Kom nader aan God
’n Herder wat omgee
‘GEE God vir my om?’ As jy al ooit hierdie vraag gevra het, is jy nie alleen nie. Baie van ons moes al ontberinge en uitdagings die hoof bied, en by tye wonder ons of die Skepper van die ontsaglike heelal enigsins in ons belangstel. Dit is belangrik vir ons om te weet: Gee Jehovah God vir ons as individue om? Toe Jesus, wat Jehovah beter as enigiemand anders ken, op die aarde was, het hy ’n illustrasie vertel wat die hartverblydende antwoord hierop voorsien.
Jesus het ’n situasie beskryf wat in die lewe van ’n herder kan ontstaan en gesê: “As ’n sekere man honderd skape het en een van hulle dwaal af, sal hy nie die nege-en-negentig op die berge laat staan en die een wat afdwaal, gaan soek nie? En as hy hom vind, voorwaar, ek sê vir julle dat hy blyer is oor hom as oor die nege-en-negentig wat nie afgedwaal het nie. Net so is dit vir my Vader wat in die hemel is, nie wenslik dat een van hierdie kleintjies vergaan nie” (Matteus 18:12-14). Kom ons kyk hoe Jesus ’n prentjie skilder van Jehovah se tere besorgdheid oor elkeen van Sy aanbidders.
Die herder het verantwoordelik gevoel vir elkeen van sy skape. As ’n skaap afgedwaal het, sou die herder geweet het watter een weg is. Hy het elke skaap geken by die naam wat hy daaraan gegee het (Johannes 10:3). Die liefdevolle herder sou nie rus voordat die verlore skaap terug in die kudde was nie. Deur na die skaap te gaan soek, sou hy nie die 99 wat agtergebly het, in gevaar stel nie. Herders het dikwels bymekaargekom en hulle kuddes laat saam wei.a Die herder wat na ’n verlore skaap gaan soek het, kon dus die res van sy skape tydelik in die sorg van sy medeherders laat. Wanneer hy die verlore skaap ongedeerd gevind het, sou die herder rede hê om bly te wees. Hy sou die verskrikte dier op sy skouer sit en dit na die veiligheid van die kudde terugdra.—Lukas 15:5, 6.
Jesus het die illustrasie toegepas deur te sê dat God nie wil hê dat “een van hierdie kleintjies [moet] vergaan nie”. Jesus het sy dissipels vroeër daarteen gewaarsku om nie “een van hierdie kleintjies wat geloof in [hom] stel”, te laat struikel nie (Matteus 18:6). Wat leer Jesus se illustrasie ons dan omtrent Jehovah? Dat hy ’n Herder is wat diep besorg is oor elkeen van sy skape, insluitende die “kleintjies”—dié wat uit die wêreld se oogpunt van min belang is. Ja, in God se oë is elkeen van sy aanbidders uniek en kosbaar.
As jy graag die versekering wil hê dat jy wel kosbaar is in God se oë, kan jy gerus meer leer omtrent die Groot Herder, Jehovah God, en uitvind hoe jy nader aan hom kan kom. Deur dit te doen, kan jy dieselfde soort vertroue hê soos dié van die apostel Petrus, wat ongetwyfeld self Jesus se illustrasie oor die verlore skaap gehoor het. Petrus het later geskryf: ‘Werp al julle sorge op God, want hy sorg vir julle.’—1 Petrus 5:7.
[Voetnoot]
a Dit was nie ’n probleem om die kuddes weer te skei nie, aangesien elke skaap op die kenmerkende roep van sy herder gereageer het.—Johannes 10:4.