Vrae van lesers
Beteken die woord “moontlik” in Sefanja 2:3 dat knegte van God nie seker kan wees dat hulle die ewige lewe sal kry nie?
Hierdie teks sê: “Soek Jehovah, alle sagmoediges van die aarde, wat Sy regterlike beslissing uitgevoer het. Soek regverdigheid, soek sagmoedigheid. Moontlik sal julle verberg word in die dag van Jehovah se toorn.” Waarom sê hierdie vers “moontlik”?
Om te verstaan hoe Jehovah by Armageddon met sy getroue knegte sal handel, is dit nuttig om te dink aan wat die Bybel leer aangaande wat God sal doen vir diegene wat voor daardie oordeelstyd sterf. Sommige sal ’n opstanding tot onsterflike lewe as geesskepsele in die hemel kry, terwyl ander op die aarde opgewek sal word, met die vooruitsig om vir ewig in die Paradys te lewe (Johannes 5:28, 29; 1 Korintiërs 15:53, 54). As Jehovah sy lojale knegte wat voor Armageddon sterf, onthou en beloon, sal hy sy knegte wat lewe op die dag van sy toorn, sekerlik op soortgelyke wyse behandel.
Die geïnspireerde woorde van die apostel Petrus is ook aanmoedigend. Hy het geskryf: “[God het] Noag, ’n prediker van regverdigheid, met sewe ander veilig bewaar . . . toe hy ’n watervloed oor ’n wêreld van goddelose mense gebring het; en [toe] hy die stede Sodom en Gomorra veroordeel het deur hulle tot as te verbrand, . . . [het] hy die regverdige Lot verlos . . . Jehovah [weet] hoe om mense van godvrugtige toegewydheid uit beproewing te verlos, maar om onregverdige mense te bewaar vir die dag van die oordeel om uitgeroei te word” (2 Petrus 2:5-9). Hoewel Jehovah die goddeloses in die verlede vernietig het, het hy Noag sowel as Lot, wat hom getrou gedien het, se lewe gered. Jehovah sal mense van godvrugtige toegewydheid ook verlos wanneer hy die goddeloses by Armageddon vernietig. “’n Groot menigte” regverdiges sal dit oorleef.—Openbaring 7:9, 14.
Dit wil dan voorkom of “moontlik” in Sefanja 2:3 nie gebruik word weens enige onsekerheid oor God se vermoë om diegene te bewaar wat sy goedkeuring het nie. Dit toon eerder dat die moontlikheid dat iemand in die dag van Jehovah se toorn verberg sal word, alleenlik bestaan as hy regverdigheid en sagmoedigheid begin soek. Redding sal daarvan afhang of ’n persoon aanhou om sagmoedigheid en regverdigheid te soek.—Sefanja 2:3.
[Prent op bladsy 31]
“Jehovah [weet] hoe om mense van godvrugtige toegewydheid uit beproewing te verlos”