’n Boeiende verslag

DIE ontdekkingsreisiger Richard E. Byrd het van 1928 tot 1956 vyf Suidpoolekspedisies onderneem. Deur ’n dagboek en akkurate reisjoernale te hou, kon hy en sy spanne windstrome bepaal, kaarte teken en heelwat inligting oor die vasteland van Antarktika inwin.

Byrd se ekspedisies toon hoe nuttig dit is om ’n reisjoernaal te hou. In ’n reisjoernaal, of logboek, word al die besonderhede van ’n seevaart of ’n vlug opgeteken. Hierdie inligting kan dan later gebruik word om terug te kyk op gebeure of om inligting te ontleed wat vir toekomstige reise nuttig kan wees.

Die Skrif bevat ’n boeiende verslag van die Vloed in Noag se dag. Daardie aardwye Vloed het meer as ’n jaar geduur. Ter voorbereiding vir die Vloed het Noag, sy vrou, hulle drie seuns en hulle vrouens 50 of 60 jaar lank aan ’n ark gebou—’n enorme vaartuig met ’n volume van ongeveer 40 000 kubieke meter. Die doel daarvan? Om mense en diere deur die Vloed heen behoue te laat bly.—Genesis 7:1-3.

Die Bybelboek Genesis bevat in werklikheid Noag se verslag, of logboek, oor die Vloed, vandat dit begin het totdat hy en sy gesin die ark verlaat het. Het dit vandag vir ons enige betekenis?