Koninkryksverkondigers berig

“Vergete slagoffers” word onthou

VROEG in 2001 het Haykaz, ’n 15-jarige Getuie van Jehovah, ’n tentoonstelling in Bern, Switserland, besoek wat “Vergete slagoffers” genoem is en oor die vervolging van Jehovah se Getuies deur die Nazi’s gehandel het. Ná sy besoek het Haykaz gesê: “Ek het al gehoor van die onmenslike behandeling en lyding wat Jehovah se Getuies onder die Nazi-bewind verduur het, maar nou het ek vir die eerste keer oorspronklike dokumente en foto’s van daardie tyd gesien. Die uitstallings, die ooggetuieverslae en die kommentare van geskiedkundiges by die tentoonstelling het ’n diep indruk op my verstand en hart gemaak.”

’n Ruk later, toe Haykaz vir sy seniorklas op hoërskool ’n verslag moes skryf, het hy die onderwerp “Jehovah se Getuies—die vergete slagoffers van Nazisme” gekies. Sy onderwyser het die onderwerp goedgekeur, maar vir Haykaz gesê dat hy sekulêre lektuur by sy bronne moet insluit. Haykaz het geredelik ingestem. “Ek het ’n oorsig geskryf van party boeke oor Jehovah se Getuies gedurende die Nazi-tydperk wat ek deurgegaan het. Ek het ook my persoonlike indrukke van die ‘Vergete slagoffers’-tentoonstelling neergeskryf. Die verslag van 43 bladsye het prente en foto’s ingesluit.”

Haykaz het in November 2002 sy verslag vir sy skoolmaats, onderwysers, gesin en vriende aangebied. Daarna is ’n vraag-en-antwoord-bespreking gehou, wat hom die geleentheid gegee het om sy Bybelse oortuiging te verduidelik. Toe ’n meisie in die gehoor vra waarom hy hierdie onderwerp gekies het, het Haykaz verduidelik dat baie geskiedenisboeke geen melding van Jehovah se Getuies maak nie en dat hy wou hê mense moet weet hoe moedig die Getuies hulle Christelike geloof verdedig het. Wat was die gevolg van sy aanbieding?

“My skoolmaats was verbaas”, het Haykaz gesê. “Hulle het nie geweet dat Jehovah se Getuies as ’n groep wreed vervolg is nie. En baie het nie geweet dat die Getuies wat in Nazi-konsentrasiekampe aangehou is, ’n spesiale kenteken—’n pers driehoek—gedra het nie.”

Ná sy aanbieding het Haykaz nog geleenthede gehad om met sy klasmaats te praat en om die Getuies se Bybelse standpunt oor bloedoortappings, alkohol en sedes te bespreek. “Nie een van my skoolmaats het my bespot of uitgelag nie”, het Haykaz gesê. Wat meer is, sy verslag word nou in die skoolbiblioteek gehou. Dit sal help om te verseker dat die moedige standpunt van Jehovah se Getuies nie vergeet word nie.