’n Herdenking wat jou raak

TOE Jesus Christus op aarde was, het hy ’n herdenking ingestel wat God tot eer strek. Dit was die enigste godsdiensseremonie wat hy sy volgelinge direk beveel het om te onderhou. Dit was die Here se Aandmaal, ook bekend as die Laaste Aandmaal.

Stel jou voor dat jy die gebeure wat daardie geleentheid voorafgaan, ongesiens waarneem. Jesus en sy apostels is saam in ’n bokamer in Jerusalem. Hulle het bymekaargekom om die Joodse Pasga te vier en het reeds die gebruiklike Pasgamaal geëet, wat bestaan het uit gebraaide lam, bitter kruie, ongesuurde brood en rooiwyn. Die ontroue apostel Judas Iskariot is reeds uitgestuur en sal binnekort sy Heer verraai (Matteus 26:17-25; Johannes 13:21, 26-30). Jesus is alleen met sy 11 getroue apostels. Matteus is een van hulle.

Volgens Matteus se ooggetuieverslag stel Jesus die Here se Aandmaal soos volg in: “Jesus [het ’n ongesuurde] brood geneem, en nadat hy ’n seën gevra het, het hy dit gebreek en dit vir die dissipels gegee en gesê: ‘Neem, eet. Dit beteken my liggaam.’ Ook het hy ’n beker [wyn] geneem, en nadat hy gedank het, het hy dit vir hulle gegee en gesê: ‘Drink almal daaruit; want dit beteken my “bloed van die verbond”, wat vir baie uitgestort sal word tot vergifnis van sondes.’”—Matteus 26:26-28.

Waarom het Jesus die Here se Aandmaal ingestel? Waarom het hy ongesuurde brood en rooiwyn gebruik toe hy dit gedoen het? Sou al Christus se volgelinge van hierdie embleme moes gebruik? Hoe dikwels moes hierdie maaltyd herdenk word? En het dit werklik betekenis vir jou?