“Kom nader aan God, en hy sal nader aan julle kom”

Voor en ná—Bybelbeginsels het ’n verskil gemaak

AS ’N jong persoon was Adrian vol woede en gegriefdheid. Sy vinnige humeur het hewige woedeuitbarstings tot gevolg gehad. Hy het gedrink, gerook en ’n onsedelike lewe gelei. Adrian was bekend as ’n punk en het ’n tatoeëermerk gekry wat sy geloof in anargie uitgebeeld het. Hy beskryf daardie jare en sê: “Ek het my hare in ’n tipiese punkhaarstyl gesny, supergom aangesmeer en dit soms rooi of ’n ander kleur gemaak.” Adrian het ook ’n gaatjie deur sy neus laat steek.

Adrian het saam met ’n paar ander rebelse jongmense in ’n bouvallige huis ingetrek. Daar het hulle gedrink en dwelms gebruik. “Ek het speed gebruik en dit ingespuit saam met Valium en enigiets anders wat ek in die hande kon kry”, sê Adrian. “As ek nie dwelms of gom gehad het nie, het ek petrol uit mense se motors getap en daarop ‘hoog’ geraak.” As ’n straatmisdadiger het Adrian intimiderend en uiters gewelddadig geraak. Mense wou oor die algemeen niks met hom te doen hê nie. Terselfdertyd het sy reputasie die verkeerde mense aangetrek.

Adrian het mettertyd tot die besef gekom dat sy “vriende” net met hom assosieer vir wat hulle daaruit kon kry. Verder het hy tot die slotsom gekom dat ‘al die woede en geweld niks bereik het nie’. Sy lewe was vir hom doelloos en hy het gefrustreerd gevoel; gevolglik het hy sy vriende die rug toegekeer. Toe hy ’n eksemplaar van Die Wagtoring by ’n bouterrein gekry het, het die Bybelse boodskap daarin sy belangstelling gewek, en dit het tot ’n Bybelstudie saam met Jehovah se Getuies gelei. Adrian het gretig gereageer op die uitnodiging: “Kom nader aan God, en hy sal nader aan julle kom” (Jakobus 4:8). Gevolglik het Adrian gou ingesien dat hy die beginsels wat in die Heilige Skrif gevind word, moet begin toepas.

Namate sy Bybelkennis toegeneem het, het dit ’n goeie uitwerking op Adrian se gewete gehad en hom ’n ander rigting laat inslaan. Hy is gehelp om sy vinnige humeur te beteuel en selfbeheersing aan te kweek. Danksy die krag van God se Woord het Adrian se persoonlikheid aansienlik verander.—Hebreërs 4:12.

Maar hoe kan die Bybel so ’n kragtige uitwerking hê? Kennis van die Skrif help ons om ons “met die nuwe persoonlikheid [te] beklee” (Efesiërs 4:24). Ja, ons persoonlikheid word verander wanneer ons die juiste kennis van die Bybel toepas. Maar hoe verander hierdie kennis mense?

Eerstens, die Bybel identifiseer ongewenste eienskappe waarvan ons ontslae moet raak (Spreuke 6:16-19). Tweedens, die Skrif spoor ons aan om die begeerlike eienskappe aan die dag te lê wat deur God se heilige gees voortgebring word. Dit sluit in “liefde, vreugde, vrede, lankmoedigheid, goedhartigheid, goedheid, geloof, sagmoedigheid, selfbeheersing”.—Galasiërs 5:22, 23.

’n Dieper begrip van God se vereistes het Adrian gehelp om homself te ondersoek en te sien watter eienskappe hy moet aankweek en van watter hy ontslae moet raak (Jakobus 1:22-25). Maar dit was net die begin. Buiten kennis het hy ook motivering nodig gehad—iets wat Adrian die begeerte sou gee om te verander.

Adrian het geleer dat die begeerlike nuwe persoonlikheid gevorm word “na die beeld van die Een wat dit geskep het” (Kolossense 3:10). Hy het besef dat ’n Christen se persoonlikheid ooreen moet stem met God se persoonlikheid (Efesiërs 5:1). Deur ’n studie van die Bybel het Adrian geleer van Jehovah se handelinge met die mens en gelet op God se goeie eienskappe soos sy liefde, goedhartigheid, goedheid, barmhartigheid, en regverdigheid. Hierdie kennis het Adrian beweeg om God lief te hê en daarna te streef om die soort persoon te wees wat Jehovah goedkeur.—Matteus 22:37.

Met verloop van tyd en met die hulp van God se heilige gees het Adrian daarin geslaag om sy verskriklike humeur te beteuel. Hy en sy vrou help nou ander om hulle lewens met behulp van Bybelkennis te verander. “Anders as baie van my vorige vriende wat nou al dood is, lewe ek en geniet ek ’n gelukkige gesinslewe”, sê Adrian. Hy is ’n lewende bewys van die Bybel se krag om lewens ten goede te verander.

[Lokteks op bladsy 25]

“Al die woede en geweld het niks bereik nie”

[Venster op bladsy 25]

Die krag van Bybelbeginsels

Hier is ’n paar van die Bybelbeginsels wat talle mense gehelp het om woede en geweld te oorkom en vreedsaam te word:

“[Wees] vreedsaam teenoor alle mense. Moet julle nie wreek nie, geliefdes, maar gee plek vir die gramskap” (Romeine 12:18, 19). Laat God bepaal wanneer en op wie wraak uitgeoefen moet word. Hy kan dit doen met ’n volledige kennis van die feite, en enige vergelding van sy kant af sal sy volmaakte geregtigheid weerspieël.

“Wees toornig, en moet nogtans nie sondig nie; laat die son nie ondergaan terwyl julle in ’n ergerlike gemoedstemming is nie, en moet ook nie plek toelaat vir die Duiwel nie” (Efesiërs 4:26, 27). Soms word iemand dalk met reg kwaad. As dit gebeur, moet hy nie “in ’n ergerlike gemoedstemming” bly nie. Waarom nie? Want dit kan hom aanspoor om iets slegs te doen, wat “plek toelaat vir die Duiwel” en Jehovah God se misnoeë tot gevolg kan hê.

“Laat staan die toorn en laat vaar die woede; moenie driftig wees nie; dit is net om kwaad te doen” (Psalm 37:8). Onbeteuelde emosies lei tot onbeheerste dade. As iemand aan woede toegee, kan hy of sy dinge sê en doen wat al die betrokke partye kan seermaak.