“My hulp is van Jehovah”

Wanneer bejaardheid “’n pragtige kroon” is

“DIE beste lewe moontlik”, het Muriel, wat 101 jaar oud is, gesê. “’n Ware voorreg!” is hoe die 70-jarige Theodoros dit gestel het. “Ek kon niks beters met my lewe gedoen het nie”, het Maria op 73-jarige leeftyd gesê. Hulle het almal hulle lewe in Jehovah God se diens gebruik.

Sulke bejaardes is verteenwoordigend van talle bedrywige aanbidders van Jehovah regoor die wêreld. Ondanks hulle ouderdom, bekommernisse oor hulle gesondheid en ander ongunstige omstandighede dien hulle God nog steeds heelhartig. In die Christengemeente is sulke getroue bejaardes gerespekteerde voorbeelde van godvrugtige toegewydheid. Jehovah heg groot waarde aan die diens van bejaardes, al word hulle dalk deur hulle omstandighede beperk.a—2 Korintiërs 8:12.

Die boek Psalms lewer ’n gepaste kommentaar oor die lewensgehalte wat getroue bejaardes kan verwag. Hulle kan soos ’n ou, statige boom wees wat steeds vrug dra. Aangaande getroue bejaardes het die psalmis gesing: “Hulle sal nog in die grysheid bly floreer, vet en vars sal hulle bly.”—Psalm 92:14.

Party is dalk bang dat hulle opsy gestoot en geïgnoreer sal word wanneer ouderdom hulle lewenskrag laat afneem. Dawid het God gesmeek: “Moet my nie wegwerp in die tyd van die ouderdom nie; moet my nie verlaat juis wanneer my krag ingee nie” (Psalm 71:9). Wat bepaal of bejaardes ’n sukses of ’n mislukking van hulle oudag sal maak? Die goddelike eienskap regverdigheid. “Die regverdige sal bloei soos ’n palmboom”, het die psalmis gesing.—Psalm 92:12.

Diegene wat hulle lewe in getroue diens aan God gebruik het, dra oor die algemeen tot in hulle oudag goeie vrugte. Baie van die saadjies wat hulle in hulle eie lewe of in dié van ander geplant het, ontkiem en groei totdat dit goedheid as opbrengs lewer (Galasiërs 6:7-10; Kolossense 1:10). Mense wat hulle lewe vermors het deur selfsugtige strewes na te jaag wat God se weë buite rekening laat, het gewoonlik min wat die moeite werd is waarna hulle kan wys wanneer hulle ouer word.

Regverdigheid is ’n sieraad gedurende bejaardheid, soos ook in die boek Spreuke beklemtoon word. Daar lees ons: “Grysheid is ’n pragtige kroon wanneer dit op die weg van regverdigheid gevind word” (Spreuke 16:31). Ja, regverdigheid is ’n blyk van innerlike skoonheid. Om gedurende ’n lang lewe regverdigheid na te streef, dwing respek af (Levitikus 19:32). Grys hare, wanneer dit met wysheid en deug gepaardgaan, bring eer mee.—Job 12:12.

Vir Jehovah is ’n onberispelike lewe wat in sy diens bestee is, pragtig. Die Skrif sê: “Selfs tot die ouderdom toe is ek [Jehovah] dieselfde; en tot die grysheid toe sal ek julle ondersteun. Ek sal gewis optree, sodat ek julle kan dra en sodat ek julle kan ondersteun en ontkoming kan verskaf” (Jesaja 46:4). Hoe vertroostend is dit tog om te weet dat ons liefdevolle hemelse Vader belowe dat hy sy lojale knegte tot in hulle oudag sal onderskraag en ondersteun!—Psalm 48:14.

Aangesien ’n lewe van getroue diens aan Jehovah vir hom pragtig is, verdien dit dan nie om ook deur ander gerespekteer te word nie? Omdat ons God se beskouing weerspieël, het ons groot waardering vir ons bejaarde medegelowiges (1 Timoteus 5:1, 2). Kom ons soek dus na praktiese maniere waarop ons Christelike liefde kan betoon deur na hulle behoeftes om te sien.

Later in die lewe op die weg van regverdigheid

“Op die weg van regverdigheid is lewe”, verseker Salomo ons (Spreuke 12:28). Gevorderde jare verhoed niemand om op hierdie weg te begin wandel nie. In Moldowa het ’n 99-jarige man byvoorbeeld sy jeug aan die bevordering van Kommunistiese ideale gewy. Hy was trots daarop dat hy persoonlik gesprekke gevoer het met beroemde Kommunistiese leiers, soos W. I. Lenin. Maar ná die agteruitgang en val van Kommunisme het hierdie bejaarde man se lewe nie meer ’n doel of rigting gehad nie. Toe Jehovah se Getuies egter vir hom wys dat God se Koninkryk die enigste ware oplossing vir die mensdom se probleme is, het hy Bybelwaarheid aangegryp en ’n ywerige Bybelstudent geword. Ongelukkig het hy gesterf voordat hy ’n gedoopte kneg van Jehovah kon word.

Toe ’n 81-jarige vrou in Hongarye van God se sedelike vereistes geleer het, het sy besef dat sy moes trou met die man saam met wie sy al etlike jare gelewe het. Die vrou het al haar moed bymekaargeskraap en haar Bybelse standpunt aan haar maat verduidelik. Tot haar groot verbasing en vreugde het hy ingestem om met haar te trou. Nadat hulle verbintenis gewettig is, het sy vinnig geestelike vooruitgang gemaak. Binne agt maande nadat sy met haar Bybelstudie begin het, het sy ’n ongedoopte verkondiger geword, en kort daarna is sy gedoop. Hoe waar is dit tog dat regverdigheid ’n pragtige kroon vir bejaardes kan wees!

Ja, getroue bejaarde Christene kan seker wees dat God in hulle belangstel. Jehovah sal nie diegene wat aan hom lojaal bly, verlaat nie. Hy belowe eerder om hulle tot in hulle oudag te lei, te ondersteun en te onderskraag. En hulle is lewende getuienis van die waarheid van die psalmis se woorde: “My hulp is van Jehovah.”—Psalm 121:2.

[Voetnoot]

[Lokteks op bladsy 9]

“Grysheid is ’n pragtige kroon wanneer dit op die weg van regverdigheid gevind word.”—SPREUKE 16:31

[Venster op bladsy 8]

JEHOVAH GEE OM VIR SY BEJAARDE KNEGTE

“Voor grys hare moet jy opstaan, en jy moet aan ’n bejaarde agting betoon.”—Levitikus 19:32.

“Selfs tot die ouderdom toe is ek dieselfde; en tot die grysheid toe sal ek julle ondersteun.”—Jesaja 46:4.