Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • w05 7/1 bl. 13-15
  • Hulle stel hulle beskikbaar

Video nie beskikbaar nie.

Jammer, die video kon nie laai nie.

  • Hulle stel hulle beskikbaar
  • Die Wagtoring kondig Jehovah se Koninkryk aan—2005
  • Onderhofies
  • Soortgelyke materiaal
  • Tydige aanmoediging vir die gegradueerdes
  • Leersame ondervindinge en onderhoude
  • ’n Gewillige gees laat mense Gilead toe gaan
    Die Wagtoring kondig Jehovah se Koninkryk aan—2001
  • Tot diens beweeg
    Die Wagtoring kondig Jehovah se Koninkryk aan—2000
  • Gileadskool—60 jaar van sendingopleiding
    Die Wagtoring kondig Jehovah se Koninkryk aan—2003
  • Gileadgegradueerdes gaan uit as ywerige oeswerkers!
    Die Wagtoring kondig Jehovah se Koninkryk aan—2004
Sien nog
Die Wagtoring kondig Jehovah se Koninkryk aan—2005
w05 7/1 bl. 13-15

Hulle stel hulle beskikbaar

“U VOLK sal hulle gewillig aanbied” (Psalm 110:3). Hierdie woorde het spesiale betekenis vir die 46 studente van die 118de klas van die Wagtoring-Bybelskool Gilead. Hoe het hulle hulle voorberei om hierdie skool by te woon, wat toekomstige sendelinge oplei om in die geestelike behoeftes van mense in ander lande te voorsien? Mike en Stacie, lede van die 118de klas, het verduidelik: “Ons besluit om ’n eenvoudige lewe te lei, het ons gehelp om afleidings tot ’n minimum te beperk en om ons geestelike fokus te behou. Ons was vasbeslote om nie toe te laat dat ons sukses in die sakewêreld geestelike doelwitte verdring nie.” Soos Mike en Stacie, het die ander studente van hierdie klas hulle gewillig beskikbaar gestel, en nou dien hulle op vier vastelande as Koninkryksverkondigers.

Op Saterdag 12 Maart 2005 het ’n gehoor van 6 843 met duidelike vreugde na die gradueringsprogram geluister. Theodore Jaracz, ’n lid van die Bestuursliggaam van Jehovah se Getuies, het as voorsitter gedien. Nadat hy die gaste uit 28 lande hartlik verwelkom het, het hy die aandag op die waarde van Bybelonderrig gevestig. Die spreker het William Lyon Phelps, ’n Amerikaanse opvoedkundige, aangehaal en gesê: “Almal wat ’n deeglike kennis van die Bybel het, kan waarlik geleerd genoem word.” Ongeag hoe nuttig sekulêre geleerdheid is, Bybelonderrig is beter. Dit help mense om kennis van God in te neem, wat tot die ewige lewe lei (Johannes 17:3). Broer Jaracz het die gegradueerdes geprys vir hulle gewilligheid om ’n groter aandeel aan die wêreldwye Bybelopvoedkundige program te hê wat in meer as 98 000 gemeentes van Jehovah se Getuies regoor die wêreld uitgevoer word.

Tydige aanmoediging vir die gegradueerdes

Ná die voorsitter se inleidende opmerkings het William Samuelson die onderwerp bespreek, “Hoe julle soos ’n blaarryke olyfboom in God se huis kan wees”, gebaseer op Psalm 52:8. Hy het daarop gewys dat die olyfboom in die Bybel figuurlik gebruik word as ’n simbool van vrugbaarheid, prag en waardigheid (Jeremia 11:16). Die spreker het die studente met olyfbome vergelyk en gesê: “Jehovah sal prag en waardigheid aan julle toeskryf wanneer julle julle werk om die Koninkryk te verkondig, getrou in julle sendingtoewysings uitvoer.” Net soos die olyfboom ’n uitgestrekte wortelstelsel nodig het om ’n droogte te oorleef, moet die studente hulle geestelike wortels versterk om onverskilligheid, teenstand of ander beproewinge wat hulle moontlik in hulle diens in ander lande sal teëkom, te verduur.—Matteus 13:21; Kolossense 2:6, 7.

John E. Barr, een van die drie lede van die Bestuursliggaam wat ’n deel op die program gehad het, het die tema bespreek: “Julle is die sout van die aarde” (Matteus 5:13). Hy het daarop gewys dat, net soos letterlike sout voedsel teen bederf bewaar, die sendelinge se predikingswerk in verband met God se Koninkryk ’n lewensreddende uitwerking sal hê op diegene wat luister en hulle teen sedelike en geestelike verval sal beskerm. Toe het broer Barr die gegradueerdes op ’n vaderlike toon aangespoor om ‘vrede te bewaar’ met ander (Markus 9:50). “Kweek die vrugte van die gees aan, en maak seker dat julle gedrag en woorde altyd aangenaam en bedagsaam is”, het die spreker gemaan.

“Bly aan boord in diep water” was die tema wat deur Wallace Liverance, een van die Gileadinstrukteurs, beklemtoon is. Net soos ’n skip wat in diep water vaar, in die regte rigting kan beweeg, kan ’n begrip van “die diep dinge van God”—waarhede aangaande God se voorneme en hoe dit uitgevoer sal word—’n mens help om geestelike vooruitgang te maak (1 Korintiërs 2:10). As ons eenvoudig in vlak geestelike water bly deurdat ons tevrede is met “die elementêre dinge van die heilige verklarings van God”, belemmer dit ons vooruitgang en kan dit selfs veroorsaak dat ons ‘skipbreuk ly wat ons geloof betref’ (Hebreërs 5:12, 13; 1 Timoteus 1:19). “Laat ‘die diepte van God se rykdom en wysheid en kennis’ julle in julle sendingtoewysings onderskraag”, het broer Liverance afgesluit.—Romeine 11:33.

Mark Noumair, nog ’n Gileadinstrukteur, het gepraat oor die onderwerp: “Sal julle julle erfenis hooghou?” Oor meer as 60 jaar het die Wagtoring-Bybelskool Gilead geloofwaardigheid en ’n uitstekende reputasie verkry as gevolg van die ‘hoop goeie getuienis’ wat deur die skool se gegradueerdes gelewer is (Genesis 31:48). Hierdie Gilead-erfenis is aan die studente van die 118de klas oorgedra. Broer Noumair het die studente aangespoor om die eertydse Tekoïete van Nehemia se dag na te volg en nederig met die plaaslike gemeente en medesendelinge saam te werk. Hulle is gemaan om die gesindheid te vermy van die trotse “vooraanstaandes” van wie Nehemia gepraat het en om eerder gewillig te wees om stilweg op die agtergrond te werk.—Nehemia 3:5.

Leersame ondervindinge en onderhoude

Die volgende deel op die program het die tema gehad: “Die woord van God het aangehou groei” (Handelinge 6:7). Onder leiding van die Gileadinstrukteur Lawrence Bowen het die studente ondervindinge gedemonstreer wat hulle in die veldbediening gehad het terwyl hulle die skool bygewoon het. Die ondervindinge het getoon dat die studente God se Woord met ywer verkondig het en dat Jehovah hulle pogings ryklik geseën het.

Richard Ashe het onderhoude gevoer met lede van die Bethelgesin wat ten nouste saam met die skool gewerk het. Hulle kommentare het ’n blik gegee op die ondersteuning wat die Bethelgesin gee om Gileadstudente te help om die grootste nut uit hulle opleiding te put. Toe het Geoffrey Jackson met ’n paar voormalige Gileadgegradueerdes gepraat. Hulle het klem gelê op die talle geleenthede wat die sendinglewe bied om lof en eer aan Jehovah te bring. Een het gesê: “Mense sien alles wat jy as ’n sendeling doen. Hulle luister, kyk en onthou.” Die studente is dus aangespoor om daarvan bewus te wees om te alle tye ’n goeie voorbeeld te stel. Hierdie nuttige raad sal ongetwyfeld in toekomstige dae van onskatbare waarde wees.

Stephen Lett, ’n lid van die Bestuursliggaam, het die slottoespraak gehou met die tema: “Gaan uit as draers van ‘lewende water’” (Johannes 7:38). Hy het gesê dat die studente die afgelope vyf maande geweldig daarby baat gevind het om diep uit God se Woord van waarheid te drink. Maar wat sal die nuwe sendelinge doen met die inligting wat hulle opgedoen het? Broer Lett het die gegradueerdes aangespoor om hierdie geestelike water onselfsugtig met ander te deel sodat ook hulle “’n fontein van water . . . wat opborrel om die ewige lewe te gee”, in hulle sal hê (Johannes 4:14). Die spreker het bygevoeg: “Moet nooit vergeet om Jehovah, ‘die bron van lewende water’, die eer en heerlikheid te gee wat hom toekom nie. Wees geduldig wanneer julle diegene onderrig wat uit die droogtegeteisterde Babilon die Grote kom” (Jeremia 2:13). Broer Lett het afgesluit deur die gegradueerdes aan te spoor om die gees en die bruid geesdriftig na te volg en te bly sê: “‘Kom!’ En laat enigeen wat dors is, kom; laat enigeen wat wil, die water van die lewe neem, verniet.”—Openbaring 22:17.

Broer Jaracz het die program afgesluit deur groete oor te dra wat uit verskeie lande ontvang is. Hierna het ’n lid van die graduerende klas ’n brief van waardering gelees.

Kan jy jou beskikbaar stel om te dien waar hulp nodig is? Indien wel, streef dan geestelike doelwitte na, soos hierdie graduerende studente gedoen het. Maai die vreugde en bevrediging wat dit verskaf wanneer ’n mens jou blymoedig en gewillig in God se diens aanbied—hetsy as ’n sendeling in ’n ander land of as ’n bedienaar nader aan die huis.

[Venster op bladsy 13]

KLASSTATISTIEK

Aantal lande verteenwoordig: 8

Aantal lande waarheen gestuur: 19

Aantal studente: 46

Gemiddelde ouderdom: 33,0

Gemiddelde jare in die waarheid: 16,5

Gemiddelde jare in die voltydse bediening: 12,9

[Prent op bladsy 15]

118de Gradueringsklas van die Wagtoring-Bybelskool Gilead

In die lys hieronder word rye van voor na agter genommer, en name word van links na regs in elke ry aangegee.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel