Weerstaan verkeerde denke!

TOE rampspoed die aartsvader Job getref het, het hy ’n besoek van sy drie vriende Elifas, Bildad en Sofar ontvang. Hulle het gekom om met hom te simpatiseer en hom te vertroos (Job 2:11). Die invloedrykste en moontlik die oudste van die drie was Elifas. Hy het eerste gepraat en het die meeste te sê gehad. Watter soort denke het Elifas in sy drie redevoerings geopenbaar?

Elifas het verwys na ’n bonatuurlike ondervinding wat hy eenkeer gehad het en gesê: “’n Gees het voor my aangesig verbygegaan; die hare van my vlees het regop begin staan. Hy het stil gaan staan, maar ek het sy voorkoms nie herken nie; ’n gedaante was voor my oë; daar was ’n kalmte, en toe het ek ’n stem gehoor” (Job 4:15, 16). Watter soort gees het Elifas se denke beïnvloed? Die kritiese toon van die woorde wat gevolg het, toon dat die gees beslis nie een van God se regverdige engele was nie (Job 4:17, 18). Dit was ’n bose geesskepsel. Waarom anders sou Jehovah vir Elifas en sy twee metgeselle tereggewys het vir die leuens wat hulle vertel het? (Job 42:7). Ja, Elifas is deur ’n demoon beïnvloed. Sy opmerkings het goddelose denke weerspieël.

Watter idees kan in Elifas se bewerings geïdentifiseer word? Waarom is dit belangrik dat ons teen verkeerde denke waak? En watter stappe kan ons neem om dit te weerstaan?

“In sy knegte het hy geen geloof nie”

In al drie redevoerings het Elifas die idee geopper dat God so veeleisend is dat niks wat sy knegte doen, vir hom goed genoeg is nie. “Kyk! In sy knegte het hy geen geloof nie”, het Elifas vir Job gesê, “en sy boodskappers beskuldig hy van dwaling” (Job 4:18, voetnoot in NW). Elifas het later van God gesê: “In sy heiliges het hy geen geloof nie, en die hemele is nie rein in sy oë nie” (Job 15:15). En hy het gevra: “Skep die Almagtige enigsins behae daarin dat jy regverdig is?” (Job 22:3). Bildad het met hierdie beskouing saamgestem, want hy het gesê: “Daar is selfs die maan, en dit is nie helder nie; en die sterre is nie rein in [God se] oë nie.”—Job 25:5.

Ons moet oppas dat ons nie deur sulke denke beïnvloed word nie. Dit kan ons laat voel dat God te veel van ons vereis. Hierdie beskouing benadeel ons verhouding met Jehovah. En as ons voor sulke redenasies swig, hoe sal ons dan reageer wanneer ons die nodige dissipline gegee word? In plaas van die teregwysing nederig te aanvaar, sal ons hart dalk “woedend vir Jehovah” word, en ons sal hom miskien kwalik neem (Spreuke 19:3). Dit sal geestelik rampspoedig wees!

“Kan ’n man vir God van nut wees?”

Die idee dat God te veeleisend is, is nou verwant aan die beskouing dat hy mense nutteloos ag. Elifas se derde redevoering bevat die vraag: “Kan ’n man vir God van nut wees, sodat iemand wat insig het, vir hom van nut sou wees?” (Job 22:2). Elifas het te kenne gegee dat die mens vir God nutteloos is. In dieselfde trant het Bildad geredeneer: “Hoe kan ’n sterflike mens dan reg wees voor God, of hoe kan iemand wat uit ’n vrou gebore is, rein wees?” (Job 25:4). Hoe kon Job, ’n blote mens, volgens hierdie redenasie, ooit dink dat hy ’n regverdige posisie voor God kon hê?

Vandag word sommige mense deur negatiewe gevoelens oor hulleself geteister. Faktore soos gesinsagtergrond, blootstelling aan die druk van die lewe of lyding weens rasse- of etniese haat kan daartoe bygedra het. Maar Satan en sy demone skep ook behae daarin om mense te verbrysel. As hulle iemand kan beïnvloed sodat hy dink dat niks wat hy doen, vir God die Almagtige goed genoeg is nie, sal hy makliker moedeloos word. So ’n persoon kan met verloop van tyd wegdryf, hom selfs terugtrek, van die lewende God.—Hebreërs 2:1; 3:12.

Ouderdom en gesondheidsprobleme beperk ons. Die aandeel wat ons aan Koninkryksdiens het, lyk dalk baie klein in vergelyking met wat ons gedoen het toe ons jonger, gesonder en sterker was. Hoe belangrik is dit tog om te besef dat Satan en sy demone ons wil laat voel dat wat ons doen, nie vir God goed genoeg is nie! Ons moet sulke denke weerstaan.

Hoe om negatiewe denke te weerstaan

Ondanks die lyding wat Satan die Duiwel oor hom gebring het, het Job gesê: “Totdat ek sterf, sal ek my onkreukbaarheid nie prysgee nie!” (Job 27:5). Omdat Job God liefgehad het, was hy vasbeslote om sy onkreukbaarheid te handhaaf ongeag wat gebeur, en niks sou dit verander nie. Hierin lê ’n vername manier om negatiewe denke te weerstaan. Ons moet ’n goeie begrip van God se liefde verkry en hartgrondige waardering daarvoor aankweek. Ons moet ook ons liefde vir hom versterk. Dit kan gedoen word deur middel van ’n gereelde studie van God se Woord en biddende bepeinsing oor wat ons leer.

Johannes 3:16 sê byvoorbeeld: “God het die wêreld so liefgehad dat hy sy enigverwekte Seun gegee het.” Jehovah het innige liefde vir die mensdom, en sy handelinge met mense oor die jare heen getuig van hierdie liefde. Bepeinsing oor voorbeelde uit die verlede behoort ons waardering vir Jehovah te vergroot en ons liefde vir hom te versterk, wat ons sal help om verkeerde en negatiewe denke te weerstaan.

Dink aan hoe Jehovah teenoor Abraham opgetree net voordat Sodom en Gomorra vernietig is. Abraham het Jehovah agt keer ’n vraag oor Sy oordeel gevra. Jehovah het nooit enige irritasie of frustrasie getoon nie. Sy antwoorde het Abraham eerder gerusgestel en vertroos (Genesis 18:22-33). Toe God Lot en sy gesin later uit Sodom gered het, het Lot gevra of hy eerder na ’n nabygeleë stad kan vlug as na die berge. Jehovah het geantwoord: “Kyk, ek neem jou ook hierin in aanmerking, deur nie die stad te verwoes waarvan jy gepraat het nie” (Genesis 19:18-22). Beeld hierdie verslae Jehovah uit as ’n veeleisende, liefdelose, eiemagtige heerser? Nee. Dit beeld hom uit soos hy werklik is—’n liefdevolle, goedhartige, barmhartige en simpatieke Soewerein.

Die voorbeelde van Aäron, Dawid en Manasse van eertydse Israel weerlê die bewering dat God ’n foutsoeker is en dat niemand vir hom goed genoeg kan wees nie. Aäron was skuldig aan drie ernstige oortredings. Hy het die goue kalf gemaak, saam met Mirjam vir Moses gekritiseer en versuim om Jehovah by Meriba te heilig en te eer. Jehovah het nietemin iets goeds in hom gesien en hom toegelaat om tot sy dood as hoëpriester te bly dien.—Eksodus 32:3, 4; Numeri 12:1, 2; 20:9-13.

Koning Dawid het ernstige sondes gedurende sy heerskappy gepleeg. Hy het onder meer egbreuk gepleeg, ’n onskuldige man se dood beplan en ’n onwettige sensus geneem. Maar Jehovah het Dawid se berou gesien en lojaal by die Koninkryksverbond gebly deur hom toe te laat om tot sy dood as koning te dien.—2 Samuel 12:9; 1 Kronieke 21:1-7.

Die Judese koning Manasse het altare vir Baäl opgerig, sy seuns deur die vuur laat gaan, spiritistiese gebruike bevorder en altare vir valse aanbidding in die voorhowe van die tempel gebou. Nadat hy egter opregte berou getoon het, het Jehovah hom vergewe, hom uit gevangenskap laat kom en die koningskap aan hom teruggegee (2 Kronieke 33:1-13). Is dit die optrede van ’n God vir wie niemand goed genoeg is nie? Beslis nie!

Die valse beskuldiger is self skuldig

Dit moet ons nie verbaas nie dat Satan die vernaamste verpersoonliking is van juis die eienskappe waarvan hy Jehovah beskuldig. Satan is gevoelloos en veeleisend. Dit kan duidelik gesien word in die gebruik om kinderofferandes te bring wat in die ou tyd deel van valse aanbidding was. Die afvallige Israeliete het hulle seuns en dogters in die vuur verbrand—iets wat nie eers in Jehovah se hart opgekom het nie.—Jeremia 7:31.

Satan is die foutsoeker, nie Jehovah nie. Openbaring 12:10 verwys na Satan as “die beskuldiger van ons broers, wat hulle dag en nag voor ons God beskuldig!” Maar aangaande Jehovah het die psalmis gesing: “As u op oortredings ag gegee het, o Jah, O Jehovah, wie sou kon bly staan? Want by u is daar ware vergifnis.”—Psalm 130:3, 4.

Wanneer daar nie meer verkeerde denke sal wees nie

Watter verligting moes dit tog vir die engele gewees het toe Satan die Duiwel en sy demone uit die hemel gewerp is! (Openbaring 12:7-9). Daarna kon hierdie bose geeste nie meer enige invloed hê op die bedrywighede van Jehovah se engelegesin in die hemel nie.—Daniël 10:13.

Die bewoners van die aarde sal hulle in die nabye toekoms verheug. Binnekort sal ’n engel wat uit die hemel neerdaal met die sleutel van die afgrond en ’n groot ketting in sy hand, Satan en sy demone bind en hulle in die afgrond van onbedrywigheid slinger (Openbaring 20:1-3). Watter verligting sal dit tog vir ons wees wanneer dit gebeur!

Intussen moet ons teen verkeerde denke waak. Wanneer ons vind dat verkeerde of negatiewe gedagtes in ons verstand insluip, moet ons dit weerstaan deur ons gedagtes op Jehovah se liefde te vestig. Dan ‘sal die vrede van God wat alle denke te bowe gaan, ons harte en ons verstandelike vermoëns bewaak’.—Filippense 4:6, 7. 

[Prent op bladsy 26]

Job het negatiewe denke weerstaan

[Prent op bladsy 28]

Lot het geleer dat Jehovah ’n simpatieke Soewerein is