Armageddon—’n Gelukkige begin

DIE woord “Armageddon” het sy oorsprong by die Hebreeuse uitdrukking “Har–Magedon”, of “Berg Megiddo”. Dit word gevind in Openbaring 16:16, wat sê: “Hulle het hulle versamel na die plek wat in Hebreeus Har–Magedon genoem word.” Wie word na Armageddon versamel, en waarom? Net twee verse vroeër, in Openbaring 16:14, lees ons: “Die konings van die hele bewoonde aarde” word versamel “vir die oorlog van die groot dag van God die Almagtige”. Hierdie stellings gee natuurlik aanleiding tot ander interessante vrae. Waar veg hierdie “konings”? Oor watter geskil voer hulle oorlog, en teen wie? Sal hulle, soos baie glo, wapens vir massavernietiging gebruik? Sal daar mense wees wat Armageddon oorleef? Laat die Bybel die antwoorde voorsien.

Beteken die verwysing na die “Berg Megiddo” dat Armageddon by ’n sekere berg in die Midde-Ooste geveg sal word? Nee. Eerstens bestaan daar nie werklik so ’n berg nie—op die plek waar eertydse Megiddo geleë was, is daar net ’n heuwel wat sowat 20 meter bo die aangrensende valleivlakte uitrys. Daarbenewens is die gebied om Megiddo nie naastenby groot genoeg vir al “die konings van die aarde en hulle leërs” nie (Openbaring 19:19). Maar Megiddo was die plek waar sommige van die hewigste en beslissendste veldslae in die geskiedenis van die Midde-Ooste plaasgevind het. Die naam Armageddon dien dus as ’n simbool van ’n beslissende konflik, met net een onbetwisbare oorwinnaar.—Sien die venster “Megiddo—’n gepaste simbool”, op bladsy 5.

Armageddon kan nie net ’n konflik tussen aardse nasies wees nie, aangesien Openbaring 16:14 sê dat “die konings van die hele bewoonde aarde” ’n verenigde front vorm by “die oorlog van die groot dag van God die Almagtige”. In sy geïnspireerde profesie het Jeremia gesê dat “dié wat deur Jehovah omgebring is”, verstrooi sal wees “van die een einde van die aarde tot die ander einde van die aarde” (Jeremia 25:33). Armageddon is dus nie ’n menseoorlog wat beperk is tot ’n sekere plek in die Midde-Ooste nie. Dit is Jehovah se oorlog, en dit sal wêreldwyd plaasvind.

Let egter daarop dat Armageddon in Openbaring 16:16 ’n “plek” genoem word. In die Bybel kan “plek” op ’n toestand of ’n situasie dui—in hierdie geval dui dit daarop dat die hele wêreld verenig sal wees in hulle teenstand teen Jehovah (Openbaring 12:6, 14). By Armageddon verenig alle aardse nasies hulle teen “die leërs wat in die hemel was” onder die militêre bevel van die “Koning van die konings en Here van die here”, Jesus Christus.—Openbaring 19:14, 16.

Wat van die bewering dat Armageddon ’n slagting met wapens vir massavernietiging of ’n botsing met ’n hemelliggaam sal wees? Sal ’n liefdevolle God toelaat dat die mensdom en hulle tuiste, die aarde, tot so ’n verskriklike einde kom? Nee. Hy sê uitdruklik dat hy die aarde “nie verniet” geskep het nie, maar dit “gevorm het om bewoon te word” (Jesaja 45:18; Psalm 96:10). Jehovah sal nie ons aardbol by Armageddon in ’n vernietigende ramp verwoes nie. Hy sal eerder “die verderwers van die aarde . . . verderf”.—Openbaring 11:18.

Armageddon—Wanneer?

’n Dringende vraag wat deur die eeue heen eindelose bespiegeling veroorsaak het, is: Wanneer sal Armageddon kom? As ons die boek Openbaring ondersoek in die lig van ander dele van die Bybel, kan dit ons help om vas te stel wanneer hierdie uiters belangrike oorlog sal plaasvind. Openbaring 16:15 verbind Armageddon met die feit dat Jesus soos ’n dief sal kom. Hierdie illustrasie word ook deur Jesus gebruik om sy koms te beskryf om oordeel te voltrek aan hierdie stelsel van dinge.—Matteus 24:43, 44; 1 Tessalonisense 5:2.

Soos die vervulling van Bybelprofesieë toon, lewe ons sedert 1914 in die laaste dae van hierdie stelsel van dinge.a Die tydperk wat Jesus die “groot verdrukking” genoem het, sal die finale deel van die laaste dae uitmaak. Die Bybel sê nie hoe lank hierdie tydperk sal wees nie, maar die rampspoede wat daarmee gepaardgaan, sal erger wees as enigiets wat die wêreld nog ooit gesien het. Hierdie groot verdrukking sal by Armageddon ’n hoogtepunt bereik.—Matteus 24:21, 29.

Aangesien Armageddon “die oorlog van die groot dag van God die Almagtige” is, is daar niks wat mense kan doen om dit uit te stel nie. Jehovah het ’n “vasgestelde tyd” waarop hierdie oorlog sal begin. “Dit sal nie laat wees nie.”—Habakuk 2:3.

’n God van geregtigheid voer ’n regverdige oorlog

Maar waarom sal God ’n wêreldwye oorlog voer? Armageddon hou ten nouste verband met een van sy hoofeienskappe, geregtigheid. Die Bybel sê: “Jehovah het geregtigheid lief” (Psalm 37:28). Hy het al die onregte gesien wat gedurende die mensegeskiedenis gepleeg is. Dit wek natuurlik sy regverdige misnoeë. Hy het dus sy Seun aangestel om ’n regverdige oorlog te voer om met hierdie hele goddelose stelsel weg te doen.

Net Jehovah kan ’n oorlog voer wat werklik regverdig en selektief is, waartydens regskapenes bewaar sal word, waar hulle ook al op die aarde is (Matteus 24:40, 41; Openbaring 7:9, 10, 13, 14). En net hy het die reg om soewereiniteit oor die hele aarde uit te oefen, want dit is sy skepping.—Openbaring 4:11.

Watter kragte sal Jehovah teen sy vyande gebruik? Ons weet eenvoudig nie. Wat ons wel weet, is dat hy die middele tot sy beskikking het om die goddelose nasies heeltemal uit te wis (Job 38:22, 23; Sefanja 1:15-18). Maar God se aardse aanbidders sal nie aan die oorlog deelneem nie. Die visioen in Openbaring hoofstuk 19 dui aan dat Jesus Christus en die hemelse leërs die enigstes is wat aan die oorlog sal deelneem. Nie een van Jehovah se Christenknegte op die aarde sal daaraan deelneem nie.—2 Kronieke 20:15, 17.

’n God van wysheid gee oorgenoeg waarskuwing

Wat van oorlewendes? In werklikheid hoef niemand by Armageddon te sterf nie. Die apostel Petrus het gesê: “Jehovah . . . wil [nie] hê dat enigeen vernietig moet word nie, maar wil hê dat almal tot berou moet kom” (2 Petrus 3:9). En die apostel Paulus het gesê dat dit God se “wil . . . is dat alle soorte mense gered moet word en tot juiste kennis van die waarheid moet kom”.—1 Timoteus 2:4.

Daarom het Jehovah wyslik seker gemaak dat die “goeie nuus van die koninkryk” wyd en syd in honderde tale verkondig word. Mense in alle wêrelddele word die geleentheid gegee om te oorleef en redding te verkry (Matteus 24:14; Psalm 37:34; Filippense 2:12). Diegene wat gunstig reageer op die goeie nuus, kan Armageddon oorleef en vir ewig in volmaaktheid op ’n paradysaarde lewe (Esegiël 18:23, 32; Sefanja 2:3; Romeine 10:13). Is dit nie wat ’n mens sou verwag van ’n God wat liefde is nie?—1 Johannes 4:8.

Kan ’n God van liefde veg?

Baie wonder egter waarom ’n God wat die verpersoonliking van liefde is, dood en vernietiging oor ’n groot deel van die mensdom sou bring. Die situasie kan vergelyk word met ’n huis wat met ’n plaag besmet is. Sou jy nie saamstem dat ’n goeie huiseienaar die gesondheid en welsyn van sy gesin moet beskerm deur die plaag uit te roei nie?

Dit is eweneens weens Jehovah se diep geneentheid vir mense dat die oorlog van Armageddon geveg moet word. God se voorneme is om die aarde in ’n paradys te omskep en om die mensdom tot volmaaktheid te verhef en onder vreedsame toestande te laat lewe, met “niemand . . . wat hulle laat bewe nie” (Miga 4:3, 4; Openbaring 21:4). Wat moet dan gedoen word met diegene wat die vrede en veiligheid van hulle medemens bedreig? God moet sulke “plae”—die verstokte goddeloses—ter wille van die regverdiges uitroei.—2 Tessalonisense 1:8, 9; Openbaring 21:8.

Baie van die onenigheid en bloedvergieting van vandag word deur onvolmaakte menseheerskappy en die selfsugtige strewe na nasionalistiese belange veroorsaak (Prediker 8:9). Menseregerings probeer hulle invloed uitbrei en slaan geen ag op God se opgerigte Koninkryk nie. Daar is geen aanduiding dat hulle hulle soewereiniteit aan God en Christus sal afstaan nie (Psalm 2:1-9). Sulke regerings moet dus verwyder word om die weg te baan vir die regverdige heerskappy van Jehovah se Koninkryk onder Christus (Daniël 2:44). Armageddon moet geveg word om die geskil oor wie die reg het om oor hierdie planeet en oor die mensdom te heers, eens en vir altyd te besleg.

Wanneer Jehovah daadwerklik by Armageddon ingryp, sal hy dit doen omdat hy die mensdom se belange op die hart dra. Met die oog op verslegtende wêreldtoestande kan slegs God se volmaakte heerskappy heeltemal in die mensdom se behoeftes voorsien. Ware vrede en voorspoed sal net deur middel van sy Koninkryk kan seëvier. Hoe sal wêreldtoestande wees as God nooit optree nie? Sal haat, geweld en oorloë die mensdom nie aanhou teister soos dit deur die eeue van menseheerskappy heen gedoen het nie? Die oorlog van Armageddon is eintlik een van die beste dinge wat met ons kan gebeur!—Lukas 18:7, 8; 2 Petrus 3:13.

Die oorlog om alle oorloë te beëindig

Armageddon sal iets bereik wat geen ander oorlog al bereik het nie—die einde van alle oorloë. Wie smag nie na die dag wanneer alle oorlogvoering iets van die verlede sal wees nie? Maar geen mensepogings kon die einde van oorlog bewerkstellig nie. Hierdie herhaalde mislukking van mensepogings om oorlog te beëindig, beklemtoon bloot die waarheid van Jeremia se woorde: “Ek weet goed, o Jehovah, dat aan die mens sy weg nie behoort nie. Dit behoort nie aan die mens wat loop om sy voetstappe te rig nie” (Jeremia 10:23). Die Bybel maak die volgende belofte in verband met wat Jehovah sal doen: “Hy laat oorloë ophou tot aan die einde van die aarde. Die boog verbreek hy en die spies kap hy stukkend; die waens verbrand hy met vuur.”—Psalm 46:8, 9.

Terwyl die nasies hulle dodelike wapens teen mekaar gebruik en dreig om die omgewing te vernietig, sal die Maker van die aarde optree—by die Bybelse Armageddon! (Openbaring 11:18). Hierdie oorlog sal dus dit bereik waarop godvresende mense deur die eeue heen maar net kon hoop. Dit sal die regmatige heerskappy van die aarde se Eienaar, Jehovah God, oor sy hele skepping regverdig.

Armageddon hoef dus nie deur mense wat regverdigheid liefhet, gevrees te word nie. Dit voorsien eerder ’n grondslag vir hoop. Die oorlog van Armageddon sal die aarde reinig van alle verdorwenheid en boosheid en die weg baan vir ’n regverdige nuwe stelsel van dinge onder die heerskappy van God se Messiaanse Koninkryk (Jesaja 11:4, 5). Armageddon sal nie ’n skrikwekkende, rampspoedige einde wees nie, maar sal ’n gelukkige begin beteken vir regverdige mense, wat vir ewig op ’n paradysaarde sal lewe.—Psalm 37:29.

[Voetnoot]

[Venster/Prent op bladsy 5]

MEGIDDO—’N GEPASTE SIMBOOL

Eertydse Megiddo was strategies geleë en het uitgekyk op die westelike deel van die vrugbare Jisreël-vallei in die noorde van Israel. Dit het die internasionale handels- en militêre roetes beheer wat mekaar daar gekruis het. Megiddo het dus ’n plek geword waar beslissende veldslae gevoer is. Professor Graham Davies skryf in sy boek Cities of the Biblical World—Megiddo: “Die stad Megiddo . . . kon maklik uit alle rigtings deur handelaars en swerwers bereik word; maar terselfdertyd kon dit, as dit sterk genoeg was, deurgang op hierdie roetes beheer en sodoende die handel sowel as die verloop van oorloë beïnvloed. Dit is dus nie verbasend nie dat dit . . . ’n prys was waaroor daar dikwels geveg is en wat goed verdedig is wanneer dit verower is.”

Die lang geskiedenis van Megiddo het in die tweede millennium v.G.J. begin toe die Egiptiese heerser Toetmosis III die Kanaänitiese heersers daar verslaan het. Dit het deur die eeue heen voortgeduur tot 1918 toe die Britse generaal Edmund Allenby ’n klinkende oorwinning oor die Turkse leër behaal het. Dit was by Megiddo dat God die rigter Barak in staat gestel het om die Kanaänitiese koning Jabin ’n verpletterende slag toe te dien (Rigters 4:12-24; 5:19, 20). In daardie omgewing het rigter Gideon die Midianiete verslaan (Rigters 7:1-22). Dit is ook waar koning Ahasia en koning Josia doodgemaak is.—2 Konings 9:27; 23:29, 30.

Dit is dus gepas om Armageddon met daardie gebied te verbind, aangesien dit die plek was waar talle beslissende veldslae gevoer is. Dit is ’n gepaste simbool van God se algehele oorwinning oor alle magte wat hom teëstaan.

[Erkenning]

Pictorial Archive (Near Eastern History) Est.

[Prente op bladsy 7]

Wêreldwyd word mense ’n waarskuwing gegee en die geleentheid gebied om Armageddon te oorleef

[Prent op bladsy 7]

Armageddon sal ’n gelukkige begin beteken