Wil jy vir ewig lewe?
“EK IS nie bang om dood te gaan nie”, het ’n bejaarde vrou in Japan gesê. “Maar dit is vir my moeilik om te dink dat ek van hierdie blomme moet afsien.” ’n Christenbedienaar wat haar huis besoek het, het geweet wat die vrou bedoel, want sy het ’n pragtige tuin gehad. Baie wat sê dat hulle nie bang is om dood te gaan nie, het groot waardering vir die wonders van die skepping en smag moontlik daarna om vir ewig te lewe.
Ewige lewe? Baie sal so ’n gedagte verwerp. Party sê dalk selfs dat hulle glad nie vir ewig wil lewe nie. Waarom sou enigiemand so voel?
Ewige lewe—Vervelig?
Party dink dat dit vervelig sal wees om vir ewig te lewe. Hulle wys dalk op die eentonige lewe van baie afgetredenes wat nie eintlik iets anders het om te doen as om net na die televisieskerm te sit en staar nie. As jy so voel, kan jy gerus dink aan wat die sterrekundige Robert Jastrow gesê het toe hy gevra is of dit ’n seën of ’n straf sal wees om vir ewig te lewe. Jastrow het geantwoord: “Dit sal ’n seën wees vir dié met ’n weetgierige verstand en ’n eindelose begeerte om te leer. Die gedagte dat hulle tot in ewigheid kennis kan inneem, sal vir hulle baie vertroostend wees. Maar vir ander wat voel dat hulle reeds alles geleer het wat daar is om te leer en wat ’n geslote verstand het, sal dit ’n verskriklike straf wees. Hulle sal niks hê om hulle tyd mee te vul nie.”
Of jy ewige lewe vervelig sal vind of nie, hang baie af van jou gesindheid. As jy ‘’n weetgierige verstand en ’n eindelose begeerte het om te leer’, dink dan net wat jy sal kan bereik op die gebied van kuns, musiek, argitektuur, tuinmaak, of in watter nuttige strewes jy ook al belangstel. Ewige lewe op aarde sal wonderlike vooruitsigte bied om jou potensiaal op verskeie gebiede te ontwikkel.
Om vir ewig liefde te kan betoon en te kan ontvang, sal ewige lewe inderdaad bevredigend maak. Ons is geskep met die vermoë om liefde te betoon, en ons floreer wanneer ons voel dat ander ons liefhet. Opregte liefde tussen persone bring diepe bevrediging mee wat nie met die verloop van tyd vervaag nie. Ewige lewe sal mense die eindelose geleentheid bied om nie net liefde vir hulle medemens aan te kweek nie, maar veral vir God. “As iemand God liefhet”, het die apostel Paulus gesê, “word dié deur hom geken” (1 Korintiërs 8:3). Wat ’n wonderlike vooruitsig—om die Soewerein van die heelal te ken en deur hom geken te word! Wat meer is, ons sal nooit ophou kennis inneem van ons liefdevolle Skepper nie. Hoe kan ewige lewe dan ooit vervelig of onbevredigend wees?
Die lewe—kortstondig en kosbaar
Party meen dat dit die kortstondigheid van die lewe is wat dit so kosbaar maak. Hulle vergelyk miskien die lewe met goud, wat net in beperkte hoeveelhede bestaan. As goud oral gevind kon word, redeneer hulle, sou dit nie so waardevol gewees het nie. Maar goud sou nog steeds pragtig gewees het. Dieselfde geld sekerlik vir die lewe.
Ons kan ewige lewe vergelyk met ’n oorvloed van lug. Seemanne in ’n beskadigde duikboot sal lug as besonder kosbaar beskou. Dink jy dat hulle, nadat hulle gered is, ’n gebrek aan waardering sal toon en sal kla omdat hulle weer lug in oorvloed kan geniet? Beslis nie!
Soos daardie seemanne, kan ons gered word, maar met die selfs wonderliker vooruitsig om vir ewig te lewe. “Die loon wat die sonde betaal, is die dood”, het die apostel Paulus geskryf, “maar die gawe wat God gee, is die ewige lewe deur Christus Jesus, ons Here” (Romeine 6:23). Deur middel van Jesus se losprysoffer sal God menslike onvolmaaktheid en die dood verwyder en sal hy die ewige lewe as gawe aan gehoorsame mense gee. Hoe dankbaar moet ons tog wees vir hierdie liefdevolle reëling!
Wat van jou geliefdes?
Party mense dink miskien: ‘Wat van my geliefdes? Die ewige lewe op aarde sal nie vir my veel beteken as hulle nie saam met my is nie.’ Dalk het jy al kennis van die Bybel ingeneem en geleer van die moontlikheid om die ewige lewe op ’n aardse paradys te geniet (Lukas 23:43; Johannes 3:16; 17:3). Dit is natuurlik om jou naaste familie, ander geliefdes en hegte vriende daar te wil hê sodat hulle dieselfde vreugdes kan ervaar waarna jy uitsien in God se beloofde nuwe wêreld van regverdigheid.—2 Petrus 3:13.
Maar gestel jou vriende en geliefdes stel glad nie daarin belang om vir ewig op ’n paradysaarde te lewe nie. Moenie toelaat dat dit jou ontmoedig nie. Hou aan om juiste kennis van die Skrif in te neem en in ooreenstemming daarmee op te tree. Die apostel Paulus het geskryf: “Hoe weet jy, vrou, of jy nie dalk jou man sal red nie? Of hoe weet jy, man, of jy nie dalk jou vrou sal red nie?” (1 Korintiërs 7:16). Mense kan verander. ’n Man wat byvoorbeeld vroeër teen die Christelike godsdiens gekant was, het verander en later ’n ouer man in die Christengemeente geword. Hy sê: “Ek is so dankbaar dat my gesinnetjie ten spyte van al my teenstand lojaal by hulle Bybelbeginsels gebly het.”
God is baie besorg oor jou lewe en die lewe van jou geliefdes. Ja, “Jehovah . . . wil [nie] hê dat enigeen vernietig moet word nie, maar wil hê dat almal tot berou moet kom” (2 Petrus 3:9). Jehovah God wil hê dat jy en jou geliefdes vir ewig moet lewe. Sy liefde is groter as dié van onvolmaakte mense (Jesaja 49:15). Bou dus ’n goeie verhouding met God op. Dit kan jou in staat stel om jou geliefdes te help om dieselfde te doen. Al het hulle tans nie die hoop om vir ewig te lewe nie, kan hulle gesindheid verander wanneer hulle sien hoe jy in ooreenstemming met juiste Bybelkennis optree.
Wat van die geliefdes wat jy moontlik aan die dood afgestaan het? Die Bybel bied miljoene wat gesterf het, die wonderlike hoop op ’n opstanding—om uit die dood opgewek te word en in die Paradys op aarde te lewe. Jesus Christus het beloof: “Die uur kom waarin almal wat in die gedenkgrafte is, . . . sal uitkom” (Johannes 5:28, 29). Selfs diegene wat gesterf het sonder om God te leer ken, sal opgewek word, want die Bybel sê dat “daar ’n opstanding van die regverdiges sowel as die onregverdiges sal wees” (Handelinge 24:15). Hoe wonderlik sal dit tog wees om hierdie mense in die opstanding terug te verwelkom!
Die ewige lewe—’n vreugdevolle vooruitsig
As jy nou reeds, ten spyte van al die probleme in hierdie wêreld, geluk en tevredenheid kan vind, sal jy ongetwyfeld die ewige lewe op ’n paradysaarde kan geniet. Maar toe een van Jehovah se Getuies vir ’n vrou vertel het van die seëninge wat die ewige lewe sal meebring, het sy gesê: “Ek wil nie vir ewig lewe nie. Hierdie lewe van 70 of 80 jaar is genoeg vir my.” ’n Christen- ouer man wat ook daar was, het vir haar gevra: “Het jy al ooit gewonder hoe jou kinders sal voel as jy sou sterf?” Trane het oor haar wange gerol toe sy dink aan hoe hartseer hulle sal wees as hulle hulle moeder sou verloor. “Vir die eerste keer het ek besef hoe selfsugtig ek was”, erken sy, “en ek kon sien dat die ewige lewe nie ’n selfsugtige hoop is nie, maar behels dat ons ook vir ander lewe.”
Party voel miskien dat dit nie vir ander saak maak of hulle leef of sterf nie. Maar dit maak wel saak vir ons Lewegewer, wat sê: “So waar as ek lewe, . . . ek skep geen behae in die dood van die goddelose nie, maar daarin dat ’n goddelose hom van sy weg afkeer en bly lewe” (Esegiël 33:11). Aangesien God so besorg is oor selfs die lewe van die goddeloses, gee hy beslis baie om vir diegene wat hom liefhet.
Koning Dawid van eertydse Israel het vertroue gehad in Jehovah se liefdevolle besorgdheid. Dawid het eenkeer gesê: “As my eie vader en my eie moeder my sou verlaat, sal Jehovah my opneem” (Psalm 27:10). Dawid was waarskynlik seker van sy ouers se liefde vir hom. Maar selfs as sy ouers—die mense naaste aan hom—hom sou verlaat, het hy geweet dat God hom nie sou verlaat nie. Uit liefde en besorgdheid bied Jehovah vir ons die ewige lewe en eindelose vriendskap met hom aan (Jakobus 2:23). Moet ons nie hierdie wonderlike gawes dankbaar aanvaar nie?
[Prent op bladsy 7]
Liefde vir God en naaste sal die ewige lewe die moeite werd maak