Waarom doen wat reg is?

’N GELEERDE man het eenkeer hierdie opmerking gemaak: “Die vermoë om te wil, is by my aanwesig, maar die vermoë om die goeie te bewerk, is nie. Want die goeie wat ek wil, doen ek nie, maar die slegte wat ek nie wil nie, dit beoefen ek.” Waarom het hierdie man dit moeilik gevind om die goeie dinge te doen wat hy graag wou doen? Hy het verduidelik: “Ek vind dus hierdie wet in my geval: wanneer ek wil doen wat reg is, is die slegte by my aanwesig. Ek skep werklik behae in die wet van God na die mens wat ek innerlik is, maar ek sien in my lede ’n ander wet, wat stryd voer teen die wet van my verstand en my wegvoer as gevangene van die wet van die sonde wat in my lede is.”—Romeine 7:18, 19, 21-23.

Hierdie woorde van die apostel Paulus, wat byna 2 000 jaar gelede opgeteken is, verduidelik waarom dit vir onvolmaakte mense ’n uitdaging is om te doen wat reg is. Dit verg sedelike krag om by regte beginsels te bly, veral onder moeilike omstandighede. Dit is dus goed om ons af te vra: Wat is die belangrikste rede om te doen wat reg is?

Kyk na wat die Skrif sê oor die toekoms van ’n regskape persoon. In Psalm 37:37, 38 lees ons: “Gee ag op die onberispelike en kyk na die regskapene, want die toekoms van dié man sal vreedsaam wees. Maar die oortreders sal beslis saam verdelg word; die toekoms van die goddeloses sal inderdaad afgesny word.” Spreuke 2:21, 22 sê vir ons: “Die regskapenes sal op die aarde woon, en die onberispelikes sal daarop oorbly. Wat die goddeloses betref, hulle sal van die aarde af uitgeroei word; en die verraderlikes sal daarvan weggeruk word.”

Hoewel hierdie en ander beloftes wat in die Bybel gevind word, vir ons ’n rede gee om ’n weg na te streef wat God behaag, is dit nie die vernaamste rede om dit te doen nie. Die vernaamste rede hou verband met ’n geskil waarby alle intelligente wesens persoonlik betrokke is. Die volgende artikel bespreek wat daardie geskil is en hoe dit ons raak.