Vrae van lesers

Wat het Jesus bedoel toe hy vir sy dissipels gesê het: “Ek het begin sien dat Satan reeds soos weerlig uit die hemel geval het”?

Jesus het pas 70 dissipels gekies, en hy het “hulle twee-twee voor hom uit gestuur na elke stad en plek waar hy self sou kom”. Toe die 70 terugkeer, was hulle verheug oor die sukses van hulle sending. “Here, selfs die demone word deur die gebruik van u naam aan ons onderwerp”, het hulle gesê. Op daardie tydstip het Jesus gesê: “Ek het begin sien dat Satan reeds soos weerlig uit die hemel geval het.”—Lukas 10:1, 17, 18.

Op die oog af lyk dit dalk of Jesus na ’n gebeurtenis verwys wat reeds plaasgevind het. Maar 60 jaar nadat Jesus die bogenoemde woorde geuiter het, het die bejaarde apostel Johannes soortgelyke taal gebruik en geskryf: “Die groot draak [is] neergeslinger, die oorspronklike slang, die een wat Duiwel en Satan genoem word, wat die hele bewoonde aarde mislei; hy is na die aarde neergeslinger, en sy engele is saam met hom neergeslinger.”—Openbaring 12:9.

Toe Johannes hierdie woorde geskryf het, was Satan nog in die hemel. Hoe weet ons dit? Omdat Openbaring ’n boek van profesieë is, nie van geskiedenis nie (Openbaring 1:1). In Johannes se dag was Satan dus nog nie na die aarde toe neergewerp nie. Trouens, bewyse toon dat dit eers gebeur het kort nadat Jesus in 1914 as Koning van God se Koninkryk gekroon is.a—Openbaring 12:1-10.

Waarom het Jesus dan gepraat asof Satan reeds uit die hemel gewerp is? Party geleerdes voer aan dat Jesus sy dissipels bestraf het omdat hulle ongepaste trots aan die dag gelê het. Hulle glo dat hy as ’t ware gesê het: ‘Julle het oor demone geseëvier, maar moenie daaroor roem nie. Satan het trots geword, en dit het tot sy skielike ondergang gelei.’

Ons kan nie dogmaties hieroor wees nie. Maar dit lyk meer waarskynlik dat Jesus saam met sy dissipels verheug was en na Satan se toekomstige ondergang verwys het. Jesus was, meer as enige van sy dissipels, deeglik bewus van die Duiwel se bose vyandskap. Stel jou Jesus se vreugde voor toe hy hoor dat die kragtige demone aan sy dissipels, onvolmaakte mense, onderwerp is! Hierdie onderwerping van die demone was net ’n voorskou van die toekomstige dag wanneer Jesus, as Migael die aartsengel, teen Satan oorlog sou voer en hom uit die hemel na die aarde sou neerwerp.

Toe Jesus gesê het dat hy Satan ‘reeds sien val het’, het hy klaarblyklik die sekerheid van Satan se val beklemtoon. Dit stem ooreen met ander Bybelprofesieë wat die verlede tyd gebruik wanneer dit van toekomstige gebeure praat. Let byvoorbeeld op hoe die verlede en toekomende tyd in die profesie aangaande die Messias in Jesaja 52:13–53:12 gemeng word. Jesus het waarskynlik sy vertroue uitgespreek dat Satan uit die hemel gewerp sou word in ooreenstemming met Sy Vader se voorneme. Jesus was ook seker dat Satan en sy demone op God se bestemde tyd in die afgrond gewerp sou word en later eens en vir altyd vernietig sou word.—Romeine 16:20; Hebreërs 2:14; Openbaring 20:1-3, 7-10.

[Voetnoot]