opmerkings was: “Diegene wat die minste verwag, bly die langste. Hulle spits hulle toe op die rede waarom hulle daar is. Hulle weet dat hulle gekom het om die goeie nuus te verkondig en mense te help om Jehovah te leer ken.”

David Splane, nog ’n lid van die Bestuursliggaam, het die program afgesluit met ’n toespraak oor die tema “Julle gaan nie ver nie!” Wat het hy daarmee bedoel, aangesien die 46 gegradueerdes nou na lande regoor die aarde gestuur sou word? Hy het verduidelik: “Ongeag waar julle op aarde is, julle sal altyd in die huis van God wees solank julle getrou bly.” Ja, alle getroue Christene, waar hulle hulle ook al bevind, dien in ’n deel van God se groot geestelike tempel, of huis, wat tot stand gekom het toe Jesus in die eerste eeu gedoop is (Hebreërs 9:9). Hoe vertroostend was dit tog vir almal in die gehoor om te weet dat Jehovah naby al sy getroue knegte op aarde is! Net soos Jehovah belanggestel het in Jesus toe hy op aarde was, stel Hy ook belang in ons almal en in ons diens aan Hom, ongeag waar ons is. Wanneer dit by aanbidding kom, is ons dus nooit ver van mekaar en van Jehovah en Jesus nie.

Nadat groete van regoor die wêreld oorgedra is, die toewysings aangekondig is en die brief van die klas gelees is, waarin hulle waardering uitgespreek het vir die opleiding wat hulle by Gilead ontvang het, het die voorsitter ’n suksesvolle program afgesluit. Hy het die nuwe sendelinge aangespoor om met hulle goeie werk voort te gaan en hulle in Jehovah se diens te verbly.—Filippense 3:1.

[Venster op bladsy 23]

KLASSTATISTIEK

Aantal lande verteenwoordig: 14

Aantal lande waarheen gestuur: 19

Aantal studente: 46

Gemiddelde ouderdom: 35,0

Gemiddelde jare in die waarheid: 17,2

Gemiddelde jare in voltydse bediening: 13,7

[Prent op bladsy 24]

113de Gradueringsklas van die Wagtoring-Bybelskool Gilead

In die lys hieronder word rye van voor na agter genommer, en name word van links na regs in elke ry aangegee.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.