Wat hou die toekoms in?
WAAROM IS DIE ANTWOORD VAN BELANG? ’n Mens se vooruitsigte vir môre beïnvloed die manier waarop hy vandag optree. Byvoorbeeld, diegene met min hoop vir die toekoms neem dalk die gesindheid aan: “Laat ons eet en drink, want môre gaan ons sterf” (1 Korintiërs 15:32). So ’n gesindheid lei dikwels tot oormatige etery, strawwe drinkery en angstigheid—nie tot ware gemoedsrus nie.
As die toekoms geheel en al aan mense oorgelaat was, sou ons vooruitsigte somber gewees het. Die aarde se lug, water en grond word op ’n ongeëwenaarde skaal besoedel. Die bedreiging van kernoorlog en terroristeaanvalle word al hoe groter. Siekte en armoede teister miljarde regoor die aarde. Tog is daar grondige redes vir hoop.
Hoewel mense die toekoms nie akkuraat kan voorspel nie, beskryf Jehovah God homself as die Een “wat van die begin af die uiteinde verkondig, en van ouds af die dinge wat nog nie gedoen is nie” (Jesaja 46:10). Wat sê Jehovah oor wat die toekoms inhou?
Wat die Bybel sê
Jehovah sal nie toelaat dat die aarde of die lewe daarop onherstelbaar beskadig word nie. Trouens, die Bybel belowe dat God “die verderwers van die aarde [sal] verderf” (Openbaring 11:18). Deur middel van sy Koninkryk, of hemelse regering, sal Jehovah die aarde van goddeloosheid reinig en die toestande tot stand bring wat hy oorspronklik in gedagte gehad het (Genesis 1:26-31; 2:8, 9; Matteus 6:9, 10). Die volgende Bybelverse bied ons ’n blik op die toekoms en beskryf gebeure wat elkeen op aarde binnekort sal raak.
Psalm 46:8, 9. “Kom, aanskou die dade van Jehovah, hoe hy verbasende dinge op die aarde tot stand gebring het. Hy laat oorloë ophou tot aan die einde van die aarde. Die boog verbreek hy en die spies kap hy stukkend; die waens verbrand hy met vuur.”
Jesaja 35:5, 6. “Dan sal die oë van die blindes geopen word, en die ore van die dowes sal ontsluit word. Dan sal die kreupele net soos ’n takbok klim, en die tong van die stomme sal van vreugde uitroep. Want in die wildernis sal waters uitbreek, en strome in die woestynvlakte.”
Jesaja 65:21, 22. “Hulle sal beslis huise bou en dit bewoon; en hulle sal beslis wingerde plant en die vrug daarvan eet. Hulle sal nie bou sodat iemand anders dit bewoon nie; hulle sal nie plant sodat iemand anders dit eet nie.”
Daniël 2:44. “Die God van die hemel [sal] ’n koninkryk oprig wat nooit vernietig sal word nie. En die koninkryk sal aan geen ander volk oorgedra word nie. Dit sal al hierdie koninkryke verbrysel en daar ’n einde aan maak, en self sal dit tot onbepaalde tye bly staan.”
Johannes 5:28, 29. “Die uur kom waarin almal wat in die gedenkgrafte is, [Jesus se] stem sal hoor en sal uitkom.”
Openbaring 21:3, 4. “God self sal by hulle wees. En hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.”
Hoe die Bybel se antwoord ware gemoedsrus meebring
Aanvanklik klink die toestande wat hierbo beskryf is, dalk te goed om waar te wees. Maar hierdie beloftes is deur God gemaak, nie deur mense nie. En Jehovah God ‘kan nie lieg nie’.—Titus 1:2.
As jy leer om op God se beloftes te vertrou en volgens sy wette lewe, sal jy ondanks die moeilikste omstandighede jou gemoedsrus behou. Oorlog, armoede, siekte en selfs die beproewinge van bejaardheid of die moontlikheid van die dood—nie een van hierdie dinge sal jou permanent van jou gemoedsrus beroof nie. Waarom nie? Omdat jy oortuig sal wees dat God se Koninkryk die gevolge van al hierdie probleme ongedaan sal maak.
Hoe kan jy hierdie soort hoop vir die toekoms verkry? Jy moet jou ‘verstand hervorm’ en seker maak wat “die goeie en aanneemlike en volmaakte wil van God is” (Romeine 12:2). Jy sal waarskynlik verdere bewyse nodig hê dat die Bybel se beloftes betroubaar is. So ’n ondersoek is die moeite werd. Min dinge wat jy in die lewe doen, sal jou groter gemoedsrus gee.
[Prente op bladsy 8, 9]
Wat sê God se Woord oor die toekoms?