“Ons kan net nie met mekaar praat nie!”

MICHAEL, ’n regsgeleerde, moes ’n dinamiese kommunikeerder wees. Sy werk het dit vereis. Maar ná 16 jaar van getroude lewe moes Michael erken dat wanneer hy tuiskom by sy vrou, Adrian, sy kommunikasievermoëns skynbaar verdwyn het. “Ons was vitterig, krities en het skimpe rondgeslinger”, sê Michael, “en ek en Adrian was gedurig aan die baklei, en ek het gedink dit gaan ons net uitmergel. Ek het gewonder of dít is waaroor die huwelik gaan—die voortdurende vloed van misnoeë en ergernis. As dit vir die res van ons lewe saam ons lot sou wees, wou ek ontsnap—werklikwaar. Ek het net nie kans gesien vir 20, 30, 40 jaar van sulke voortdurende ergernis en spanning nie.”

Sulke gevoelens is beslis nie alleen eie aan Michael en Adrian nie. Dit is ’n werklikheid vir baie paartjies wie se verhouding tussen ’n oorlog en ’n skietstilstand wissel. Die eenvoudigste gesprekke ontaard in ’n woordestryd. Hulle “hoor” dinge wat nie gesê word nie. Hulle sê dinge wat nie bedoel word nie. Hulle val mekaar aan en slinger beskuldigings rond en val dan terug in ’n gegriefde stilte. Hulle verlaat mekaar nie, maar is ook nie werklik “een vlees” nie (Genesis 2:24). Die verhouding het ’n dooie punt bereik. As hulle verhouding agteruit beweeg, sal dit beteken dat hulle uitmekaar moet gaan; as hulle verhouding vorentoe beweeg, sal dit beteken dat hulle hulle verskille uit die weg moet ruim. Om die pyn van albei die keuses te vermy, neem hierdie paartjies verlief daarmee om mekaar emosioneel op ’n veilige afstand te hou.

Sulke paartjies moet ‘bekwame leiding ontvang’ in hulle huwelik (Spreuke 1:5, NW). Hierdie leiding is in God se Woord, die Bybel. Paulus se tweede brief aan Timotheüs bevestig dat die Bybel “nuttig tot lering, tot weerlegging, tot teregwysing” is (2 Timotheüs 3:16). Soos ons sal sien, is dit die geval as ’n mens kommunikasie in die huwelik wil herstel.