Gileadgegradueerdes gaan uit as ywerige oeswerkers!

“DIE oes is groot, maar die werkers is min. Smeek dan die Heer van die oes om werkers in sy oes uit te stuur” (Matteus 9:37, 38). Hierdie woorde het spesiale betekenis gehad vir die graduerende studente van die 116de klas van die Wagtoring-Bybelskool Gilead terwyl hulle hulle voorberei het om uit te gaan na hulle sendingtoewysings.

Op Saterdag 13 Maart 2004 het altesaam 6 684 by die Wagtoring-onderrigsentrum in Patterson, New York, en by nabygeleë plekke vergader vir die gradueringsprogram, waartydens die klas afskeidsraad en aanmoediging ontvang het. Ons kan almal baat vind by die raad wat daar gegee is terwyl ons ywerig aan die geestelike oeswerk deelneem.

Die openingskommentare deur Theodore Jaracz, ’n lid van die Bestuursliggaam en ’n gegradueerde van die sewende klas van Gilead, het die aandag gevestig op Jesus se woorde: “Gaan . . . en maak dissipels van mense van al die nasies” (Matteus 28:19, 20). Hoe gepas tog, aangesien die gegradueerdes na 20 lande gestuur word! Hy het die studente daaraan herinner dat onderrigting uit God se Woord hulle ten volle toegerus het om ywerige werkers in die allerbelangrikste geestelike oeswerk te wees.—Matteus 5:16.

Hoe om produktiewe oeswerkers te wees

Die eerste spreker op die program was Robert Wallen, wat al jare lank betrokke is by die Gileadskool. Hy het oor die tema “Die prag van medelye” gepraat en vir die studente gesê: “Medelye is ’n taal wat selfs die dowes kan hoor en die blindes kan sien.” Jesus was intens bewus van ander se probleme en het dit probeer verlig (Matteus 9:36). Die studente sal baie geleenthede vind om dieselfde te doen—in die predikingswerk, in die gemeente, in die sendinghuis en in hulle eie huwelik. Die spreker het hulle aangespoor: “Laat die prag van medelye in julle lewe na vore kom terwyl julle ander dien. Net julle heel beste gedrag is goed genoeg vir die daaglikse lewe in die sendinghuis. Wees dus vasbeslote om julle met medelye te beklee.”—Kolossense 3:12.

Daarna het Gerrit Lösch, ’n lid van die Bestuursliggaam en ’n gegradueerde van die 41ste klas van Gilead, die onderwerp “Verkondigers van redding” bespreek (Jesaja 52:7). Om fisies gered te word tydens die vernietiging van die huidige stelsel van dinge, moet mense juiste kennis van God se Woord inneem, hulle geloof in die openbaar bekend maak en hulle laat doop (Romeine 10:10; 2 Timoteus 3:15; 1 Petrus 3:21). Maar die hoofrede waarom ons redding verkondig, is nie om mense te red nie, maar om lof aan God te bring. Broer Lösch het die toekomstige sendelinge gevolglik aangespoor: “Neem die Koninkryksboodskap tot aan die eindes van die aarde, en wees ywerige verkondigers van redding, tot lof van Jehovah.”—Romeine 10:18.

“Hoeveel lig straal jy uit?” is die vraag wat die Gileadinstrukteur Lawrence Bowen gestel het. Hy het na Jesus se woorde in Matteus 6:22 verwys en die studente aangemoedig om hulle oog “eenvoudig” te hou sodat hulle “geestelike lig kan weerkaats wat Jehovah verheerlik en hulle medemens tot voordeel strek”. Van die begin van sy bediening af het Jesus ’n volmaakte voorbeeld in dié opsig gestel deur die uitvoering van God se wil helder voor oë te hou. Jesus het gepeins oor die wonderlike dinge wat sy Vader hom in die hemel geleer het, en dit het hom gehelp om die toetse van Satan in die wildernis te deurstaan (Matteus 3:16; 4:1-11). Jesus het getoon dat hy ten volle op Jehovah vertrou om die taak uit te voer wat God aan hom opgedra het. As die sendelinge die uitdagings wat voorlê, die hoof wil bied, moet hulle eweneens goeie Bybelstudiegewoontes handhaaf en ten volle op Jehovah vertrou.

Mark Noumair, ’n Gileadinstrukteur en ’n gegradueerde van die 77ste klas van Gilead, het hierdie reeks toesprake afgesluit met die tema “Hier is ons in u hand” (Josua 9:25). Hy het die studente aangespoor om die gesindheid van die eertydse Gibeoniete na te volg. Hoewel Gibeon “ ’n groot stad was . . . en al sy manne sterk manne was”, het die Gibeoniete nie aangedring op erkenning of verwag dat dinge op hulle manier gedoen moet word nie (Josua 10:2). Hulle het gewillig onder die Leviete gedien as “houtkappers en waterdraers” ter ondersteuning van Jehovah se aanbidding (Josua 9:27). Die lede van die graduerende klas het as ’t ware vir die Grotere Josua, Jesus Christus, gesê: “Hier is ons in u hand.” Wanneer hulle dan nou met hulle toewysings in ander lande begin, moet hulle enige werk aanvaar wat die Grotere Josua vir hulle gee om te doen.

Ondervindinge en onderhoude

“Open die Skrif ten volle” was die tema van ’n bespreking wat Wallace Liverance, ’n gegradueerde van die 61ste klas van Gilead en een van die instrukteurs, met ’n groep studente gehad het. Hulle het ondervindinge wat hulle gedurende hulle kursus in die veldbediening gehad het, vertel en gedemonstreer. Dit was duidelik dat hulle intensiewe studie van die Skrif tydens hulle vyf maande lange opleiding hulle hart bereik het en hulle beweeg het om aan ander bekend te maak wat hulle geleer het (Lukas 24:32). Gedurende die kursus van vyf maande het een student vir sy vleeslike broer vertel van die dinge wat hy geleer het. Dit het sy broer aangespoor om die plaaslike gemeente te besoek en met sy eie studie van die Bybel te begin. Hy het nou aan die vereistes voldoen om ’n ongedoopte verkondiger te wees.

Ná die ondervindinge het Richard Ashe en John Gibbard onderhoude gevoer met ’n hele paar getroue knegte van Jehovah wat hom al jare lank dien, onder andere reisende opsieners wat vir spesiale opleiding by die Wagtoring-onderrigsentrum was. Hulle het aan vroeëre klasse van die Gileadskool gegradueer. Een van hulle het vertel hoe broer Knorr gedurende die kursus vir hulle gesê het: “By Gilead sal julle baie studeer. Maar as julle hier weggaan met ’n groot kop, het ons gefaal. Ons wil hê dat julle hier moet weggaan met ’n groot hart.” Die reisende broers se raad aan die huidige klas was om besorg te wees oor mense, om ander te behandel soos Christus dit gedoen het en om enige toewysing wat hulle ontvang, nederig te aanvaar. As hulle hierdie raad toepas, sal dit die nuwe sendelinge ongetwyfeld help om produktief in hulle toewysings te wees.

Gaan uit as ywerige oeswerkers!

Die gehoor het die geleentheid gehad om te luister na ’n toespraak deur Stephen Lett, nog ’n lid van die Bestuursliggaam. Hy het die hooftoespraak op die program gehou, met die titel “Gaan uit as ywerige oeswerkers!” (Matteus 9:38). In die geval van ’n letterlike oes is die oestyd beperk. Dit is belangrik dat die oeswerkers hard werk. Hoeveel belangriker is dit nie gedurende die voleinding van hierdie stelsel van dinge nie! In die groot geestelike oeswerk is lewens op die spel (Matteus 13:39). Broer Lett het die gegradueerdes aangespoor om nie ‘traag te wees in hulle bedrywighede nie’, maar om te “gloei van die gees” en ‘Jehovah as slawe te dien’ in hierdie eenmalige oeswerk (Romeine 12:11). Die spreker het Jesus se woorde aangehaal: “Slaan julle oë op en aanskou die lande, dat hulle wit is vir die oes” (Johannes 4:35). Hy het die gegradueerdes toe aangespoor om hulle ywer vir die oeswerk te toon deur ’n opregte poging aan te wend om mense te bereik wanneer en waar hulle ook al gevind kan word en deur alle geleenthede aan te gryp om informeel te getuig. As hulle altyd op die uitkyk is na sulke geleenthede, kan dit tot ’n doeltreffende getuienis lei. Jehovah is ’n God van ywer, en hy verwag dat ons almal hom navolg en hard werk in die geestelike oeswerk.—2 Konings 19:31; Johannes 5:17.

Die voorsitter, broer Jaracz, het die program afgesluit deur die groete oor te dra van etlike takkantore, waarna hy die diplomas aan die studente oorhandig het. Een van die gegradueerdes het ’n brief van die klas voorgelees, waarin hulle hulle opregte waardering uitgespreek het vir die opleiding wat hulle ontvang het. Die gradueringsprogram van die 116de klas het almal wat dit bygewoon het, ongetwyfeld meer vasbeslote gemaak om uit te gaan as ywerige oeswerkers.

[Venster op bladsy 25]

KLASSTATISTIEK

Aantal lande verteenwoordig: 6

Aantal lande waarheen gestuur: 20

Aantal studente: 46

Gemiddelde ouderdom: 34,2

Gemiddelde jare in die waarheid: 17,2

Gemiddelde jare in die voltydse bediening: 13,9

[Prent op bladsy 26]

116de Gradueringsklas van die Wagtoring-Bybelskool Gilead

In die lys hieronder word rye van voor na agter genommer, en name word van links na regs in elke ry aangegee.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.