Ons kan enige beproewing verduur!

ONDERGAAN jy op die oomblik ’n beproewing? Voel jy mismoedig en nie in staat om dit te verduur nie? Is jy selfs partykeer bang dat jou probleem uniek is en dat daar geen oplossing daarvoor is nie? Dan kan jy moed skep! Ongeag watter beproewinge oor ons kom, die Bybel verseker ons dat God ons in staat kan stel om dit te verduur.

Die Bybel erken dat God se knegte “allerhande beproewinge [sal] teëkom” (Jakobus 1:2). Let op die woord “allerhande” (Grieks poi·kiʹlos). Volgens die antieke gebruik daarvan beteken die oorspronklike woord “menigvuldig” of “veelkleurig” en beklemtoon dit “die verskeidenheid van die beproewinge”. “Allerhande beproewinge” is dus beproewinge wat as ’t ware in baie kleure voorkom. Maar Jehovah ondersteun ons sodat ons elke beproewing kan verduur. Waarom kan ons daarvan seker wees?

“God se onverdiende goedhartigheid waaraan daar op verskillende maniere uiting gegee word”

Die apostel Petrus wys daarop dat Christene deur “allerhande beproewinge bedroef word” (1 Petrus 1:6). Later in sy geïnspireerde brief praat hy van “God se onverdiende goedhartigheid waaraan daar op verskillende maniere uiting gegee word” (1 Petrus 4:10). Die uitdrukking “op verskillende maniere” bevat ’n vorm van dieselfde oorspronklike Griekse woord. Een Bybelgeleerde het kommentaar oor hierdie uitdrukking gelewer en gesê: “Dit is ’n indrukwekkende gedagte. . . . Om van die genade [of, onverdiende goedhartigheid] van God as poikilos te praat, beteken dat daar geen kleur in die mens se situasie is wat nie deur die genade van God gedek kan word nie.” Hy sê verder: “Daar is geen denkbare situasie, geen denkbare krisis, noodgeval of behoefte waaruit die genade van God nie ’n uitweg kan vind nie en waaroor die genade van God nie kan triomfeer nie. Daar is niks in die lewe waarteen die genade van God nie opgewasse is nie. Hierdie beskrywende woord poikilos laat ons dadelik dink aan daardie veelkleurige genade van God wat inderdaad vir alles voldoende is.”

Beproewinge en onverdiende goedhartigheid

Een van die maniere waarop daar aan God se onverdiende goedhartigheid uiting gegee word, is volgens Petrus deur die verskillende persone wat die Christengemeente uitmaak (1 Petrus 4:11). Elke kneg van God het geestelike gawes, of vermoëns, wat as ’n bron van aanmoediging kan dien vir diegene wat beproewinge verduur (Romeine 12:6-8). Party lede van die gemeente is byvoorbeeld uitstekende Bybelonderrigters. Hulle insigryke woorde inspireer en motiveer ander om te volhard (Nehemia 8:1-4, 8, 12). Ander doen gereelde herdersbesoeke by diegene wat ondersteuning nodig het. Hierdie besoeke is geleenthede om aanmoediging te gee, om ‘harte te vertroos’ (Kolossense 2:2). Wanneer opsieners sulke geloofversterkende besoeke doen, deel hulle ’n geestelike gawe mee (Johannes 21:16). Ander in die gemeente is weer bekend vir hulle hartlikheid, medelye en teerheid wanneer hulle met medegelowiges omgaan wat deur beproewinge bedroef word (Handelinge 4:36; Romeine 12:10; Kolossense 3:10). Die empatie en bystand van sulke liefdevolle broers en susters is ’n belangrike blyk, of “kleur”, van God se onverdiende goedhartigheid.—Spreuke 12:25; 17:17.

“Die God van alle vertroosting”

Jehovah voorsien bowenal vertroosting. Hy is “die God van alle vertroosting, . . . wat ons in al ons verdrukking vertroos” (2 Korintiërs 1:3, 4). Die wysheid wat in God se geïnspireerde Woord gevind word en die krag wat deur sy heilige gees voorsien word, is die vernaamste middele wat Jehovah gebruik om ons gebede om hulp te verhoor (Jesaja 30:18, 21; Lukas 11:13; Johannes 14:16). Ons kan moed skep uit die geïnspireerde belofte wat deur die apostel Paulus gemaak is. Hy het gesê: “God is getrou, en hy sal nie toelaat dat julle versoek word bo wat julle kan verdra nie, maar saam met die versoeking sal hy ook die uitweg gee, sodat julle dit sal kan verduur.”—1 Korintiërs 10:13.

Ja, ongeag wat die “kleur”, of aard, van ons beproewing is, daar sal altyd ’n ooreenstemmende “kleur”, of blyk, van God se onverdiende goedhartigheid wees (Jakobus 1:17). Die tydige en gepaste ondersteuning wat Jehovah aan sy knegte voorsien—ongeag hoe verskillend hulle versoekings of uitdagings ook al mag wees—is maar net een bewys van “die uiters veelsydige wysheid van God” (Efesiërs 3:10). Stem jy nie saam nie?

[Prente op bladsy 31]

Jehovah help ons om ons beproewinge te verduur