Watter soort opvoeding kan jou lewe suksesvol maak?

IS JY al ooit so deur probleme oorweldig dat dit gevoel het asof jy in ’n maalstroom verdrink? Dink net hoeveel lyding dit kan veroorsaak as jy een of meer van hierdie probleme verkeerd hanteer! Niemand word gebore met die vermoë om alle probleme suksesvol op te los en altyd goeie besluite te neem nie. Dit is waarom opvoeding nodig is. Waar kan jy opvoeding kry om jou voor te berei om lewensprobleme die hoof te bied?

Baie mense, jonk sowel as oud, sê dat ’n akademiese opvoeding uiters belangrik is. Party deskundiges sê selfs dat hulle “vas glo dat jy nooit ’n [goeie] werk sal kan kry sonder ’n universiteitsgraad nie”. Maar daar is etlike menslike behoeftes wat nie deur materiële prestasies bevredig kan word nie. Byvoorbeeld, help hoër onderwys jou om ’n goeie ouer, huweliksmaat of vriend te wees? Die feit is dat mense wat weens hulle intellektuele prestasies bewonder word, soms ongewenste eienskappe ontwikkel, in hulle gesinslewe misluk of selfs op die ou end selfmoord pleeg.

Party wend hulle tot godsdiens as ’n bron van opvoeding om leiding te voorsien, maar word teleurgestel omdat hulle nie praktiese hulp ontvang om lewensprobleme die hoof te bied nie. Ter toeligting hiervan sê Emiliaa van Mexiko: “Vyftien jaar gelede het ek gevoel dat ek en my man eenvoudig nie meer onder een dak kan bly nie. Ons het die hele tyd gestry. Ek kon hom nie kry om op te hou drink nie. Ek moes ons kindertjies dikwels alleen los terwyl ek na my man gaan soek het. Ek was emosioneel uitgeput. ’n Hele paar keer het ek kerk toe gegaan op soek na iets wat my kon help om ’n oplossing te vind. Hoewel die Bybel soms gebruik is, het ek nooit enige raad gehoor wat spesifiek oor my situasie gehandel het nie; en ook het niemand na my toe gekom om vir my te sê wat om te doen nie. Om ’n rukkie in die kerk te sit en ’n paar gebede oor en oor op te sê, was nie vir my genoeg nie.” Ander word moontlik ontnugter wanneer hulle sien dat hulle geestelike leiers self glad nie ’n voorbeeldige lewe lei nie. Gevolglik verloor baie mense vertroue in godsdiens as ’n bron van opleiding of opvoeding vir ’n suksesvolle lewe.

Jy kan jou dus afvra: ‘Watter soort opvoeding moet ek kry om my lewe suksesvol te maak?’ Het die ware Christelike godsdiens die antwoord op hierdie belangrike vraag? Dit sal in die volgende artikel bespreek word.

[Voetnoot]