Jehovah is ons Helper
“My hulp is van Jehovah, die Maker van hemel en aarde.”—PSALM 121:2.
1, 2. (a) Waarom kan daar gesê word dat ons almal soms hulp nodig het? (b) Watter soort Helper is Jehovah?
WIE van ons het nooit ’n helpende hand nodig nie? Die waarheid is dat ons almal soms hulp nodig het—om ’n gewigtige probleem te hanteer, om ’n pynlike verlies te verduur, om tydens ’n moeilike beproewing staande te bly. Wanneer mense hulp nodig het, wend hulle hulle dikwels tot ’n liefdevolle vriend. As ’n mens so ’n vriend van jou las vertel, kan dit die las draagliker maak. Maar daar is perke aan hoeveel ’n medemens kan doen om hulp te verleen. Wat meer is, ander is dalk nie altyd in ’n posisie om iets te doen wanneer hulp nodig is nie.
2 Daar is egter ’n Helper met onbeperkte mag en middele. En hy verseker ons dat hy ons nooit in die steek sal laat nie. Hy word geïdentifiseer deur die psalmis wat vol vertroue gesê het: “My hulp is van Jehovah” (Psalm 121:2). Waarom was hierdie psalmis oortuig dat Jehovah hom sou help? Kom ons ondersoek Psalm 121 om dié vraag te beantwoord. Dit sal ons help om te sien waarom ons ook met vaste vertroue op Jehovah as ons Helper kan staatmaak.
’n Onfeilbare bron van hulp
3. Na watter berge het die psalmis waarskynlik sy oë opgeslaan, en waarom?
3 Die psalmis het begin deur na die feit dat Jehovah die Skepper is, te verwys as ’n grondslag vir vertroue: “Ek sal my oë na die berge opslaan. Waarvandaan sal my hulp kom? My hulp is van Jehovah, die Maker van hemel en aarde” (Psalm 121:1, 2). Die psalmis het nie sy oë na sommer enige berg opgeslaan nie. Toe hierdie woorde opgeteken is, was Jehovah se tempel in Jerusalem. Daardie stad, wat hoog in die berge van Juda geleë was, was in figuurlike sin Jehovah se woonplek (Psalm 135:21). Die psalmis het waarskynlik sy oë opgeslaan na die berge van Jerusalem waarop Jehovah se tempel gebou was, vol vertroue dat Jehovah hulp sou verleen. Waarom was die psalmis so seker dat Jehovah hom kon help? Omdat Hy “die Maker van hemel en aarde” is. Die psalmis het as ‘t ware gesê: ‘Daar is sekerlik niks wat kan verhinder dat die almagtige Skepper my help nie!’—Jesaja 40:26.
4. Hoe het die psalmis getoon dat Jehovah altyd bewus is van sy knegte se behoeftes, en waarom is dit ’n vertroostende gedagte?
4 Die psalmis het hierna verduidelik dat Jehovah altyd bewus is van sy knegte se behoeftes: “Hy kan onmoontlik toelaat dat jou voet wankel. Die Een wat jou bewaar, kan onmoontlik lomerig wees. Kyk! Hy sal nie lomerig wees of aan die slaap raak nie, hy wat Israel bewaar” (Psalm 121:3, 4). Dit is vir God onmoontlik om toe te laat dat dié wat op hom vertrou, “wankel” of só val dat hulle nie weer kan opstaan nie (Spreuke 24:16). Waarom? Omdat Jehovah soos ’n herder is wat wawyd wakker is en sy skape bewaak. Is dit nie ’n vertroostende gedagte nie? Hy sal sy oë nie eers vir ’n oomblik sluit vir die behoeftes van sy knegte nie. Dag en nag waak hy oor hulle.
5. Waarom word daar gesê dat Jehovah aan die “regterhand” is?
5 Vol vertroue dat Jehovah die lojale Beskermer van sy knegte is, het die psalmis geskryf: “Jehovah bewaar jou. Jehovah is jou skaduwee aan jou regterhand. Die son sal jou bedags nie steek nie, ook nie die maan snags nie” (Psalm 121:5, 6). Vir iemand wat te voet in die Midde-Ooste reis, sal ’n skaduplek welkome beskerming teen die gloeiende son bied. Jehovah is soos ’n skaduwee vir sy knegte deurdat hy hulle teen die verskroeiende hitte van teëspoed beskerm. Let daarop dat dit sê dat Jehovah aan die “regterhand” is. In eertydse oorlogvoering was ’n soldaat se regterhand nie ten volle beskerm deur sy skild, wat hy in sy linkerhand gehou het nie. ’n Lojale vriend kon die soldaat beskerming bied deur aan sy regterhand te staan en veg. Soos so ’n vriend, staan Jehovah lojaal aan die sy van sy aanbidders, altyd gereed om hulle te help.
6, 7. (a) Hoe verseker die psalmis ons dat Jehovah nooit sal ophou om sy knegte te help nie? (b) Waarom kan ons dieselfde vertroue as die psalmis hê?
6 Sal Jehovah ooit ophou om sy knegte te help? So iets is heeltemal ondenkbaar. Die psalmis het afgesluit: “Jehovah sal jou van alle rampspoed bewaar. Hy sal jou siel bewaar. Jehovah sal jou uitgang en jou ingang bewaar, van nou af en tot onbepaalde tyd” (Psalm 121:7, 8). Let daarop dat die skrywer die klem verskuif het van die hede na die toekoms. Vroeër, in vers 5, het die psalmis gesê: “Jehovah bewaar jou.” Maar in hierdie verse het die psalmis geskryf: “Jehovah sal jou . . . bewaar.” Ware aanbidders word hierdeur verseker dat Jehovah se hulp tot in die toekoms sal strek. Ongeag waar hulle gaan, ongeag voor watter teëspoed hulle te staan kom, hulle sal nooit buite die bereik van sy helpende hand wees nie.—Spreuke 12:21.
7 Die skrywer van Psalm 121 het inderdaad die vertroue gehad dat die almagtige Skepper oor sy knegte waak met die teerheid van ’n liefdevolle herder en die waaksaamheid van ’n op en wakker wag. Ons het alle rede om dieselfde vertroue as die psalmis te hê, want Jehovah verander nie (Maleagi 3:6). Beteken dit dat ons altyd fisiese beskerming sal geniet? Nee, maar solank ons op hom staatmaak as ons Helper, sal hy ons beskerm teen alles wat ons geestelik kan skaad. Dit is net natuurlik om te vra: ‘Hoe help Jehovah ons?’ Kom ons ondersoek vier maniere waarop hy dit doen. In hierdie artikel sal ons bespreek hoe hy sy knegte in Bybeltye gehelp het. In die volgende artikel sal ons kyk hoe hy sy knegte vandag help.
Hulp van engele
8. Waarom is dit nie verbasend nie dat die engele grootliks belangstel in die welsyn van God aardse knegte?
8 Jehovah het miljoene der miljoene engele tot sy beskikking (Daniël 7:9, 10). Hierdie geesseuns voer sy wil getrou uit (Psalm 103:20). Hulle weet goed dat Jehovah groot liefde vir sy menslike aanbidders het en dat hy hulle wil help. Dit is dus nie verbasend nie dat die engele grootliks belangstel in die welsyn van God se aardse knegte (Lukas 15:10). Die engele put ongetwyfeld vreugde uit die feit dat Jehovah hulle gebruik om mense te help. Hoe het Jehovah die engele gebruik om sy menseknegte in die ou tyd te help?
9. Gee ’n voorbeeld van hoe God engele die mag gegee het om getroue mense te beskerm.
9 God het engele die mag gegee om getroue mense te beskerm en te verlos. Twee engele het Lot en sy dogters gehelp om aan die vernietiging van Sodom en Gomorra te ontkom (Genesis 19:1, 15-17). Net een engel het 185 000 Assiriese soldate doodgemaak wat Jerusalem bedreig het (2 Konings 19:35). Toe Daniël in die leeukuil gegooi is, het Jehovah “sy engel gestuur en die bek van die leeus gesluit” (Daniël 6:21, 22). ’n Engel het die apostel Petrus uit die gevangenis bevry (Handelinge 12:6-11). Die Bybel noem baie ander voorbeelde van engelebeskerming, en dit bevestig die woorde van Psalm 34:7: “Die engel van Jehovah slaan kamp op rondom dié wat hom vrees, en hy red hulle.”
10. Hoe het Jehovah ’n engel gebruik om die profeet Daniël aan te moedig?
10 Soms het Jehovah die engele gebruik om getroue mense aan te moedig en te versterk. ’n Roerende voorbeeld word in Daniël hoofstuk 10 gevind. Op hierdie stadium was Daniël moontlik al byna 100 jaar oud. Die profeet het baie ontmoedig gevoel, klaarblyklik weens die verwoeste toestand van Jerusalem en die gesloer om die tempel te herbou. Hy was ook verontrus nadat hy ’n vreesaanjaende visioen gesien het (Daniël 10:2, 3, 8). God het uit liefde ’n engel gestuur om hom aan te moedig. Die engel het Daniël verskeie kere daaraan herinner dat hy ‘besonder geliefd’ is in God se oë. Die gevolg? Die bejaarde profeet het vir die engel gesê: “U het my versterk.”—Daniël 10:11, 19.
11. Gee ’n voorbeeld van hoe engele gebruik is om die werk te rig om die goeie nuus te verkondig.
11 Jehovah het ook engele gebruik om die werk te rig om die goeie nuus te verkondig. ’n Engel het Filippus gerig om vir ’n Etiopiese eunug van Christus te getuig, waarna die eunug gedoop is (Handelinge 8:26, 27, 36, 38). Kort hierna was dit God se wil dat die goeie nuus aan onbesnede nie-Jode verkondig word. ’n Engel het in ’n visioen aan Kornelius, ’n godvresende nie-Jood, verskyn en hom gerig om die apostel Petrus te laat haal. Toe boodskappers van Kornelius Petrus gevind het, het hulle gesê: “Kornelius . . . is deur ’n heilige engel goddelike instruksies gegee om u na sy huis te laat haal en te hoor wat u te sê het.” Petrus het hierop gereageer, en so het die eerste onbesnede nie-Jode deel geword van die Christengemeente (Handelinge 10:22, 44-48). Dink net hoe jy sou voel as jy weet dat ’n engel jou gehelp het om met iemand in aanraking te kom wat die regte gesindheid het!
Hulp deur middel van die heilige gees
12, 13. (a) Waarom het Jesus se apostels goeie rede gehad om te glo dat die heilige gees hulle kon help? (b) Hoe het die heilige gees die eerste-eeuse Christene krag gegee?
12 Kort voordat Jesus gesterf het, het hy sy apostels verseker dat hulle nie sonder hulp gelaat sou word nie. Die Vader sou hulle ’n “helper, die heilige gees”, gee (Johannes 14:26). Die apostels het goeie rede gehad om te glo dat die heilige gees hulle kon help. Die geïnspireerde Skrif is immers vol voorbeelde van hoe Jehovah die heilige gees, die sterkste krag wat daar is, gebruik het om sy knegte te help.
13 Die heilige gees is dikwels gebruik om mense krag te gee om Jehovah se wil te doen. Heilige gees het die rigters krag gegee om Israel te verlos (Rigters 3:9, 10; 6:34). Daardie selfde gees het eerste-eeuse Christene krag gegee om ondanks verskeie vorme van teenstand met vrymoedigheid te bly preek (Handelinge 1:8; 4:31). Die sukses waarmee hulle hulle bediening uitgevoer het, het kragtige getuienis gelewer van die werking van die heilige gees. Watter ander verklaring kan daar wees vir die feit dat “ongeleerde en gewone” mense die Koninkryksboodskap regoor die destyds bekende wêreld kon versprei?—Handelinge 4:13; Kolossense 1:23.
14. Hoe het Jehovah sy heilige gees gebruik om lig te gee aan sy knegte?
14 Jehovah het ook sy heilige gees gebruik om lig te gee aan sy knegte. Met die hulp van God se gees kon Josef Farao se profetiese drome uitlê (Genesis 41:16, 38, 39). Deur middel van sy gees het Jehovah sy voornemens aan nederiges geopenbaar maar dit vir trotses verberg (Matteus 11:25). Aangaande die dinge wat Jehovah voorsien aan “dié wat hom liefhet”, het die apostel Paulus dus gesê: “Aan ons het God dit deur sy gees geopenbaar” (1 Korintiërs 2:7-10). ’n Mens kan God se wil slegs met die hulp van die heilige gees werklik verstaan.
Hulp uit God se Woord
15, 16. Wat is Josua aangesê om te doen sodat hy wys kon handel?
15 Jehovah se geïnspireerde Woord is “nuttig om te onderrig”, en dit stel God se knegte in staat om “volkome bevoeg [te] wees, ten volle toegerus vir elke goeie werk” (2 Timoteus 3:16, 17). Die Bybel bevat baie voorbeelde van hoe God se eertydse knegte gehelp is deur gedeeltes van sy Woord wat reeds opgeteken was.
16 Die Skrif het gehelp om betroubare leiding te voorsien aan God se aanbidders. Toe Josua die verantwoordelikheid gegee is om Israel te lei, is daar vir hom gesê: “Hierdie wetboek [wat deur Moses opgeteken is] mag nie uit jou mond wyk nie, en jy moet dag en nag op gedempte toon daarin lees, sodat jy sorgvuldig kan handel volgens alles wat daarin geskrywe staan; want dan sal jy jou weg suksesvol maak en dan sal jy wys handel.” Let daarop dat God nie beloof het dat Josua op ’n wonderdadige manier met wysheid vervul sou word nie. Maar deur die “wetboek” te lees en daaroor te peins, sou Josua wys handel.—Josua 1:8; Psalm 1:1-3.
17. Hoe is Daniël sowel as koning Josia gehelp deur die gedeeltes van die Skrif wat vir hulle beskikbaar was?
17 God se geskrewe Woord het ook gehelp om sy wil en voorneme te openbaar. Daniël het byvoorbeeld uit Jeremia se geskrifte onderskei hoe lank Jerusalem woes sou lê (Jeremia 25:11; Daniël 9:2). Beskou ook wat gedurende die heerskappy van koning Josia van Juda gebeur het. Teen daardie tyd het die nasie van Jehovah af weggedryf, en die konings het klaarblyklik versuim om ’n persoonlike afskrif van die Wet te maak en dit te volg (Deuteronomium 17:18-20). Maar terwyl herstelwerk aan die tempel gedoen is, is “die wetboek”, wat waarskynlik deur Moses self geskryf is, gevind. Dit was moontlik die oorspronklike teks, wat sowat 800 jaar vroeër voltooi is. Nadat die inhoud daarvan voor Josia gelees is, het hy besef hoe ver die nasie van Jehovah se wil afgewyk het, en die koning het streng maatreëls ingestel om te doen wat in die boek geskrywe gestaan het (2 Konings 22:8; 23:1-7). Is dit nie duidelik dat God se volk in die ou tyd gehelp is deur die gedeeltes van die Heilige Skrif wat vir hulle beskikbaar was nie?
Hulp deur middel van medegelowiges
18. Waarom kan ons sê dat Jehovah daarvoor verantwoordelik is wanneer een ware aanbidder ’n ander help?
18 Die hulp wat Jehovah voorsien, kom dikwels deur middel van medegelowiges. God is in werklikheid daarvoor verantwoordelik wanneer een ware aanbidder ’n ander help. Waarom kan ons so sê? Om twee redes. Eerstens is God se heilige gees daarby betrokke. Daardie gees bring vrugte voort in diegene wat op die invloed daarvan reageer, onder meer liefde en goedheid (Galasiërs 5:22, 23). Wanneer een van God se knegte derhalwe beweeg word om ’n ander te help, is dit ’n bewys van die werking van Jehovah se gees. Tweedens is ons na God se beeld gemaak (Genesis 1:26). Dit beteken dat ons die vermoë het om sy eienskappe te weerspieël, met inbegrip van sy goedhartigheid en medelye. Wanneer een kneg van Jehovah dus aan ’n ander hulp verleen, is die ware Bron van hierdie hulp die een wie se gelykenis weerspieël word.
19. Hoe het Jehovah volgens die Bybelverslag hulp deur middel van medegelowiges voorsien?
19 Hoe het Jehovah in Bybeltye hulp deur middel van medegelowiges voorsien? Jehovah het dikwels een van sy knegte beweeg om raad te gee aan ’n ander, soos toe Jeremia lewensreddende raad gegee het aan Barug (Jeremia 45:1-5). Soms is ware aanbidders beweeg om materiële hulp te voorsien aan medegelowiges, soos toe Christene in Masedonië en Agaje gretig was om hulle behoeftige broers in Jerusalem te help. Die apostel Paulus het gesê dat hierdie vrygewigheid tereg “’n dankbetuiging aan God” voortgebring het.—2 Korintiërs 9:11.
20, 21. Onder watter omstandighede is die apostel Paulus deur broers uit Rome versterk?
20 Verslae oor hoe Jehovah se knegte daarna gestreef het om mekaar te versterk en aan te moedig, is besonder roerend. Kyk na ’n voorbeeld in verband met die apostel Paulus. Terwyl Paulus as ’n gevangene na Rome onderweg was, het hy met die Romeinse hoofpad gereis wat bekend was as die Appiese Weg. Die laaste skof van die reis was besonder onaangenaam, want dit het reisigers deur ’n moerasagtige, laagliggende gebied geneem.a Die broers in die gemeente in Rome het geweet dat Paulus op pad was. Wat het hulle gedoen? Het hulle in die gerief van hulle huise in die stad gewag totdat Paulus daar aangekom het en hom toe gaan groet?
21 Die Bybelskrywer Lukas, wat Paulus op die reis vergesel het, vertel vir ons wat gebeur het: “Daarvandaan [Rome] het die broers, toe hulle die nuus oor ons hoor, tot by die Mark van Appius en die Drie Herberge gekom om ons te ontmoet.” Kan jy jou die toneel voorstel? Omdat hulle geweet het dat Paulus kom, het ’n groep broers van Rome af gereis om hom te ontmoet. ’n Deel van die groep het by die Mark van Appius gewag, die welbekende posstasie omtrent 74 kilometer van Rome af. Die res van die broers het by die Drie Herberge gewag, ’n rusplek sowat 58 kilometer buite die stad. Hoe het Paulus gereageer? Lukas vertel: “Toe Paulus hulle sien, het hy God gedank en moed geskep” (Handelinge 28:15). Dink bietjie daaraan—net om daardie broers te sien wat hulle ingespan het om so ver te reis, was vir Paulus ’n bron van krag en bemoediging! En wie het Paulus vir hierdie aanmoedigende ondersteuning bedank? Hy het die een bedank wat daarvoor verantwoordelik was, Jehovah God.
22. Wat is ons jaarteks vir 2005, en wat sal in die volgende artikel bespreek word?
22 Die geïnspireerde verslag van God se handelinge spreek beslis vanself. Hy is ’n Helper sonder gelyke. Jehovah se Getuies sal heel gepas die woorde van Psalm 121:2 as hulle jaarteks vir 2005 hê: “My hulp is van Jehovah.” Maar hoe help Jehovah ons vandag? Dit sal in die volgende artikel bespreek word.
[Voetnoot]
a Die Romeinse digter Horatius (65—8 v.G.J.), wat dieselfde reis onderneem het, het kommentaar gelewer oor die ongemak wat met hierdie laaste deel van die reis gepaardgegaan het. Horatius het gesê dat die Mark van Appius “stampvol bootsmanne en suinige herbergiers” was. Hy het gekla oor die “vervloekte muggies en paddas” en die “besoedelde” water.
Onthou jy?
Op watter maniere het Jehovah hulp voorsien—
• deur middel van die engele?
• deur middel van sy heilige gees?
• deur sy geïnspireerde Woord?
• deur middel van medegelowiges?
[Lokteks op bladsy 15]
“My hulp is van Jehovah.”—Psalm 121:2.
[Prent op bladsy 16]
Paulus het God gedank vir die hulp wat hy van die broers in Rome ontvang het