Onthou jy?

Het jy dit geniet om die onlangse nommers van Die Wagtoring te lees? Wel, kyk of jy die volgende vrae kan beantwoord:

• Hoeveel hoofstukke is daar in die boek Miga, wanneer is dit geskryf en wat was die situasie op daardie stadium?

Die boek Miga bevat sewe hoofstukke. Die profeet Miga het die boek in die agtste eeu v.G.J. geskryf en op daardie stadium was God se verbondsvolk in twee nasies verdeel—Israel en Juda.—8/15, bladsy 9.

• Wat verwag God van ons, volgens Miga 6:8?

Ons moet “geregtigheid . . . beoefen”. God se manier van dinge doen, is die standaard van geregtigheid; ons moet dus sy beginsels van eerlikheid en onkreukbaarheid handhaaf. Hy sê dat ons ‘goedhartigheid moet liefhê’. Christene lê liefderyke goedhartigheid aan die dag deur op die behoeftes van ander te reageer, soos byvoorbeeld ná rampe. Om “beskeie te wandel met” Jehovah, moet ons ons beperkings erken en op hom vertrou.—8/15, bladsye 20-2.

• Wat kan ’n Christen doen as hy sy werk verloor?

Dit sal wys wees as hy sy lewenswyse weer in oënskou neem. Dalk kan hy sy lewe vereenvoudig deur na ’n kleiner woning te trek of van onnodige materiële besittings ontslae te raak. Dit is gewis belangrik dat hy ophou om hom te kwel oor daaglikse benodigdhede en vertrou dat God hom kan help om voort te gaan (Matteus 6:33, 34).—9/1, bladsye 14-15.

• Wat moet ons in gedagte hou wanneer ons trougeskenke gee of ontvang?

Baie duur geskenke is nie nodig nie, en dit moet ook nie verwag word nie. Dit is die gewer se hartstoestand wat werklik belangrik is (Lukas 21:1-4). Dit is nie liefdevol om die naam van die gewer van ’n geskenk bekend te maak nie. Dit kan verleentheid veroorsaak (Matteus 6:3).—9/1, bladsy 29.

• Waarom moet ons onophoudelik bid?

Gereelde gebed kan ons help om ’n hegte verhouding met God op te bou en om hewige beproewinge die hoof te bied. Ons gebede kan kort of lank wees, na gelang van die behoefte en omstandighede. Gebed bou ons geloof op en help ons om probleme te hanteer.—9/15, bladsye 15-18.

• Hoe moet ons die frase in 1 Korintiërs 15:29 verstaan, wat in sommige vertalings met “doop vir die dooies” vertaal word?

Die apostel Paulus het bedoel dat gesalfde Christene gedoop, of gedompel, word in ’n lewensweg wat, soos in die geval van Christus, sal lei tot hulle dood as handhawers van onkreukbaarheid. Daarna sal hulle soos Christus tot geeslewe opgewek word.—10/1, bladsy 29.

• Hoe weet ons dat iemand wat ’n Christen wil word, nie net die oortredinge moet vermy wat in 1 Korintiërs 6:9-11 genoem word nie?

Die apostel Paulus het nie net oortredinge soos hoerery, afgodediens en dronkenskap genoem nie. Om aan te dui dat verdere veranderinge dalk ook nodig sal wees, het hy in die volgende vers gesê: “Alles is my geoorloof; maar nie alles is voordelig nie.”—10/15, bladsye 18-19.

• Watter vroue van die ou tyd was onder dié wat God se hart verbly het?

Hulle sluit die vroedvroue Sifra en Pua in, wat geweier het om Farao se bevel te gehoorsaam om pasgebore Israelitiese seuntjies dood te maak (Eksodus 1:15-20). Die Kanaänitiese prostituut Ragab het twee Israelitiese spioene beskerm (Josua 2:1-13; 6:22, 23). Abigail se verstandigheid het daartoe gelei dat lewens gered is en dat Dawid hom nie bloedskuldig gemaak het nie (1 Samuel 25:2-35). Hulle is voorbeelde vir hedendaagse vroue.—11/1, bladsye 8-11.

• In watter sin het ‘die sterre uit die hemel teen Sisera geveg’, soos gemeld word in Rigters 5:20?

Party meen dat hierdie stelling na goddelike hulp verwys. Ander beweer dat dit verwys na die hulp van engele, na meteoorreën of na Sisera se vertroue op astrologiese voorspellings. Aangesien die Bybel geen verduideliking gee nie, kan ons aanvaar dat die stelling dui op ’n vorm van goddelike ingryping ten behoewe van Israel se leër.—11/15, bladsy 30.

• Waarom is daar nog so baie mense wat bely dat hulle in God glo, terwyl onverskilligheid teenoor godsdiens blykbaar wêreldwyd toeneem?

Sommige gaan kerk toe omdat hulle op soek is na gemoedsrus. Ander hoop om ná die dood vir ewig te lewe of om gesondheid, rykdom en sukses te verkry. In sommige gebiede probeer mense die geestelike leemte vul wat gelaat word namate die Kommunistiese ideologie deur kapitalistiese strewes vervang word. As ’n Christen bewus is van sulke redes, kan dit hom help om betekenisvolle gesprekke met ander aan te knoop.—12/1, bladsy 3.