Wat Jehovah voorspel, word bewaarheid

‘EK IS God en daar is geen ander God nie, en ook niemand soos ek nie; wat van die begin af die uiteinde verkondig, en van ouds af die dinge wat nog nie gedoen is nie’ (Jesaja 46:9, 10). So sê Jehovah, die een wat die toekoms foutloos kan voorspel.

Die mens is berug daarvoor dat hy nie die toekoms akkuraat kan voorspel nie. Die feit dat die Bybel ’n boek van profesie is, behoort alle waarheidsoekers dus te beweeg om die Bybel se bewering dat God die outeur daarvan is, te ondersoek. Kom ons kyk na ’n paar Bybelprofesieë wat reeds bewaarheid is.

Antieke beskawings

God het voorspel dat Babilon sowel as Edom, Moab en Ammon vir ewig vernietig sou word (Jeremia 48:42; 49:17, 18; 51:24-26; Obadja 8, 18; Sefanja 2:8, 9). Die feit dat hierdie volke as afsonderlike volksgroepe verdwyn het, getuig van die akkuraatheid van God se profetiese Woord.

’n Mens kan natuurlik redeneer dat enigiemand kan voorspel dat ’n nasie, ongeag hoe magtig, uiteindelik sal ophou bestaan. Maar hierdie redenasie laat die deurslaggewende feit buite rekening dat die Bybel verder as dit gegaan het. Dit het byvoorbeeld besonderhede verstrek oor presies hoe Babilon sou val. Die Bybel het voorspel dat die stad deur die Meders verower sou word, dat die invallende soldate deur Kores aangevoer sou word en dat die stad se beskermende riviere sou opdroog.—Jesaja 13:17-19; 44:27–45:1.

Die Bybel het nie in alle gevalle voorspel dat ’n verowerde nasie of volk vir ewig sou ophou bestaan nie. Inteendeel, toe God voorspel het dat Jerusalem deur die Babiloniërs vernietig sou word, het hy gesê dat die stad herbou sou word, ondanks Babilon se beleid om nooit sy gevangenes vry te laat nie (Jeremia 24:4-7; 29:10; 30:18, 19). Dit is vervul, en die Jode se afstammelinge bestaan tot vandag toe nog as ’n afsonderlike volk.

Verder het Jehovah voorspel dat Egipte as ’n wêreldmoondheid omvergewerp sou word, maar dat dit ‘daarna bewoon sou word soos in die dae van weleer’. Met verloop van tyd sou hierdie antieke moondheid “’n geringe koninkryk word” (Jeremia 46:25, 26; Esegiël 29:14, 15). Dit is ook bewaarheid. Daarbenewens het Jehovah voorspel dat Griekeland as ’n wêreldmoondheid omvergewerp sou word, maar hy het nooit gesê dat hierdie nasie sou ophou bestaan nie. Wat leer ons uit die feit dat beskawings wat Jehovah voorspel het vernietig sou word, verdwyn het, terwyl ander waarvan hy dit nie voorspel het nie, nog bestaan? Dat God se Woord ware, betroubare profesieë bevat.

Merkwaardige besonderhede

Soos hierbo genoem is, het Jehovah baie besonderhede verstrek oor hoe Babilon sou val. Net so het die boek Esegiël, toe dit die ondergang van Tirus voorspel het, gesê dat sy klippe, houtwerk en stof “in die water” gegooi sou word (Esegiël 26:4, 5, 12). Hierdie profesie is in 332 v.G.J. vervul toe Aleksander die Grote sy leër opdrag gegee het om die ruïnes van die vernietigde stad op die vasteland te gebruik om ’n verhoogde pad te bou na die deel van Tirus op die eiland, wat toe ook verower is.

Die profesie in Daniël 8:5-8, 21, 22 en 11:3, 4 het ook indrukwekkende besonderhede verstrek oor ’n buitengewoon groot “koning van Griekeland”. Hierdie heerser sou op die toppunt van sy mag verbreek word, en sy koninkryk sou dan in vier verdeel word, maar nie onder sy nakomelinge nie. Meer as 200 jaar nadat hierdie profesie opgeteken is, het Aleksander die Grote daardie magtige koning geword. Die sekulêre geskiedenis sê vir ons dat hy deur ’n ontydige dood verbreek is en dat sy ryk uiteindelik onder vier van sy generaals verdeel is—nie onder sy nakomelinge nie.

Kritici het al beweer dat hierdie profesie sekerlik opgeteken is nadat die gebeure plaasgevind het. Kyk egter weer na die bogenoemde verslag in die boek Daniël. Wanneer dit as profesie beskou word, is die besonderhede daarvan merkwaardig. Maar lyk dit nie of daar ’n opvallende gebrek aan besonderhede is wanneer dit beskou word as geskiedenis wat hom as profesie voordoen nie? As ’n bedrieër wat ná Aleksander gelewe het, lesers met ’n sogenaamde profesie probeer beïndruk het, waarom het hy dan nie die punt ingesluit dat twee van Aleksander se seuns onmiddellik ná sy dood hulle koningskap sou probeer bevestig, maar vermoor sou word nie? Waarom het hy nie gemeld dat dekades sou verloop voordat al vier generaals hulle heerskappy oor verskillende dele van Aleksander se ryk sou bevestig nie? Trouens, waarom het hy nie die name van die groot koning en sy vier generaals genoem nie?

Die beswaar dat Bybelprofesie geskryf is nadat die gebeure plaasgevind het, is ’n ou maar onbewese bewering wat deur diegene gemaak word wat, nog voordat hulle die bewyse ondersoek het, besluit het dat dit onmoontlik is om toekomstige gebeure te voorspel. Omdat hulle weier om die Bybel as God se Woord te aanvaar, het hulle geen ander keuse nie as om alles uit ’n suiwer menslike, fisiese oogpunt te verklaar. Maar God het wyslik net genoeg profetiese besonderhede geïnspireer om sy outeurskap te bevestig.a

Bybelprofesieë kan jou geloof versterk as jy die tyd neem om te peins oor die spesifieke profesieë en hulle vervulling. Maak gerus ’n studie van Bybelprofesieë. Die tabelle op bladsye 343 tot 346 van die boek “Die hele Skrif is deur God geïnspireer en is nuttig” kan jou hiermee help.b As jy hierdie wenk toepas, moet jy die projek benader met die doel om jou geloof op te bou. Moenie haastig wees en net materiaal dek nie. Dink eerder met waardering na oor die feit dat alles wat Jehovah voorspel, altyd bewaarheid word.

[Voetnote]

[Venster/Prent op bladsy 24]

LEWENSBEGINSELS

Hier is nog iets om oor na te dink. Die God wat die opkoms en ondergang van wêreldmoondhede so akkuraat voorspel het, is ook die Bron van die lewensbeginsels in die Bybel. ’n Paar hiervan is:

Jy maai wat jy saai.—Galasiërs 6:7.

Dit verskaf groter geluk om te gee as om te ontvang.—Handelinge 20:35.

Om gelukkig te wees, moet ons ons geestelike behoeftes bevredig.—Matteus 5:3.

As jy hierdie beginsels in jou lewe toepas, sal jy die waarheid daarvan ervaar.

[Prente op bladsy 22, 23]

God se Woord het die permanente einde voorspel van hierdie beskawings . . . 

EDOM

BABILON

. . . maar nie van dié nie

GRIEKELAND

EGIPTE

[Erkennings]

Pictorial Archive (Near Eastern History) Est.

WHO photo by Edouard Boubat

[Prent op bladsy 23]

Aleksander die Grote