Hoe om ons Christelike identiteit te bewaar
“‘Julle is my getuies’, sê Jehovah.”—JESAJA 43:10.
1. Watter soort mense trek Jehovah na hom toe?
KYK gerus om jou rond wanneer jy by ’n Koninkryksaal is. Wie sien jy by hierdie plek van aanbidding? Jy sien miskien opregte jongmense wat aandagtig luister na skriftuurlike wysheid (Psalm 148:12, 13). Jy sal waarskynlik ook gesinshoofde sien wat daarna streef om God te behaag terwyl hulle in ’n wêreld lewe wat gesinslewe afbreek. Dalk sal jy dierbare bejaardes sien, wat ten spyte van die kwale van die ouderdom hulle toewyding aan Jehovah getrou uitleef (Spreuke 16:31). Hulle almal het Jehovah innig lief. En hy het dit goedgedink om hulle te trek sodat hulle ’n verhouding met hom kan geniet. “Geen mens kan na my toe kom”, het die Seun van God bevestig, “tensy die Vader, wat my gestuur het, hom trek nie.”—Johannes 6:37, 44, 65.
2, 3. Waarom kan dit ’n uitdaging wees om ’n sterk Christelike identiteitsgevoel te behou?
2 Is ons nie verheug om deel te wees van ’n volk wat Jehovah se goedkeuring en seën geniet nie? Nogtans is dit ’n uitdaging om in hierdie “kritieke tye . . . wat moeilik is om deur te kom”, ’n sterk identiteitsgevoel as Christene te behou (2 Timoteus 3:1). Dit is veral waar van jongmense wat in Christengesinne grootgemaak word. “Al het ek Christelike vergaderinge bygewoon”, het een so ’n jong persoon erken, “het ek geen duidelike geestelike doelwitte gehad nie, en om eerlik te wees, ek was nie so seker of ek Jehovah wou dien nie.”
3 Party wat opreg begeer om Jehovah te dien, word dalk van stryk gebring deur hewige portuurdruk, wêreldse invloede en sondige neigings. Wanneer druk op ons uitgeoefen word, kan dit veroorsaak dat ons ons Christelike identiteit geleidelik verloor. Byvoorbeeld, vandag beskou baie mense in die wêreld die Bybel se sedelike standaarde as outyds of onrealisties in ons moderne wêreld (1 Petrus 4:4). Party voel dat dit nie noodsaaklik is om God te aanbid op die manier wat hy voorskryf nie (Johannes 4:24). In sy brief aan die Efesiërs sê Paulus dat die wêreld ’n “gees”, of oorheersende gesindheid, het (Efesiërs 2:2). Daardie gees oefen druk op mense uit om hulle aan te pas by die denke van ’n gemeenskap wat Jehovah nie ken nie.
4. Hoe het Jesus beklemtoon dat dit belangrik is om ons onmiskenbare identiteit as Christene te bewaar?
4 Maar as toegewyde knegte van Jehovah besef ons dat dit tragies sal wees as enigeen van ons—jonk of oud—ons Christelike identiteit verloor. ’n Gesonde Christelike identiteitsgevoel kan slegs gegrond wees op Jehovah se standaarde en wat hy van ons verwag. Ons is immers na sy beeld geskep (Genesis 1:26; Miga 6:8). Die Bybel vergelyk ons onmiskenbare identiteit as Christene met boklere, wat deur almal gesien kan word. Aangaande ons tye het Jesus gewaarsku: “Kyk! Ek kom soos ’n dief. Gelukkig is die een wat wakker bly en sy boklere bewaar, sodat hy nie naak sal loop en mense sy skande sien nie” (Openbaring 16:15).a Ons wil nie afstand doen van ons Christelike eienskappe en gedragstandaarde en toelaat dat Satan se wêreld ons vorm nie. As dit gebeur, sal ons hierdie “boklere” verloor. So ’n situasie sal betreurenswaardig en skandelik wees.
5, 6. Waarom is geestelike stabiliteit noodsaaklik?
5 ’n Sterk Christelike identiteitsgevoel het ’n groot invloed op watter rigting ’n mens in die lewe inslaan. Hoe so? As ’n aanbidder van Jehovah sy duidelike identiteitsgevoel verloor, kan hy sy fokus verloor, sodat hy nie meer definitiewe doelwitte of ’n vaste rigting in die lewe het nie. Die Bybel waarsku herhaaldelik teen sulke besluiteloosheid. “Hy wat twyfel”, het die dissipel Jakobus gewaarsku, “is soos ’n golf van die see wat deur die wind gedryf en heen en weer gewaai word. Trouens, dié mens moet nie veronderstel dat hy enigiets van Jehovah sal ontvang nie; hy is ’n besluitelose mens, onbestendig in al sy weë.”—Jakobus 1:6-8; Efesiërs 4:14; Hebreërs 13:9.
6 Hoe kan ons ons Christelike identiteit bewaar? Wat kan ons help om meer waardering te kry vir ons groot voorreg om aanbidders van die Allerhoogste te wees? Let asseblief op die volgende maniere waarop ons dit kan doen.
Bevestig jou Christelike identiteit
7. Waarom is dit voordelig om Jehovah te smeek om ons te ondersoek?
7 Werk voortdurend aan jou verhouding met Jehovah. ’n Christen se kosbaarste besitting is sy persoonlike verhouding met God (Psalm 25:14; Spreuke 3:32). As verontrustende vrae oor ons Christelike identiteit by ons begin opkom, moet ons die gehalte en innigheid van hierdie verhouding noukeurig ondersoek. Die psalmis het gepas gesmeek: “Ondersoek my, o Jehovah, en stel my op die proef; louter my niere en my hart” (Psalm 26:2). Waarom is so ’n ondersoek noodsaaklik? Omdat ons nie self ons diepste beweegredes en neigings op betroubare wyse kan beoordeel nie. Net Jehovah kan die mens wat ons innerlik is—ons beweegredes, gedagtes en emosies—deurgrond.—Jeremia 17:9, 10.
8. (a) Hoe vind ons daarby baat as Jehovah ons ondersoek? (b) Hoe is jy al gehelp om as ’n Christen vordering te maak?
8 Wanneer ons Jehovah vra om ons te ondersoek, nooi ons hom om ons te toets. Hy kan toelaat dat situasies ontwikkel wat ons ware beweegredes en hartstoestand openbaar (Hebreërs 4:12, 13; Jakobus 1:22-25). Ons moet sulke toetse verwelkom, want dit gee ons die geleentheid om die diepte van ons lojaliteit teenoor Jehovah te toon. Dit kan aan die lig bring of ons “volkome en in alle opsigte sonder gebrek [is] en in niks kortkom nie” (Jakobus 1:2-4). En in die proses kan ons geestelik groei.—Efesiërs 4:22-24.
9. Is dit opsioneel om onsself van Bybelwaarheid te oortuig? Verduidelik.
9 Oortuig jouself van Bybelwaarheid. Ons identiteitsgevoel as knegte van Jehovah kan verswak as dit nie stewig op kennis van die Skrif gegrond is nie (Filippense 1:9, 10). Elke Christen—jonk of oud—moet homself daarvan oortuig dat die dinge wat hy glo, inderdaad die waarheid is soos dit in die Bybel gevind word. Paulus het mede-gelowiges aangespoor: “Maak seker van alles; hou vas aan wat goed is” (1 Tessalonisense 5:21). Jong Christene wat deel is van godvresende gesinne, moet besef dat hulle hulle nie op die geloof van hulle ouers kan verlaat nie. Salomo se vader, Dawid, het hom gemaan: “Ken die God van jou vader en dien hom met ’n volkome hart” (1 Kronieke 28:9). Dit sou nie genoeg wees vir die jong Salomo om net te let op hoe sy vader geloof in Jehovah opgebou het nie. Hy moes Jehovah self leer ken, en hy het. Hy het God gesmeek: “Gee my nou wysheid en kennis sodat ek voor hierdie volk kan uitgaan en sodat ek kan inkom.”—2 Kronieke 1:10.
10. Waarom is daar niks mee verkeerd om opregte vrae met die regte beweegrede te vra nie?
10 Sterk geloof word op kennis gebou. “Geloof volg . . . op wat gehoor word”, het Paulus gesê (Romeine 10:17). Wat het hy daarmee bedoel? Hy het bedoel dat ons ons geloof en vertroue in Jehovah, sy beloftes en sy organisasie opbou as ons ons met God se Woord voed. Opregte vrae oor die Bybel kan tot gerusstellende antwoorde lei. Daarbenewens vind ons Paulus se raad in Romeine 12:2: “Maak [seker] wat die goeie en aanneemlike en volmaakte wil van God is.” Hoe kan ons dit doen? Deur “die juiste kennis van die waarheid” op te doen (Titus 1:1). Jehovah se gees kan ons help om selfs moeilike onderwerpe te verstaan (1 Korintiërs 2:11, 12). Ons moet bid vir God se hulp wanneer ons sukkel om iets te begryp (Psalm 119:10, 11, 27). Jehovah wil hê dat ons sy Woord moet verstaan, dit moet glo en gehoorsaam. Hy verwelkom opregte vrae wat met die regte beweegrede gevra word.
Wees vasbeslote om God te behaag
11. (a) Watter natuurlike begeerte kan vir ons ’n strik wees? (b) Hoe kan ons die moed bymekaarskraap om portuurdruk te weerstaan?
11 Streef daarna om God te behaag, nie mense nie. Dit is maar net natuurlik om ons identiteit deels te bevestig deur aan ’n groep te behoort. Almal het vriende nodig, en ons voel goed wanneer ander ons aanvaar. Gedurende adolessensie—asook later in die lewe—kan portuurdruk sterk wees en ’n desperate begeerte laat ontstaan om ander na te boots of tevrede te stel. Maar vriende en portuurs dra nie altyd ons belange op die hart nie. Soms soek hulle net iemand om saam met hulle verkeerde dinge te doen (Spreuke 1:11-19). Wanneer ’n Christen voor negatiewe portuurdruk swig, probeer hy gewoonlik sy identiteit verberg (Psalm 26:4). “Moenie julle na die gedrag van die wêreld om julle vorm nie”, het die apostel Paulus gewaarsku (Romeine 12:2, The Jerusalem Bible). Jehovah voorsien die innerlike krag wat ons nodig het om te stry teen enige eksterne druk om toe te gee.—Hebreërs 13:6.
12. Watter beginsel en watter voorbeeld kan ons versterk om standvastig te bly wanneer ons vertroue in God getoets word?
12 Wanneer eksterne druk ons Christelike identiteitsgevoel in gevaar stel, is dit goed om te onthou dat ons lojaliteit aan God baie belangriker is as die openbare mening of die rigting wat die meerderheid inslaan. Die woorde van Eksodus 23:2 is ’n veilige beginsel om te volg: “Jy mag die menigte nie volg met bose oogmerke nie.” Toe die meerderheid van die Israeliete getwyfel het aan Jehovah se vermoë om Sy beloftes te vervul, het Kaleb beslis geweier om die meerderheid te volg. Hy was seker dat God se beloftes betroubaar is, en hy is ryklik beloon vir die standpunt wat hy ingeneem het (Numeri 13:30; Josua 14:6-11). Is jy eweneens gewillig om die druk van die openbare mening te weerstaan sodat jy jou verhouding met God kan bewaar?
13. Waarom is dit verstandig om ons identiteit as Christene bekend te maak?
13 Maak jou Christelike identiteit bekend. Die gesegde dat aanval die beste verdediging is, is waar as ons ons Christelike identiteit wil beskerm. Toe getroue Israeliete in die dae van Esra teenstand ondervind het in hulle pogings om Jehovah se wil te doen, het hulle gesê: “Ons is die knegte van die God van die hemel en die aarde” (Esra 5:11). As ons geraak word deur die reaksies en kritiek van vyandiggesinde mense, kan ons deur vrees verlam word. Ons sal nie ver kom as ons altyd almal tevrede probeer stel nie. Moet dus nie toelaat dat ander jou intimideer nie. Dit is altyd goed om ander duidelik te laat verstaan dat jy een van Jehovah se Getuies is. Jy kan op ’n eerbiedige dog ferm manier jou waardes, oortuigings en posisie as ’n Christen aan ander verduidelik. Laat hulle weet dat jy vasbeslote is om Jehovah se hoë standaarde te handhaaf wanneer sedelike kwessies ter sprake is. Maak dit duidelik dat jy jou Christelike onkreukbaarheid geensins sal prysgee nie. Wys dat jy trots is op jou sedelike standaarde (Psalm 64:10). As jy uitstaan as ’n standvastige Christen, kan dit jou versterk, beskerm en ander selfs beweeg om ondersoek in te stel na Jehovah en sy volk.
14. Moet ons ontmoedig raak as ander ons spot of teëstaan? Verduidelik.
14 Ja, party sal jou moontlik spot of teëstaan (Judas 18). As ander nie gunstig reageer op jou pogings om jou waardes aan hulle te verduidelik nie, moet jy nie ontmoedig raak nie (Esegiël 3:7, 8). Ongeag hoe vasbeslote jy is, jy sal nooit mense kan oortuig wat nie oortuig wil word nie. Dink aan Farao. Geen plaag of wonderwerk—nie eens die persoonlike verlies toe sy eersgeborene gesterf het—kon Farao oortuig dat Moses namens Jehovah gepraat het nie. Moet dus nie toelaat dat mensevrees jou verlam nie. Vertroue en geloof in God kan ons help om vrees te oorkom.—Spreuke 3:5, 6; 29:25.
Kyk na die verlede, bou vir die toekoms
15, 16. (a) Wat is ons geestelike erfenis? (b) Hoe kan ons daarby baat vind as ons in die lig van God se Woord oor ons geestelike erfenis peins?
15 Beskou jou geestelike erfenis as iets kosbaars. Christene sal daarby baat vind as hulle in die lig van God se Woord oor hulle ryk geestelike erfenis peins. Hierdie erfenis sluit die waarheid van Jehovah se Woord in, die hoop op die ewige lewe en die eer om God as verkondigers van die goeie nuus te verteenwoordig. Kan jy jou unieke plekkie onder sy Getuies sien, onder die bevoorregte groep mense wat die opdrag ontvang het om die lewensreddende Koninkrykspredikingswerk te doen? Onthou, niemand anders nie as Jehovah verseker ons: “Julle is my getuies.”—Jesaja 43:10.
16 Jy kan jou vrae afvra soos: ‘Hoe kosbaar is hierdie geestelike erfenis vir my? Stel ek dit so hoog op prys dat ek die uitvoering van God se wil die eerste plek in my lewe gee? Is my waardering daarvoor groot genoeg sodat ek die krag sal hê om enige versoeking te weerstaan wat my daarvan kan beroof?’ Ons geestelike erfenis kan ons ook met ’n diep gevoel van geestelike veiligheid vervul wat net binne Jehovah se organisasie geniet kan word (Psalm 91:1, 2). ’n Hersiening van uitsonderlike gebeure in die hedendaagse geskiedenis van Jehovah se organisasie kan by ons tuisbring dat niks of niemand Jehovah se knegte van die aarde af kan uitwis nie.—Jesaja 54:17; Jeremia 1:19.
17. Wat meer is nodig as om bloot op ons geestelike erfenis te vertrou?
17 Ons kan natuurlik nie uitsluitlik op ons geestelike erfenis vertrou nie. Elkeen van ons moet ’n intieme verhouding met God aankweek. Nadat Paulus hard gewerk het om die geloof van Christene in Filippi op te bou, het hy vir hulle geskryf: “Gevolglik moet julle, my geliefdes, soos julle altyd gehoorsaam was, nie net gedurende my teenwoordigheid nie, maar nou baie geredeliker gedurende my afwesigheid, aanhou om julle eie redding met vrees en bewing te bewerk” (Filippense 2:12). Ons kan nie op iemand anders vertrou om ons redding te bewerk nie.
18. Hoe kan Christelike bedrywighede ons identiteitsgevoel as Christene versterk?
18 Verdiep jou in Christelike bedrywighede. Daar is al gesê dat “werk ’n mens se persoonlike identiteit vorm”. Christene het vandag die belangrike werk om die goeie nuus van God se opgerigte Koninkryk te verkondig. Paulus het gesê: “Aangesien ek in werklikheid ’n apostel vir die nasies is, verheerlik ek my bediening” (Romeine 11:13). Ons predikingswerk onderskei ons van die wêreld, en ons deelname daaraan versterk ons Christelike identiteitsgevoel. As ons ons verdiep in ander teokratiese bedrywighede, soos Christelike vergaderinge, programme om plekke van aanbidding te bou, pogings om dié te help wat in nood verkeer, ensovoorts, kan dit ons identiteitsgevoel as Christene versterk.—Galasiërs 6:9, 10; Hebreërs 10:23, 24.
Duidelike identiteit, tasbare seëninge
19, 20. (a) Watter voordele het jy al persoonlik geniet omdat jy ’n Christen is? (b) Wat gee ons die grondslag van ons ware identiteit?
19 Dink ’n oomblik na oor die talle voordele wat ons geniet omdat ons ware Christene is. Ons het die voorreg om persoonlik deur Jehovah erken te word. Die profeet Maleagi het gesê: “Dié wat Jehovah vrees, [het] met mekaar gepraat, elkeen met sy metgesel, en Jehovah het aandag bly skenk en geluister. En ’n gedenkboek is voor hom geskryf vir dié wat Jehovah vrees en vir dié wat aan sy naam dink” (Maleagi 3:16). God kan ons as sy vriende beskou (Jakobus 2:23). Ons lewens word versier deur doelgerigtheid, deur diepe betekenis en deur heilsame, produktiewe doelwitte. En ons het die hoop op ’n ewige toekoms ontvang.—Psalm 37:9.
20 Onthou dat jou ware identiteit en waarde bepaal word deur God se beskouing van jou, nie deur wat ander mense van jou dink nie. Ander beoordeel ons dalk volgens gebrekkige menslike standaarde. Maar God se liefde en persoonlike belangstelling gee ons die ware grondslag van ons waarde—ons behoort aan hom (Matteus 10:29-31). Die liefde wat ons op ons beurt vir God het, kan ons die sterkste identiteitsgevoel en die beste leiding in ons lewe gee. “As iemand God liefhet, word dié deur hom geken.”—1 Korintiërs 8:3.
[Voetnoot]
a Hierdie woorde sinspeel moontlik op die pligte van die beampte van die tempelberg in Jerusalem. Gedurende die nagwake het hy deur die tempel gestap om te sien of die Levitiese wagte wakker was of geslaap het op hulle pos. Enige wag wat geslaap het, is met ’n stok geslaan, en sy boklere kon as ’n vernederende straf verbrand word.
Onthou jy?
• Waarom is dit noodsaaklik dat Christene hulle geestelike identiteit bewaar?
• Hoe kan ons ons Christelike identiteit bevestig?
• Watter faktore kan ons help om die regte besluit te neem wanneer ons moet kies wie ons wil behaag?
• Watter uitwerking kan ’n sterk identiteitsgevoel op ons toekoms as Christene hê?
[Prente op bladsy 21]
As ons ons in Christelike bedrywighede verdiep, kan dit ons Christelike identiteitsgevoel versterk