Hoe lank kan mense lewe?
OP 3 Maart 1513 het die Spaanse ontdekkingsreisiger Juan Ponce de León ’n merkwaardige ekspedisie onderneem. Hy het van Puerto Rico af weggeseil in die hoop dat hy die eiland Bimini sou bereik. Volgens oorlewering het hy na ’n wonderfontein gesoek—die Fontein van Jeug. Maar hy het uitgekom by wat vandag die staat Florida, VSA, is. Hy het natuurlik nooit die fontein gevind nie, aangesien dit nie bestaan nie.
Vandag lewe mense oor die algemeen nie veel langer as 70 of 80 jaar nie. Hoewel die Bybel van mense praat wat baie ouer as dit geword het, sê die 2002 Guinness Book of World Records dat die persoon wat die langste gelewe het, 122 jaar en 164 dae oud geword het (Genesis 5:3-32). Maar die bio-etikus John Harris het gesê: “Nuwe navorsing gee ons nou ’n kykie in ’n wêreld waar bejaardheid—en selfs die dood—dalk nie meer onvermydelik sal wees nie.” Etlike 21ste-eeuse navorsers sê dat mense “feitlik onsterflik” sal wees, dat daar “teen 2099 geen beperking op die lewensduur van mense sal wees nie”, dat “selle die vermoë sal hê om tot in ewigheid te verdeel” en so meer.
In sy boek The Dream of Eternal Life sê Mark Benecke: “Bykans die hele liggaam word verskeie kere gedurende ’n leeftyd hernieu. . . . Ná omtrent sewe jaar is ons nuwe mense in die volste sin van die woord.” Maar hierdie proses duur nie onbepaald voort nie, want selle hou ná ’n vasgestelde aantal verdelings op om te vermeerder. As dit egter nie die geval was nie, sou “die menseliggaam hom vir ’n baie lang tydperk kon hernieu—selfs vir ewig”, sê Benecke.
Dink ook aan die verstommende vermoë van die mensebrein, wat ons in ons ietwat kort leeftyd nooit ten volle sal kan gebruik nie. Volgens die Encyclopædia Britannica het die mensebrein “’n baie groter potensiaal as wat in die loop van een persoon se leeftyd gebruik kan word” (1976-uitgawe, Deel 12, bladsy 998). Die boek How the Brain Learns, deur David A. Sousa, sê: “Die vermoë van die brein om inligting te berg, is feitlik onbeperk.”—Bladsy 78, Tweede uitgawe, kopiereg 2001.
Waarom kan navorsers geen fisiologiese rede vind waarom ons sterf nie? En waarom het die mensebrein so ’n ontsaglike vermoë? Is dit moontlik dat ons gemaak is om vir ewig kennis in te neem? Trouens, waarom is ons in staat om ons ewige lewe voor te stel?
Die Bybel sê: “Selfs onbepaalde tyd het [God] in hulle hart gesit, dat die mensdom nooit die werk wat die ware God gemaak het, van begin tot einde kan uitvind nie” (Prediker 3:11). Hierdie woorde toon dat God die gedagte om vir ewig te lewe, by ons ingeplant het. Trouens, daar sal altyd iets wees wat ons van God en sy werke kan leer. As ons biljoene jare lank sou lewe—ja, vir ewig—sou ons nog altyd meer van die wonders van God se skeppingswerke kon leer.
Die woorde van Jesus Christus toon ook dat ewige lewe vir die mens moontlik is. Hy het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus” (Johannes 17:3). Wat van jou? Wil jy vir ewig lewe?
[Prent op bladsy 3]
Juan Ponce de León het na ’n fontein van jeug gesoek
[Erkenning]
Ponce de León: Harper’s Encyclopædia of United States History