Het jy geweet?

Wanneer het die sterrewiggelaars Jesus besoek?

Matteus se Evangelie sê vir ons dat “sterrewiggelaars uit oostelike streke” Jesus besoek het en vir hom geskenke gebring het (Matteus 2:1-12; voetnoot in NW). Daar word nie gemeld hoeveel sterrewiggelaars, of “magiërs”, die kind Jesus besoek het nie, en daar is geen vaste grondslag vir die tradisionele opvatting dat daar drie was nie; en hulle name word ook nie in die Bybelverslag aangegee nie.

Die New International Version Study Bible sê die volgende oor Matteus 2:11: “In teenstelling met tradisie het die Magiërs Jesus nie op die aand van sy geboorte by die krip besoek, soos die herders nie. Hulle het ’n aantal maande later gekom en hom as ’n ‘kindjie’ in sy ‘huis’ besoek.” Dit word bevestig deur die feit dat Herodes, toe hy die jong kindjie probeer doodmaak het, beveel het dat alle seuntjies van twee jaar en jonger oral in Betlehem en sy omstreke doodgemaak moet word. Hy het hierdie ouderdomsgroep uitgesonder deur berekeninge te doen “ooreenkomstig die tyd wat hy sorgvuldig by die sterrewiggelaars vasgestel het”.—Matteus 2:16.

As hierdie sterrewiggelaars Jesus op die aand van sy geboorte besoek het en goud en ander waardevolle geskenke gebring het, is dit onwaarskynlik dat Maria 40 dae later slegs twee voëls sou geoffer het toe sy Jesus na die tempel in Jerusalem gebring het (Lukas 2:22-24). Dít was ’n voorsiening in die Wet vir arm mense wat nie ’n jong ram kon bekostig nie (Levitikus 12:6-8). Maar hierdie waardevolle geskenke was dalk tydig en het moontlik gehelp om te betaal vir die verblyf van Jesus se gesin in Egipte.—Matteus 2:13-15.

Waarom het dit Jesus vier dae geneem om by Lasarus se graf aan te kom?

Blykbaar het Jesus sake so gereël. Waarom kan ons so sê? Kyk na die verslag in Johannes hoofstuk 11.

Toe Lasarus, ’n inwoner van Betanië en ’n vriend van Jesus, ernstig siek geword het, het sy susters Jesus laat weet (Verse 1-3). Op daardie stadium was Jesus ongeveer ’n tweedaagse reis van Betanië af (Johannes 10:40). Lasarus het blykbaar gesterf omstreeks die tyd toe die nuus Jesus bereik het. Wat het Jesus gedoen? Hy het “nog twee dae op die plek gebly waar hy was”, en toe het hy na Betanië vertrek (Verse 6, 7). Omdat hy twee dae gewag en toe twee dae gereis het, het hy dus vier dae ná Lasarus se dood by die graf aangekom.—Vers 17.

Jesus het vroeër twee opstandings verrig—een direk nadat die persoon gesterf het en die ander waarskynlik later op die dag dat die persoon gesterf het (Lukas 7:11-17; 8:49-55). Kon hy iemand opwek wat al vier dae lank dood was en wie se liggaam reeds begin ontbind het? (Vers 39). Dit is interessant dat een Bybelnaslaanwerk sê dat daar onder die Jode ’n opvatting was dat daar geen hoop kan wees “vir iemand wat al vier dae lank dood is nie; teen dié tyd is daar sigbare tekens van ontbinding aan die liggaam en is die siel, wat glo drie dae lank oor die liggaam gesweef het, al weg”.

As enige van dié wat by die graf byeengekom het, twyfelgedagtes gehad het, sou hulle kort voor lank Jesus se mag oor die dood aanskou. Jesus het voor die oop graf gestaan en uitgeroep: “Lasarus, kom uit!” Toe het “die man wat dood was, . . . uitgekom” (Verse 43, 44). Die opstanding, nie die valse opvatting wat baie het dat die siel ná die dood voortleef nie, is die ware hoop vir die dooies.—Esegiël 18:4; Johannes 11:25.