Die wonderwerke van Jesus—Feit of fiksie?

“MENSE [het] talle demoonbesetenes na hom [Jesus Christus] toe gebring; en hy het die geeste met ’n woord uitgedryf, en hy het almal genees met wie dit sleg gegaan het” (Matteus 8:16). “[Jesus het] opgestaan en die wind bestraf en vir die see gesê: ‘Bedaar! Wees stil!’ En die wind het gaan lê, en daar het ’n groot kalmte gekom” (Markus 4:39). Hoe beskou jy hierdie stellings? Glo jy dat dit werklike, geskiedkundige gebeurtenisse beskryf, of dink jy dat dit sinnebeeldige verhale is, blote mites?

Vandag spreek baie mense ernstige bedenkinge uit oor die geskiedkundige egtheid van Jesus se wonderwerke. Hierdie era van die teleskoop en die mikroskoop, van ruimteverkenning en van genetiese manipulering laat blykbaar min ruimte vir verslae van wonderwerke en goddelike wonders.

Party meen dat verslae van wonderwerke fantasieë of sinnebeeldige verhale is. Volgens die skrywer van ’n boek wat beweer dat dit ondersoek instel na die “ware” Jesus, is die verhale oor Christus se wonderwerke niks anders nie as “bemarkingstrategieë” om die Christelike godsdiens te bevorder.

Ander beskou Jesus se wonderwerke as ’n blatante bedrogspul. Jesus self word soms van bedrog beskuldig. Volgens Justinus die Martelaar van die tweede eeu G.J. het Jesus se beskuldigers “selfs sover gegaan om hom ’n towenaar en ’n bedrieër van mense te noem”. Party beweer dat Jesus “nie sy wonderwerke as ’n Joodse profeet verrig het nie, maar as ’n towenaar, ’n yweraar van die heidense tempels”.

Die definisie van onmoontlik

Jy meen dalk dat hierdie bedenkinge gegrond is, dat daar ’n fundamentele rede is waarom mense skepties oor wonderwerke is. Hulle vind dit eenvoudig moeilik, selfs onmoontlik, om die gedagte te aanvaar dat bonatuurlike kragte dit kon teweegbring. “Wonderwerke gebeur eenvoudig nie—uit en gedaan”, het ’n jong man gesê wat homself ’n agnostikus genoem het. Toe het hy die woorde van die 18de-eeuse Skotse filosoof David Hume aangehaal, wat geskryf het: “’n Wonderwerk is ’n skending van natuurwette.”

Maar baie sou uiters versigtig wees om aan te voer dat ’n sekere verskynsel onmoontlik is. The World Book Encyclopedia noem ’n wonderwerk “’n gebeurtenis wat nie deur middel van bekende natuurwette verklaar kan word nie”. Volgens daardie definisie sou ruimtevaart, draadlose kommunikasie en satellietnavigasie net ’n eeu gelede vir baie na “wonderwerke” gelyk het. Dit is sekerlik onverstandig om aan te voer dat wonderwerke onmoontlik is, bloot omdat ons dit nie kan verduidelik op grond van huidige kennis nie.

Wat sal ons vind as ons die skriftuurlike getuienis ondersoek in verband met die wonderwerke wat aan Jesus Christus toegeskryf word? Is Jesus se wonderwerke feit of fiksie?