Vrae van lesers

Party beweer dat Paulus nie by die eiland Malta, suid van Sisilië, skipbreuk gely het nie, maar by ’n ander eiland. Waar het hy skipbreuk gely?

Hierdie vraag verwys na ’n redelik onlangse bewering dat die apostel Paulus nie by die eiland Malta skipbreuk gely het nie, maar by Cephalonia (of, Kefallinía) naby Corfu in die Ioniese See, naby die weskus van Griekeland. Die geïnspireerde verslag sê vir ons dat Paulus uit Sesarea vertrek het onder bewaking van die Romeinse hoofman oor honderd, Julius, tesame met ander soldate en Paulus se metgeselle. Soos op die kaart getoon word, het hulle na Sidon en Mira geseil. Daar het hulle aan boord van ’n groot graanskip uit Aleksandrië, Egipte, gegaan en weswaarts na Knidus geseil. Hulle kon nie by die voorgenome roete oor die Egeïese See, verby die punt van Griekeland en dan na Rome, bly nie. Sterk winde het hulle suidwaarts in die rigting van Kreta gedwing, en hulle het onder die beskutting van Kreta se kus gevaar. Daar het hulle Mooi Hawens aangedoen. Toe hulle “van Kreta uitgevaar” het, is die skip “meegesleur” deur “’n stormwind wat Eurakilon genoem word”. Die swaar graanskip is tot die 14de aand ‘op die see heen en weer geslinger’. Uiteindelik het al 276 mense skipbreuk gely by ’n eiland wat die Griekse teks van die Heilige Skrif Me·liʹte noem.—Handelinge 27:1–28:1.

Deur die jare heen was daar verskeie menings oor die identiteit van hierdie eiland, Me·liʹte. Party het gedink dat dit die eiland Melite Illyrica in die Adriatiese See naby die kus van Kroasië was, wat nou as Mljet bekend staan. Maar dit lyk onwaarskynlik, aangesien dit moeilik is om die noordelike ligging van Mljet te verbind met die volgende plekke op Paulus se reis, naamlik Sirakuse, Sisilië en toe die weskus van Italië.—Handelinge 28:11-13.

Die meeste Bybelvertalers het tot die slotsom gekom dat Me·liʹte na die eiland Melite Africanus verwys, wat nou as Malta bekend staan. Mooi Hawens, by Kreta, was die laaste hawe waar die skip waarop Paulus was, aangedoen het. Toe het ’n stormwind die skip weswaarts in die rigting van Kauda gedwing. Die wind het die skip dae lank voortgedryf. Dit is heeltemal redelik om te aanvaar dat die stormwind die skip verder weswaarts sou dryf en dat dit Malta sou bereik.

Met die oog op die heersende wind en “die rigting waarin en tempo waarteen hulle voortgedryf is”, het Conybeare en Howson in hulle boek The Life and Epistles of St. Paul gesê: “Die afstand tussen Klauda [of, Kauda] en Malta is effens minder as 480 myl [770 kilometer]. Die ooreenstemming is so merkwaardig dat dit byna onmoontlik is om te glo dat die land wat die matrose op die veertiende aand [genader het], enige ander plek as Malta kon wees. Die moontlikheid is eenvoudig te groot.”

Hoewel ander moontlike liggings voorgestel kan word, lyk dit asof ’n skipbreuk by Malta, soos aangedui op die bygaande kaart, met die Bybelse verslag ooreenkom.

[Kaart op bladsy 31]

(Sien publikasie vir oorspronklike teksuitleg)

Jerusalem

Sesarea

Sidon

Mira

Knidus

KRETA

KAUDA

MALTA

SISILIË

Sirakuse

Rome

MLJET

GRIEKELAND

CEPHALONIA