Koninkryksverkondigers berig

Hulle “hoor” die Koninkryksboodskap in Brasilië

SODAT hulle die goeie nuus van die Koninkryk in die dowegemeenskap kan verkondig, het baie van Jehovah se Getuies in Brasilië die uitdaging aanvaar om Brasiliaanse Gebaretaal te leer. Hulle pogings lewer uitstekende resultate op, soos die volgende ondervindinge toelig.

Eva,a ’n dowe vrou in Sao Paulo, het gebaretaal begin leer toe sy en haar drie kinders by ’n dowe man ingetrek het. By ’n winkelsentrum het Eva en haar kêrel ’n groepie dowe Getuies ontmoet wat hulle na ’n vergadering by die Koninkryksaal genooi het. Hulle het die uitnodiging aanvaar omdat hulle gedink het dat dit ’n sosiale geleentheid sou wees.

Weens haar beperkte kennis van gebaretaal het Eva baie min verstaan van wat tydens die vergadering gesê is. Ná die vergadering het ’n paar Getuies haar vir verversings na hulle huis toe genooi. Met behulp van die prente in die brosjure Jy kan vir ewig op die aarde lewe! het hulle God se belofte van ’n toekomstige aardse paradys aan haar verduidelik. Eva het gehou van wat sy leer en die vergaderinge gereeld begin bywoon.

Kort daarna het Eva haar kêrel verlaat sodat sy volgens Bybelstandaarde kon lewe. Ondanks hewige teenkanting van haar familie het sy voortgegaan om geestelike vooruitgang te maak en is sy in 1995 gedoop. Ses maande later het Eva as ’n pionier, of ’n voltydse Koninkryksverkondiger, begin dien. Sy het sedertdien vier dowes gehelp om hulle toe te wy en te laat doop.

Carlos is doof gebore. Hy was nog baie jonk toe hy by dwelms, onsedelikheid en diefstal betrokke geraak het. Toe hy deur lede van ’n ander bende gedreig is, het hy na Sao Paulo gevlug en ’n ruk lank by João gebly. Soos Carlos was João ook doof en het hy ’n losbandige lewe gelei.

’n Paar jaar later het Carlos die Koninkryksboodskap gehoor wat hom beweeg het om sy lewe te verander en sy huwelik te laat registreer. Nadat Carlos aan die skriftuurlike vereistes voldoen het, het hy sy toewyding aan Jehovah deur doop gesimboliseer. Intussen het João, sonder dat Carlos daarvan geweet het, ook die boodskap van die goeie nuus gehoor en groot veranderinge in sy lewe aangebring. Toe João leer dat Jehovah nie die gebruik van beelde goedkeur nie, het hy sy versameling “heiliges” weggegooi. Nadat João sy vorige lewenswyse die rug toegekeer het, is hy ook gedoop.

Hoe verheug was Carlos en João tog toe hulle mekaar by ’n Koninkryksaal ontmoet en sien watter veranderinge hulle gemaak het! Hulle albei is nou verantwoordelike gesinshoofde en dien as ywerige Koninkryksverkondigers.

In Brasilië is daar tans 30 gemeentes en 154 groepe wat gebaretaal gebruik, met meer as 2 500 verkondigers, waarvan sowat 1 500 doof is. In 2001 is die “Onderrigters van God se woord”-streekbyeenkomste vir dowes in Brasilië deur meer as 3 000 bygewoon, en 36 is gedoop. Met Jehovah se seën sal hopelik nog baie dowes die Koninkryksboodskap aanneem.

[Voetnoot]