Onthou jy?

Het jy dit geniet om die onlangse nommers van Die Wagtoring te lees? Kyk of jy die volgende vrae kan beantwoord:

• Waarom kan die eerste sonde—Adam se ongehoorsaamheid—met ’n oorerflike siekte vergelyk word?

Dit is soos ’n siekte omdat Adam sonde aan sy nageslag oorgedra het. Ons het dus sonde, ’n gebrek, oorgeërf, net soos sommige kinders ’n siekte van hulle ouers oorerf.—8/15, bladsy 5.

• Wat is grondoorsake van die hedendaagse toename in geweld?

Satan probeer mense van Jehovah vervreem deur ’n gewelddadige gees in hulle hart te saai, onder meer deur middel van rolprente, musiek en rekenaarspeletjies wat spelers aanspoor om wreedheid en bloedvergieting na te boots. Mediageweld is ’n bydraende faktor by baie gewelddade.—9/1, bladsy 29.

• Wie was Pontius Pilatus?

Hy was ’n Romein van die laer adelstand wat waarskynlik tevore in die leër was. Die Romeinse keiser Tiberius het Pilatus in 26 G.J. as die goewerneur van die provinsie Judea aangestel. Tydens Jesus se verhoor het Pilatus aanklagte aangehoor wat deur die Joodse leiers gemaak is. Om die skare tevrede te stel, het hy toestemming gegee dat Jesus tereggestel word.—9/15, bladsye 10-12.

• Wat is “die teken” wat in Matteus 24:3 genoem word?

Hierdie teken bestaan uit verskeie fasette wat ’n saamgestelde identifiserende kenmerk uitmaak. Die teken sluit oorlog, hongersnood, pessiektes en aardbewings in, en dit sou Jesus se volgelinge in staat stel om sy “teenwoordigheid” sowel as “die voleinding van die stelsel van dinge” te herken.—10/1, bladsye 4-5.

• Wat was die Diaspora, en watter plekke was hierby betrokke?

Die term verwys na die Jode wat buite Palestina gewoon het. In die eerste eeu was die vernaamste Joodse sentrums in Sirië, Klein-Asië, Babilonië en Egipte, en daar was kleiner gemeenskappe in die Europese deel van die Romeinse Ryk.—10/15, bladsy 12.

• Kan ’n Christen ’n goeie gewete behou as hy werk aanvaar wat behels dat hy gewapen moet wees?

Elkeen moet self besluit of hy sekulêre werk sal doen wat vereis dat hy ’n vuurwapen of ’n ander soort wapen dra. Maar werk waar ’n mens gewapen moet wees, stel jou bloot aan die moontlikheid om bloedskuldig te word as jy die wapen gebruik en aan die gevaar om in ’n aanval of weens weerwraak beseer of doodgemaak te word. ’n Christen wat so ’n wapen dra, sal nie vir enige spesiale voorregte in die gemeente in aanmerking kom nie (1 Timoteus 3:3, 10).—11/1, bladsy 31.

• Sal die oorlog van Armageddon by ’n berg in die Midde-Ooste gevoer word, aangesien die woord “Armageddon” van die uitdrukking “Berg Megiddo” afkomstig is?

Nee. Daar bestaan geen Berg Megiddo nie, net ’n heuwel wat bo die aangrensende valleivlakte in Israel uitrys. Daardie gebied is nie groot genoeg vir al “die konings van die aarde en hulle leërs” nie. God se groot oorlog sal wêreldwyd gevoer word, en dit sal ’n einde aan alle oorloë maak (Openbaring 16:14, 16; 19:19; Psalm 46:8, 9).—12/1, bladsye 4-7.