Betaal dit om lojaal te wees?
“JY BETAAL hopeloos te veel vir mediese versekering”, het Karl, ’n versekeringsagent, gesê.a “As jy verander na my maatskappy, sal jy R120 per maand spaar, wat baie is.”
“Dit is dalk waar”, het Jens geantwoord. “Maar ek het my mediese versekering al ’n hele paar jaar by dieselfde maatskappy. Hulle was in die verlede baie behulpsaam, en ek wil aan hulle lojaal bly.”
“Lojaliteit is ’n goeie eienskap”, het Karl geantwoord. “Maar jou lojaliteit kos jou geld!”
Karl was reg. Om lojaal, of getrou, aan iemand anders te wees, kan dikwels geld kos.b Dit verg ook tyd, energie en emosionele betrokkenheid. Is lojaliteit die moeite werd?
Meer dikwels geprys as beoefen
In ’n opname wat in Duitsland deur die Allensbach-meningspeilingsinstituut gedoen is, het 96 persent van die respondente getrouheid as ’n gewenste eienskap beskou. ’n Tweede Allensbach-meningspeiling wat onder 18- tot 24-jariges gedoen is, het getoon dat 2 uit 3 respondente getrouheid as “in” beskou, dit wil sê, hulle het ’n gunstige beskouing daarvan.
Hoewel lojaliteit, of getrouheid, alom geprys word, is dit ’n heeltemal ander saak om werklik lojaal te wees, of getrou te wees. Byvoorbeeld, in baie Europese lande toon huweliksmaats of gesinslede dikwels min lojaliteit aan mekaar. Vriende is dikwels dislojaal aan mekaar. En die lojaliteit wat vroeër ’n werkgewer en werknemer of ’n sakeonderneming en sy kliënte verbind het, het feitlik verdwyn. Waarom?
Soms laat die gejaagdheid van die lewe min tyd of emosionele stamina vir verbintenisse wat lojaliteit verg. Persone wat in menseverhoudinge teleurgestel en in die steek gelaat is, skram dalk nou daarvan weg om aan enigiemand getrou te wees. Ander verkies dalk ’n vandag-hier-en-môre-daar-lewenswyse wat nie lojaliteit vereis nie.
Wat die rede ook al is, lojaliteit is ’n deug wat meer dikwels geprys as beoefen word. Daarom ontstaan die vrae: Betaal dit om lojaal te wees? Indien wel, aan wie moet ons lojaal wees, en hoe? Watter voordele hou lojaliteit in?
[Voetnote]
a Sommige name in hierdie en in die volgende artikel is verander.
b Hoewel “lojaliteit” en “getrouheid” nie altyd in dieselfde konteks gebruik word nie, word dit in hierdie artikels soms uitruilbaar gebruik.
[Lokteks op bladsy 3]
Lojaliteit is ’n deug wat meer dikwels geprys as beoefen word